Edi Rama

Us der alemannische Wikipedia, der freie Dialäkt-Enzyklopedy
Dr Edi Rama (links) mit em griechische Regierigschef Papandreou (2011)

Dr Edi Rama (am 4. Juli 1964 z Tirana uf d Wält cho) isch en albanischer Künschtler un Politiker und syt em 10. September 2013 dr Minischterpräsident vo Albanie. Syt Oktober 2005 isch er Vorsitzender vo dr Sozialistische Partei vo Albanie (alb. Partia Socialiste e Shqipërisë). Vo 2000 bis 2011 isch er Bürgermeischter vo dr Hauptstadt vo Albanie, Tirana, gsii.

Politische Ufstiig[ändere | Quälltäxt bearbeite]

Dr Edi Rama het sich 1990 am Umsturz vum kommunistischi Regime beteiligt. Er isch zu dere Zit Lektor aa dr Kunschtakademi vo Tirana, dr Akademia e Arteve e Tiranes gsi. Er het sich aber schnell vo dr Demokratische Partei vum Sali Berisha abgwannt un in de Joor druf im Ussland e Name als Künschtler gmacht. 1997 isch er vo Sicherheitskräft (wo aageblich vom Sali Berisha beuftrait worre sin) fascht dot gschloo worre, un isch uf Paris emigriert. 1998 isch er zum Begräbnis vo sym Vater zruggcho un vum Premier Fatos Nano zum Kultusminischter ernannt worre. Wonner Kultusminischter gsi isch het er zum Byspil d erschte Kinos syt 1990 eröffne loo.

2000 het er mit dr Unterstützig vo dr Sozialistischi Partei als Bürgermeischter vo Tirana kandidiert un mit 57% gwunne. Churz noch synere Waal het en Unbekannter uf syn Huus gschosse, s isch aber niemer verletzt worre.

Nooch synere Waal het er e Kampagne gstartet s Stadtbild vo Tirana z verbessre. So sin illegali Kiosk un Hüüser an dr Lana abgrisse worre, d Stadt im Allgemeine isch gsüüberet worre un 96,700 Quadratmeter vo Grüenfläche sin ygrichtet worre. Usserdem sin vili alti Hüüser neu gschtriche worre, oft in grelle, bunte Farbe.

Im Oktober 2003 isch er mit 61% vo de Stimme als Bürgermeischter widergwäält wore. Usserdem het er 2003 erfolglos gege dr Fatos Nano als Parteipräsident kandidiert.

2004 isch er vo dr Internetplatform World Mayors zum Weltbürgermeischter vum Joor gwäält worre.

Wo d Sozialistische Partei 2005 d Parlamentswaale aa d Demokratische Partei verloore het het dr Edi Rama im Oktober vo däm Joor de Fatos Nano als Parteivorsitzender abglöst. Im Februar 2007 isch er zum zweite Mool als Bürgermeischter vo Tirana widergwäält wore. 2011 het er d Burgermeischterwahl gege dr Lulzim Basha, dr Kandidat vo dr Demokratische Partei, verlore.

Bi dr Parlamentswashl 2013 isch er als Spitzekandidat vo syre Partei aatrette und noch em Siig vo synere Partei bi dr Wahl isch er am 10. September 2013 Minischterpräsident vo Albanie wore.

Künschtlerische Aktivität[ändere | Quälltäxt bearbeite]

Dr Edi Rama isch nümme als Künschtler aktiv, het aber imene Interview gmeint dass d Politik au öbis äänlichs wie Kunscht isch. 2003 het er en Gaschtuftritt im Lied “Tirona” vo dr albanische HipHop Gruppe West Side Family gha, wo inzwüsche so öbis wie d Lokalhymne vo Tirana worre isch.

Literatur[ändere | Quälltäxt bearbeite]

  • Beat Bieri, Velvet Creative Office Gmbh: Tirana in Farbe. Velvet Edition, Luzern 2003

Weblink[ändere | Quälltäxt bearbeite]