Dr Begriff «Schicht» in dr Soziologii

Us der alemannische Wikipedia, der freie Dialäkt-Enzyklopedy
(Witergleitet vun Unterschicht)
S Schichtemodäll noch em Ralf Dahrendorf: S Dahredorf-Hüüsli

Dr Begriff Schicht ghöört in dr Soziologii zu de Grundbegriff und isch äng verwandt mit de Begriff Klass, Stand oder Kaste. Die Begriff underschäide sich: Z welere Schicht oder Klass öbber ghöört, cha sich im Lauf vo sim Lääbe ändere, zum ene Stand oder ere Kaste ghöört mä dur d Geburt. Aber alli Begriff bezäichne Grubbe innerhalb von ere Gsellschaft, wo sich underschäide. Dr Begriff Schicht wird sältener au as Oberbegriff für alli andere Ungliichhäitsmodäll brucht, wie z. B. Klass, Kaste oder Stand. Es isch e grundsätzligs Brobleem, ass dr Begriff Schicht nit allgemäingültig definiert isch.

Mä brucht dr Begriff Schicht, zum d Underschiid in ere Gsellschaft noch verschiidene Kriterie z beschriibe. Mä luegt drbii e Person oder e Grubbe vo Lüt aa und entschäidet noch gwüsse Faktore, zu welere Schicht si ghööre. Dr Theodor Geiger dänggt, ass mä das nume chönn mache, wenn au d Mentalitäät die gliichi isch. E Vordäil vom Schichtemodäll isch, ass d Faktore frei chönne gweelt wärde under dr Bedingig, ass iiri Zaal beschränggt blibt und dass si typisch für e Schicht si. D Faktore si mäistens wirtschaftlig und vilmol wird e Middelschicht noch em Durchschnittsverdienst definiert. D Ooberschicht verdient denn seer vil mee und d Underschicht seer vil weeniger. In dr Schwiz zum Bischbil het mä für d zur Sändig 'Verarmt unser Mittelstand?'[1] zur Middelschicht zelt, wär zwüsche 70 und 150 % vom durchschnittlige verfüegbare Ekwivalänziikomme[2] verdient. Noch dere Definizioon isch d Middelschicht in dr Schwiz bi Witem die grössti Gsellschaftsschicht und öbbe 60 % vo dr Bevölkerig ghööre drzue.

Fuessnoote[ändere | Quälltäxt bearbeite]

  1. 'Verarmt unser Mittelstand?' - Radio DRS - Abgrüeft am 19. Oktober 2011
  2. S Ekwivalänziikomme entspricht em Nettoiikomme vom ene Huushalt, wo mä drvo 20% für festi Abgoobe abziet. Für en Äipersonehuushalt het s im Joor 2010 CHF 42'000 entsproche.