Hardware

Mainboard

Hardware [/ˈhɑːdˌwɛə/ bzw. /ˈhɑɹdˌwɛɚ/ (AE)] isch dr Oberbegriff für die mechanischi und elektronischi Usrüstig vom ene System z. B. em ene Computersystem. Er muess sich aber nit usschliesslig uf System mit eme Prozässer bezieh. Es chönnen au rein elektromechanische Grät wie bispilswiise e Stägehuusliechtautomat si. Ursprünglig isch s änglische hardware öbbe bedütigsgliich mit „Iiseware” gsi und wird au hüt no im änglischsproochige Ruum in däm Sinn bruucht – also nit nume für computer hardware.

Abgränzig vo Hardware und Software

Sehr eifachi System chönne diräkt mit ere unveränderlige Hardware implementiert wärde. D Funktion vo dene System isch denn fest dur d Struktur vo dr Hardware vorge. Komplexeri Hardwaresystem enthalte aber meistens au programmierbari Elimänt, z.B. Prozässer. Die Bauelimänt, wo in ihrer Struktur ebefalls festgleit si, füehre en Abfolg vo Instruktione us, wo manipuliert wärde cha. Drzue chömme Baudeil, wo au in ihrer Struktur chönne definiert wärde. Eso cha d Funktion vom Gsamtsystem liicht apasst wärde. D Konfigurations- und Instruktionsdate wärde allgemein as Software bezeichnet - bi weniger komplexe Grät, wo nume Struktur und eifachi Abläuf festgleit wärde, sait mer e meistens Firmware. Zur Hardware zele drgege Baugruppe (Komponänte: Prozässer, Arbetsspiicher usw.) und Peripheriigrät. Vereifacht gsait ghört alles, wo me cha alänge, zur Hardware. Computer-Hardware isch usschliesslig mit ere entsprächende Software benutzbar.

Mit Software bezeichnet me im Gegesatz drzue Programm und Date, wo me nit cha alänge.
D Datedreger, wo sech d Software druf befindet, z. B. Diskette, CD/DVD/BR-D/HD-DVD, RAM, Flash-Spiicher, Festplatte usw., si drgege Hardware.

Dä Artikel basiert uff ere fräie Übbersetzig vu dere Version vum Artikel „Hardware“ vu de dütsche Wikipedia. E Liste vu de Autore un Versione isch do z finde.