HD-Soldat Läppli

Us der alemannische Wikipedia, der freie Dialäkt-Enzyklopedy
(Witergleitet vun HD Läppli)

Dr HD-Soldat Läppli (HD stoht für Hilfsdienst) isch e Figur vom Schwiizer Schauspiiler Alfred Rasser. Es git au e Film mit däm Ditel us em Johr 1959.

Entstehig[ändere | Quälltäxt bearbeite]

Dr Rasser het sich d Figur vom guetmüetige, aber gränzelos dollpatschige Soldat Theophil Läppli 1945 usdänggt. Dr Name Läppli isch wohrschiinlig vom schwiizerütsche Lappi abgleitet, was öbbe Duuble bedütet.

Es git e Hufe Szene wo belege, ass im Rasser si Läppli vom Jaroslav Hašek sim brave Soldat Schwejk inspiriert gsi isch. D Grundbedingige si aber ganz andersch: Dr bravi Soldat Schwejk wird vo dr östriichisch-ungarische Obrigkeit, wo ihn won e Tschech und einfache Mensch isch, nume as Kanonefueter betrachtet, zwunge im e mörderische Chrieg z diene; dr Hilfsdienstsoldat Läppli drgege nimmt nume d Uswüchs vom Milidärdienst ufs Chorn, und für ihn stoht d Schwiiz as neutrali Staat, won er für en Dienst leistet, überhaupt nid zur Diskussion. Dr Schwejk handlet as schiinbar Schwachsinnige, wo schlau d Milidärbürokratii usnützt und sich vo Amt us Idiotii loot lo beschiinige; er wird eso zum ene unabhängige Antiheld, wo sich jeder Ideologisierig entzieht.

Beschriibig[ändere | Quälltäxt bearbeite]

Typisch für e Läppli isch si hochi, nasali Stimm und dr markanti baseldütschi Dialäkt, wo vom ene Sproochfehler no versterkt wird. D Gschichte spiile meistens während em Zweite Wältchrieg, wo d Schwiiz nume näbebii betroffe het. As Hilfsdienst-Soldat dräit dr Läppli aber kei Waffe (im Film HD-Soldat Läppli dräit er allerdings e Karabiner), isch wiit ewäg vo jedere Front und wird nume für eifachi Ufgoobe igsetzt (wie zum Bischbil s Butze vom Kasärneblatz).

Dr Läppli meint alles immer guet. Sogar für die milidärische Vorgsetzte, wo im Zügs umeschreie und ihn für jede vo sine vile Fähler bestroofe, het er immer Verständnis und Mitgfüehl – was die natürlig no meh verruckt macht. Drzue chunnt, ass kei Befähl so exakt cha si, ass en dr Läppli nid falsch chönnt verstoh.

Verfilmige[ändere | Quälltäxt bearbeite]

Dr riisigi Erfolg uf de Schwiizer Theaterbühne het zu drei Verfilmige gfüehrt.

  • Läppli am Zoll (1954)
  • HD-Soldat Läppli (1959)
  • Demokrat Läppli (1961)

Roland Rasser[ändere | Quälltäxt bearbeite]

Noch em Dod vom Alfred Rasser isch d Figur vo sim Sohn Roland Rasser uf dr Theaterbühni witergfüehrt worde.

Weblingg[ändere | Quälltäxt bearbeite]