D Telefonvorwahl in der Schwiz

d Vorwahlnummere bim Telefon i de Schwiz

Ä Telefonvorwahl wird vor diä eigentlichi Telefonnummerä gsetzt, wenn mer us äm eigene Netz usä telefonierä will. Es gitt internationali Vorwahlnummerä und nationali. Die internationalä muäs mer jewiils iigäh, wenn mer en Aaschluss im Usland will erreichä. Innerhalb vo de Schwiiz händ im Feschtnetz die einzelnä Regionä und im Mobilnetz die einzelnä Aabüter eigeni Vorwahlä. Innerhalb vo dä Schwiiz chan mer aber nümä vo eigentlichä Vorwahlä redä. Vor einigä Jahr isch iigfüehrt wordä, dass mär immer muän die ganz Nummerä wähle, süscht chunnt mer kei Verbindig meh über. Wänn also öpper sim Nachbär wett aalüte, hätt er früener no die normal Nummerä (die hätt sibä stellä) chönnä wähle, hütt muen er die Nummerä mit de Vorwahl (insgesamt zäh stellä) wähle, süsch chunnt ä Fählemäldig. S'gliichä gilt au bi Verbindigä innerhalb vom gliichä Mobilfunknetz.

Wenn mä us em Usland (Internationale Telefonvorwahl +41 für d Schwiz) telefoniert, loot mä d 0 am Aafang vo dr hütige Telefonnummerä, wo in d Vorwahl integriert worde isch, wäg (z. B. 044 824 71 11 wird +41 44 824 71 11).

Die internationali Vorwahl foot in dr Schwiz mit 00 oder + aa.