Clemens VII. (Papst)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Pabst Clemens VII. uf eme Gmäld vom Sebastiano del Piombo
S Wappe vom Pabst Clemens VII.

Dr Clemens VII. (bürgerlig Giulio de’ Medici; * 26. Mai 1478 z Floränz; † 25. Septämber 1534 z Rom) us dr Familie vo de Medici isch vom 18. Novämber 1523 bis zu siim Dod Pabst gsi.

D Usenandersetzig zwüschen em römisch-dütsche Kaiser und em König vo Frankriich[ändere | Quälltäxt bearbeite]

Sit 1521 het dr spanisch König und römisch-dütsch Kaiser, Karl V., gegen e Franz I. vo Frankriich Chrieg um d Herrschaft in Oberitalie gfüehrt. Dr Clemens VII. het sich zerst us däm Komflikt welle uusehalte, het sich aber mit dr Zit em Karl V. gnööcheret. Wo 1526 dr Franz I. gfangegnoh worden isch, het dr Pabst die Allianz mit em Karl V. beändet und sich dr Liga vo Cognac aagschlosse. Die kaiserlige Druppe hai druf Rom eroberet und d Stadt isch im sogenannte Sacco di Roma blünderet worde.

Dr Clemens het sich in dr Ängelsburg verschanzt, isch belageret worde und het sich schliesslig ergee. Er isch gfangegnoh und d Medici si us Floränz verdriibe worde. Am 29. Juni 1529 het er mit em Kaiser Karl V. dr Friide vo Barcelona abgschlosse, het d Herrschaft über e Chillestaat zruggübercho und d Medici si z Floränz wider an d Macht cho. Am 24. Februar 1530 het dr Clemens VII. dr Karl V. z Bologna zum Kaiser krönt.

Die protestantischi Reformation[ändere | Quälltäxt bearbeite]

Wäge dr Reformation het dr Kaiser Karl V. vom Clemens VII. verlangt, ass er e Konzil wurd iiberüefe. Das het dr Pabst aber nid gmacht. Er het au d Hürot vom Heinrich VIII. vo Ängland mit dr Katharina vo Aragon nid welle annulliere. Wäge däm het sich dr änglisch König vo dr katholische Chille losgsait und d Church of England gründet.

Weblink[ändere | Quälltäxt bearbeite]

 Allmänd (Commons): Clemens VII. – Sammlig vo witere Multimediadateie