Nachmanides

Dr Nachmanides (* 1194 z Girona, † 1270 in Palästina) isch dr latinisiert Name vom Rabbi Mosche ben Nachman, won ä jüdische Glehrte, Rabbi, Arzt, Philosoph und Dichter us Katalonie gsi isch. Mänggisch het er au dr Biname Gerundi noch siiner Heimatschdadt. Dr Name Rabbi Moses ben Nachman wird hüfig abkürzt as Ramban. Uf Katalanisch het er Bonastruc ça Porta gheisse.

Läbe

Dr Nachmanides schdammt von erä jüdische Glehrtefamilie. Er het die jüdische Schrifte schdudiert, aber au Medizin und Philosophii und isch eini vo de iinflussriichschte geistlige und politische Persönlichkeite under de Jude z Katalonie worde

Er isch wäge siiner Glehrsamkeit sehr agseh gsi bi de chrischdlige Herrscher, aber dr Jakob I. vo Aragón het em einewäag 1263 befohle am ne öffentlige Schtriitgschbröch gege dr Judechrischt Pablo Christiani mitzmache, dr Disputation vo Barcelona. Dr Nachmanides het d Dispuation zwar gwunne und het vom König riichi Gschänk übercho, aber d Dominikaner, wo drbii gsi si hai en beschuldigt, ass er dr chrischtlig Glaube beleidigt haig. Wo dr Babscht Clemens IV. sich iigmischd het, het dr Nachmanides Katalonie müesse verlo.

1267 het sich dr Nachmanides im Heilige Land niiderglo und brobiert, die jüdische Gmeinde nach de Zerschdörige wo d Chrüzzüg und d Tataren-Invasione agrichtet hai widr neu ufzbaue. Synagoge si baut worde und vili jüdischi Siidler hai sich z Akko, Jerusalem und Haifa niiderglo.

Dr Nachmanides isch im Johr 1270 gschdorbe. Es isch möglig, ass siis Grab uf em Bärg Karmel z Haifa liit.

Literatur

• Charles B. Chavel: Ramban. His Life and Teachings. New York 1960.
• H.-G. von Mutius: Die christlich-jüdische Zwangsdisputation von Barcelona, Frankfurt/M. 1982
• Christoph Dröge: NACHMANIDES (= MOSES BEN NACHMAN). In: Biographisch-Bibliographisches Kirchenlexikon (BBKL). Band 6, Herzberg 1993, ISBN 3-88309-044-1, Sp. 428–430.

Weblingg

 Allmänd (Commons): Nachmanides – Sammlig vo witere Multimediadateie

Dä Artikel basiert uff ere fräie Übbersetzig vum Artikel „Nachmanides“ vu de dütsche Wikipedia. E Liste vu de Autore un Versione isch do z finde.