Chile Saatle
D Chile Saatle isch en refermierti Chile vo dr Stadt Züri.
Es isch eini vo de jüngschte Chile i dr Stadt. Si isch i de 1960er Joore pout worde.
Wo nach em Zwäite Wältchrieg alli Kwartier am Rand vo dr Stadt Züri starch gwachse sind, isch au dr Chreis 12, wo us em ehemolige Dorf Schwamedinge usegwachsen isch, immer wie grösser worde. Zu der alte Schwamedinger Niklaus-Chile ane isch 1955 d Stefanschile vo Hirzebach pout worde, und es baar Joor spööter het di refermiert Chilegmäind Schwamedinge im Gebiet Saatle scho wider e nöji Chile lo ufstelle. Ane 1964 het me se chänne yweije.
Als Architäkt isch dr Claude Paillard zum Zuug cho, wo z Züri au dr Aabou vom Ooperehuus plaanet het.
S Pouwärch z Saatle isch us Beton, Staaltreeger und Bachschtei und isch deils mit Blääch verchleidet. Es het e bsunders ydrüklechi Gstalt, wo us Muure, Würfle, Flachtecher und Kwaderforme zsämegsezt und id Höchi gstaflet isch. Es isch eini vo de bidüütende Zürcher Chilene vo dr modärne Architektuur. Für iry exprässyvi Form het si ane 1965 d «Uuszächnig für guets Boue» vo dr Stadt Züri überchoo.
Weblink
[ändere | Quälltäxt bearbeite]
Commons: d Chile Saatle – Sammlig vo MultimediadateieKoordinate: 47° 24′ 36,9″ N, 8° 33′ 50,7″ O; CH1903: 684942 / 251658