Fresnel-Linse

(1) Querschnitt von ere Fresnel-Linse (Schiinwärferlinse)
(2) Querschnitt von ere normaale Linse mit em gliiche Durchmässer und dr gliiche Brennwiti

E Fresnel-Linse [fʀɛˈnɛl-] oder genauer e Fresnelschi Stuefelinse isch en optischi Linse, wo um 1822 vom franzöösische Füsiker Augustin Jean Fresnel erfunde und ursprünglig für Lüüchtdürm brucht worden isch. Wäge iirem Baubrinzip wärde s Gwicht und s Volume vo groosse Linse chliiner, was bsundrigs bi Linse mit churzer Brennwiti e groosse Underschiid macht, wil Linse mit dr normale Form seer dick und schweer si.

Ufbau

S Volume vo dr Fresnel-Linse wird chliiner, wil d Linse in ringförmigi Beriich iidäilt wird. In jedem vo dene Beriich wird vo usse gege inne d Dicki verchliineret, sodass d Linse e Räije vo ringförmige Stuefe überchunnt. Wil s Liecht nume an dr Oberflechi vo dr Linse broche wird, isch dr Brächigswinkel nit vo dr Dicki abhängig, sondern nume vom Winkel zwüsche de bäide Oberflechene. D Linse wird dünner und het die gliichi Brennwiti, aber d Kwaliteet vo dr Abbildig wird wäge dr Stuefestruktur schlächter.

Im Wääsentlige underschäidet mä zwäi Bauformen vo Fresnel-Linsen: Schiinwärferlinse und Gürtellinse. Schiinwärferlinse si rotazioonssümmetrisch zur optische Aggse. Si bündlet s Liecht in äi Richdig. E Gürtellinse isch e Hoolzylinder, und d Liechtkwelle befindet sich in däm sim Middelpunkt. S Liecht wird in ere Ebeni sänkrächt zur Zylinderaggse bündlet.

• 

  Schiinwärferlinse im Hinderliecht vom ene Auti

• 

  E Däil-Gürtellinse us em Loschen-Lüüchtdurm Bremerhave (Spannwinkel 60°)
  

• 

  Liechtkwelle und Dräilinse im Lüüchtdurm Amrum bi Wittdün

• 

  Abbildig vom ene Frosch (linggs vorne) mit ere dünne Fresnellinse (linggs hinde); Bild und Linse: rächts

Liddratuur

• Dietrich Kühlke: Optik. Harri Deutsch Verlag, 2004, ISBN 3817117418, S. 122. 

Weblingg / Referänze

• Der Studioscheinwerfer als typischer Fresnellinsenscheinwerfer

Noowiis

Dä Artikel basiert uff ere fräie Übbersetzig vu dere Version vum Artikel „Fresnel-Linse“ vu de dütsche Wikipedia. E Liste vu de Autore un Versione isch do z finde.