Dutch Swing College Band

Dutch Swing College Band isch e niderländischi Formation im traditionelle Jazz.

Gschicht

D'Band isch am 5. Mai 1945 (am Tag wo i de Niderland als Befreiigstag und Nationalfiiertig gilt) als Amateur-Combo vorwiegend vo Studänte gründet worde. Die erscht Bsetzig hed usem Peter Schilperoort (Klarinettä), em Frans Vink (Klavier), em Henny Frohwein (Kontrabass) und em Tonny Nüsser (Schlagzüüg) bestande. D’Combo, wo sich scho bald zum Oktett erwiiteret hed, hed i de Nachchriegsjahre e wichtige Pionierrolle gschpilt und vil Jugendlichi für die in Nordamerika entstandene und während de NS-Herrschaft in Europa underdrückte Jazzschtil wie Dixieland und Swing begeischteret.

Vil Jazzgrössene hend sich vo de Dutch Swing College Band, wo 1960 is Profilager gwechslet hend, begleite lah, bispiilswis de Bud Freeman, de Sidney Bechet, de Joe Venuti oder de Teddy Wilson. Im 1967 hed de Huub Janssen für die nächschte 25 Jahr de Part vom Schlagzüüger i de Band übernoh. D Dutch Swing College Band hed sich zumene weltwit bekannte Jazz-Ensemble entwicklet, wo uf allne foif Kontinent gschpilt hed. Die uffallendschti Eigeschaft vo de Band isch vo Afang a immer en eigene, dütlich erkennbare Stil gsi. Das isch dur das gwährleischtet worde, dass s’Oktett eigeni Interpretatione, Arrangements oder Kompositione gschpilt hed, statt Ufnahme vo amerikanische Musiker z’kopiere. De Musiker isch es glunge, ihres Publikum in erschter Linie mit interessante Jazz-Interpretationen z’fesslä.

Es git zahlriichi Ufnahme vo de Gruppe uf fascht allne Arte vo Tonträger. Zuedem hed d Band zahlriichi Mal im Fernseh und i Filmproduktione mitgwürkt. Nach em Frans Vink Jr. (1945–1946), Joop Schrier (1955–1960) und Peter Schilperoort (1946–1955 und 1960–1990) lit d’Leitig vo de Band jetzt bim Bob Kaper.

Die aktuell Bsetzig vo de Band (Stand 2014) isch de Keesjan Hoogeboom (Trumpetä und Gsang), de Bob Kaper (Klarinettä, Saxophon und Bandchef), de David Lukács (Klarinettä und Saxophon), de Maurits Woudenberg (Posuune), de Ton van Bergeijk (Gitarrä und Banjo), de Adrie Braat (Kontrabass) und de Anton Burger (Schlagzüüg).