Berthe Morisot

D Berthe Marie Pauline Morisot (* 14. Januar 1841 z Bourges; † 2. Merz 1895 z Bariis), au Berthe Manet, isch e franzöösischi Moolere vom Impressionismus gsi.

D Morisot isch us ere woolhabende franzöösische Familie cho und het Brivatunderricht im Moole und Zäichne überchoo. In de 1860er Joor isch si e Schüelere vo, Camille Corot gsi. Si het aber dr konvenzionelli Stiil vo iirem Leerer abgleent undhet sich für die impressionistischi Art vo dr Moolerei entschiide. Mit em Mooler Édouard Manet het si en ängi Fründschaft verbunde, und dä het si zwüsche 1868 und 1874 e baar mol bordretiert. Si het aber immer e sälbständige Stiil ghaa, wo vo liechthaltige Farbe brägt gsi isch, eme fiine Bimselstrich, ere starke Bedoonig vo de grafische Middel und eme zarte Gfüülsusdruck. D Berthe Morisot isch die ersti Frau in dr Grubbe vo de Impressioniste gsi. Vo 1874 aa isch s e baar Mol bi de Impressionisteusstellige drbii gsi, wo denn organisiert worde si. 1877 het si dr Eugène Manet, dr Brueder vom Édouard Manet, ghürootet. Im Joor druf isch iiri Dochder Julie uf d Wält choo.

D Berthe Morisot het Familieszeene bevoorzugt, Fraue- und Chinderbordret, Innenaasichde und Landschafte, drunder e Hufe Küstebilder. Si gältet zämme mit dr amerikanische Künstlere Mary Cassatt as die bedütendsti Moolere vom spoote 19. Joorhundert.

Iiri Wärch Der Vogelkäfig und See am Bois de Boulogne sind im National Museum of Women in the Arts z Washington z gseh.

E baar vo iire Wärk

Dr Haafe vo Lorient, 1869, The National Gallery of Art, Washington, DC
E Frau und e Mäitli uf em Balkon, 1872, Sammlig Ittleson Nöi York
D Wiege, 1873, Musée d’Orsay, Paris
D Wösch dusse zum Dröchne ufhänke, 1875, National Gallery of Art, Washington, D. C.
Im Chornfäld, 1875, Musée d'Orsay, Bariis
S Baad, 1885/86, Sterling and Francine Clark Art Institute, Williamstown, Mass. USA
Liigends Mäitli, 1893, Gallery Richard Green, London

Liddratuur

Dominique Bona: Berthe Morisot, Le Secret de la femme en noir. Le Livre de Poche, 2002, ISBN 2-253-15347-8.
Bernard Denvir: The Chronicle of Impressionism: An Intimate Diary of the Lives and World of the Great Artists. Thames & Hudson, London 2000, OCLC 43339405.
Anne Higonnet: Berthe Morisot. University of California Press, Berkeley 1995, ISBN 0-520-20156-6.
Ingrid Pfeiffer und Max Hollein (Hrsg.): Impressionistinnen. Berthe Morisot, Mary Cassatt, Eva Gonzalès, Marie Bracquemond. Ausstellungskatalog. Hatje Cantz, Ostfieldern 2008, ISBN 978-3-7757-2078-6.
Jane Turner: From Monet to Cézanne: late 19th-century French artists. Grove Art. St Martin's Press, New York 2000, ISBN 0-312-22971-2.

Weblingg

Commons: Berthe Morisot – Sammlig vo Multimediadateie

Wärch vo Berthe Morisot bi Zeno.org
WebMuseum, Paris E Hufe Wärk vo dr Berthe Morisot in gueter Kwalideet
FemBiografii vo dr Berthe Morisot vo dr Renate Rochner mit Zitaat, Lingg und Liddratuuraagoobe

Dä Artikel basiert uff ere fräie Übersetzig vu dere Version vum Artikel „Berthe_Morisot“ vu de dütsche Wikipedia. E Liste vu de Autore un Versione isch do z finde.