Felix II. (Gegepapscht)

Dr Felix II. († 22. Novämber 365 z Portus Romae) isch vu 355 bis 358 Bischof vu Rom vu dr remisch-kadolische Chilche gsii un wird dailwys as Märtyrer un Hailige aagluegt.

Im Allgmaine duet mer en ender as Gegepapscht aaluege, nit as rächtmäßige Papscht. Wäge dr unterschidlige Aasichte in däre Frog wird dr rächtmäßig Papscht Felix II. vylmol as „Felix II. (III.)“ notiert. Au fir dr Papscht Felix III. wird des eso gmacht: „Papscht Felix III. (IV.)“. Im Fall vu dr gegesätzlige Mainig wird „Felix III. (II.)“ aagee bzw. fir dr speter Amtsdreger: „Papscht Felix IV. (III.)“. Wichtig isch also di niderer Zahl fir d Nummerierig, wu vu dr kadolische Chilche bruucht wird.

Lääbe

D Zyt isch bregt gsii vu Ussenandersetzige um d Aahänger vum Arianismus, wu schyns e starki Unterstitzig bi der wältlige Herrscher ghaa hän, derwylscht vyl Chilchefierer die Richtig ender abgläänt hän. Wu dr Liberius vum Chaiser Constantius II. verbannt woren isch, weler s Urdail vum Chaiser zue dr Verbannig vum Athanasius nit het welle mitdrage, isch dr Felix II. 356 vum Archidiakon zum Bischof vu Rom glupft wore. Är isch wäge däm in d Gschicht as ain vu dr Gegepäpscht yygange.

Sy Wahl isch gege d Winsch vum Klerus un au gege s Volk duregfiert wore. Prälate, wu zum Hoof ghert hän, hän d Chrenigszeremony duregfiert. Derwylscht si dr Klerus bal em Felix aagschlosse het, isch er vum Volk aber alsfurt abgläänt wore.

Anne 357 het dr Constantius em Bitte vu yyflussryche remische Dame noogee, dr Liberius us dr Verbannig z hole. Dr Constantius het e Edikt erloo, ass beedi Bischef glychbrächtigt zäme herrsche solle, dr Liberius isch bi syre Aachumft z Rom aber vu allne Schichte eso gfyyrt wore, ass dr Felix Rom waidli verloo het.

Iber sy räschtli Lääbe waißt mer wenig, un d Zyygnis driber widerspräche enander. Wahrschyns het er di maischt Zyt vu sym räschtlige Lääbe uf syne Gieter bi Portus Romae verbrocht. Är isch dert am 22. Novämber 365 gstorbe. Syni Reliquie lige in dr Chilche Santa Maria Immacolata z Ceri (Cerveteri), wu bis ins 19. Johrhundert au ihm gweit gsii isch.

Dr Felix II. isch in d Lischt vu dr Märtyrer ufgnuu wore, s waißt aber nieme me, wurum. Villicht isch er mit eme afrikanische Märtyrer verwächslet wore, wu au Felix ghaiße het. In dr Zyt vum Gregor XIII. isch driber dischpetiert wore, eb mer dr Felix in d Ryaie vu dr ordelige Päpscht soll ufnee. Go ne Antwort uf die Frog finde, isch sy Lyych exhumiert wore, zum Spure vu Wunder finde. S haißt, uf sym Lyyb seie d Wort Papscht un Märtyrer gfunde wore, aber die ibernatyrlige Beleg steh im Widerspruch zue dr eltere Quälle vu dr Chilche. Wäge däm wird dr Felix II. regulär hite nit as Papscht aagluegt. Sy Verehrig as Hailige wird au uf e Verwächslig mit eme afrikanische Märtyrerbischof Felix zruggfiert.

Sy Fyyrtig isch dr 29. Juli.

Literatur

• Adolf Jülicher: Felix 19. In: Paulys Realencyclopädie der classischen Altertumswissenschaft (RE). Band VI,2, Stuttgart 1909, Sp. 2168–2169.
• Friedrich Wilhelm Bautz: Felix II. In: Biographisch-Bibliographisches Kirchenlexikon (BBKL). Band 2, Hamm 1990, ISBN 3-88309-032-8, Sp. 9–10.
• Ytrag in d Catholic Encyclopedia, Robert Appleton Company, New York 1913 (änglisch)

Dä Artikel basiert uff ere fräie Übersetzig vu dere Version vum Artikel „Felix_II._(Gegenpapst)“ vu de dütsche Wikipedia. E Liste vu de Autore un Versione isch do z finde.