Hellmuth Marx

Hellmuth Marx (* 17. Juni 1915 z Linz; † 1. Jänner 2002 z Lienz) isch an öschterriichischa Bildhaur gsii.

Leba

Dr Marx Hellmuth isch z jüngschte vo füf Goga z Linz a dr Donau uf d Welt ko. Siin Vatr, Viktor Marx us Graz (1870–1928), isch k. u. k. Offiziar gsii; siine Muatr, Clara Marx geb. Pichler (1876–1948), kunt us Obrdrauburg (Gaschthof Poscht). 1926 hotr d Mittelschual z Graz, d Hamatstadt vo siiner Großmuatr väterlichersiits (Theresia Pesendorfer usra Gewerkenfamilie), bsuacht. Er hot im Juni 1933 am Marieninstitut maturiart.

Ab 1933 hotr a dr Technischa Universität z Graz (Technischa Hochschual Graz) siba Semeschtr Architektur gschtudiart - möchlicherwiis da Vorbildr dr Obertrauburgr Pichlr-Verwandtschaft zfolg - und isch gliichziitig a dr Steirischa Landeskunstschual bi da Professora Daniel Pauluzzi, Alfred Wickenburg und Fritz Silberbauer inskribiart gsii. Er dürft döt o bii Wilhelm Gösser, dm Leitr anra Meischterklass für Holz- und Staabildhauerei, gstudiart hoo. Dr Wilhelm Gösser isch dr Soh vom Bildhaur Hans Brandstetter gsii, wo 1909 d Gedenktafla für a Dichtr Friedrich Marx z Oberdrauburg gschaffa hot.

1938/39 ischr zerscht als Präsenzdianr z Klagafurt iizoga wora, drnoch hotr als Soldat ad Nordmeerfront iirucka müasa. Dia Kriegsgschehnisse hon dn noch Lappland, Finnland und Norwega bis Narvik brocht. Dr Militärdianscht hotr vm Mai 1939 bis Jänner 1940 unterbrächa könna, um nooch anra erfolgriicha Ufnahmprüfig als Gascht d Allgemeine Bildhaurschual vo dr Akademii vo dr bildenda Künscht z Wian z bsuacha. Döt ischr o im Wintersemeschtr 1941/42 dank vo ma Studienurlaub iskribiart gsii.

1946/47 ischr nooch Wian ad Akademii am Schillerplatz, ad Meischtrschual für Bildhauerei zum Müllner Josef, zruck kehrt. 1948 hotr z Heiligabluat am Großglocknr ba sinra Muatr und zwa Schwöschtra Ufnahm gfunda. Noch dr Studienziit z Wian ischr vo Juni 1947 bis Härbscht 1955 z Heiligabluat bliba und hot denn vo 1948 als freischaffendr Künschtlr agfanga schaffa.

Noch Johra vom Pendla zwüscha Heiligabluat und Oberdrauburg hotr sich do endgültig bis zu siim Tod im Stainernhus am Postplatz (hüt Marktplatz) niiderlo.

Am 1. Jänner 2002 isch dr Marx Hellmuth z Lienz im Osttirol gschtorba.

Werk

Dr Marx Hellmuth hot als bildendr Künschtlr gegaständliche Werke gschaffa; i siinm Schaffa dominiart dr menschliche Körpr. In erschtr Linie ischr Bildhaur gsii. Abgsacha vo dem Hauptgebiet, neba dr Malerei, hot sich dr Marx Hellmuth im Lauf vo siinem Leba o da übriga bildenda Künscht gwidmet. Zu dera Bildhauerusbildig hots (Akt)-Zeichna und Mola kört, wo er zwüschadurch betriba hot, und schpötr mit Fotografie ergänzt hot. D Negative vo dena Fotos, druntr Portraitufnahma, sind verloraganga.

Litratur

Heidi Brunnbauer: Hellmuth Marx. Bildhauer in Oberdrauburg, Leben und Werke, 2014, Edition Weinviertel, ISBN 978-3-902589-51-4

Weblink

Commons: Hellmuth Marx – Sammlig vo Multimediadateie

s Leba vom Hellmuth uf austria-forum.org
Essay "Der Großglockner" uf austria-forum.org
Stainernhus (links) und Gaschthof Poscht (rechts) wias hüt ausschaut uf gasthofpost.at