James Weddell

Dr James Weddell

Zitgenössischi Daarstellig vo dr 2. Weddell-Expedizioon. 1825

Dr James Weddell (* 24. August 1787 z Ostende, Belgie; † 9. Septämber 1834 z London) isch e britische Seefaarer und Robbejeeger gsi.

Biographii

Dr James Weddell isch mit sim Brueder Charles uf d Swan gange, won er erst nüüni gsi isch. Er het e kaufmännischi Leer gmacht und isch 1805 uf eme Handelsschiff zu de Westindische Insle gfaare. Er het mit em Kapitän ghändlet, dä het en gfangegnoo und er isch uf dr Fregatte Rainbow as Möiterer uf Jamaika choo. Dört isch er in d Royal Navy und het bis zum Ändi vo de Napoleonische Chrieg uf meerere Schiff dient.

Dr Weddell het welle go Robbe fange, isch uf d Falklandinsle, won er 1819 bis 1820 überwinteret und d Meeresgebiet um d Insle ume erforscht het. Im Januar 1820 isch er zrugg uf Ängland und isch im Septämber 1821 vo London zum zwäite Mol zu de Falklandinsle gseeglet. Uf de Südlige Shetlandinsle si d Robbe aber scho so stark bejagt worde, ass är und sini Partner nöiji Jagdgründ si go sueche. Si häi die Südlige Orkneyinsle gfunde, wo erst grad vom George Powell (1794–1823) entdeckt worde si. Im Juli 1822 si si wider zrugg in Ängland gsi.

Uf sinere dritte Räis het dr Weddell dr Befääl überchoo, nid nume Robbe z jage sondern au die antarktische Gwässer z erforsche. Am 12. Januar 1823 si si bi de Südlige Orkneyinsle aachoo. D Jagd uf d Robbe uf de Insle isch enttüschend gsi und dr Weddell isch nöis Land witer im Süde go sueche. Si si uf e Bräiti vo 71° 10′ S cho, was dr südligst Punkt gsi isch, wo je e Schiff aane choo isch, si witer gege Süde und am 10. Februar 1823 si bis 74° 34′ S choo und häi die erste Iisbärg gsee, aber niene käi Land gsichdet. Dr Weddell het denn aagnoo, ass es bis zum Südpol kä Land gääb und isch umkeert. Si häi uf de Falklandinsle überwinteret, si in Richdig Kap Hoorn gseeglet, und dr Weddell het die patagonischi Küste erforscht.

Zrugg in Ängland het er e Buech über sini Abentüür gschriibe. Er het wider Handel afo driibe, het sis Schiff underwägs aber müesse ufgee (1829), und isch uf eme andere Schiff zrugg in Richdig Ängland gfaare, wo daas an dr Insle Pico Schiffbruch gmacht het. Dr Weddell het sich chönne uf e Felse rette. Wil er sis Schiff verloore het, isch er finanziell ruiniert gsi und isch vo 1830 bis 1832 wider Kapitän für anderi Schiffsbsitzer worde.

1834 isch dr James Weddell z London gstorbe und isch uf em Friidhoof St. Clement Danes begraabe worde.

Eerige

Noch em James Weddell het s Weddellmeer im Südligen Ozean si Naame überchoo und au d Weddellrobbe.

Wärk

• James Weddell: A voyage towards the South Pole performed in the years 1822-24. Containing an examination of the Antarctic Sea, to the seventy-fourth degree of latitude; and a visit to Tierra del Fuego, with a particular account of the inhabitants. To which is added, much useful information on the coasting navigation of Cape Horn, and the adjacent lands, London, 1825; 2. erwitereti Usgoob, London, 1827 (Reprint:David & Charles, Newton Abbot, 1971)

Weblingg

• D Biographii vom Ray Howgego

Dä Artikel basiert uff ere fräie Übersetzig vum Artikel „James_Weddell“ vu de dütsche Wikipedia. E Liste vu de Autore un Versione isch do z finde.