Landbsetzig vo Caledonia

D' Landbsetzig vo Caledonia isch e Usenandersetzig zwüsche irokesischi Uriiwohner vo Kanada un dr Provinzialregierig vo Ontario gsi. Vo Februar bis Mai 2006 hen irokesischi Bewohner vo Ohswé:ken (Six Nations) e Streife Land bi Caledonia i Ontario bsetzt. Dr Protescht het sich gäge e Huusbauprogramm grichtet, wo vo dr Firma Henco betrybe worre isch. D'Irokese hen d'Meinig verträte, dass ihne s'Land im 18te Johrhundert gstohle worre isch un hen sich gäge s'Projekt gwehrt. Nooch mehreri, zum Teil gwalttätige, Usenandersetzige zwüsche de Irokese, dr Polizei un Yheimischi sin d'Blokade Endi Mai grüümt worre un Verhandlige ufgnumme worre.

Caledonia leit im südlichi Ontario in dr Nähi vo Hamilton, über 80km vo Toronto eweg un 60km vo St. Catharines. Dr Konflikt wird oft mit dr Oka Krise vo 1990 un dr Ipperwash Krise vo 1995 vergliche, wo zu ähnlichi Konfrontatione gfüehrt hen. Im Gägesatz zum derdemols het's dismol aber kei Toti gää.

Ufem Höhipunkt vo dr Krise isch e wyser Pöbel uf d'irokesischi Barikade zuemarschiert un het müesse vo dr Polizei zrugghalte werre. E Bwohner vo Caledonia het de Irokese “gönn heim!” zuegruefe, woruf e irokesischi Bsetzerinn “mer sin deheim!” zrugggruefe het.

Hintergrund

D'Wurzle vum Konflikt gönn uf d amerikanischi Revolution zrugg. D'irokesischi Langhuuskonfederation isch gspalte gsi; e Teil het d'Amerikaner unterstützt, e andrer Teil welle neutral blybe, e Teil unter dr Füehrig vum Mohawk Joseph Brant het d'Brite unterstützt. Am End vum Chrieg sin amerikanische Truppe i s'Stammland vo de Irokese ygfalle, während d'meischti Chrieger furt gsi sin. D'Soldate hen alli irokesischi Dörfer abbrännt un d'Vorrät vo de Irokese vernichtet. Als Dank für ihri Unterstützig hen d'Brite de Flüchtling e neui Heimet versproche. D'Irokese hen ganz bstimmti Aasprüch gstellt; so het's Klima un dr Bode geignet für s'Aapflanze vo Mais, Bohne un Chürbis solle sy. Usserdem sin gueti Jagdgründ notwendig gsi un jungi Bäum für s'Baue vo de irokesischi Langhüüser. D' Grand River Region isch für die Bedürfnis ideal gsi.

1784 hen d'Brite de Irokese schliesslich e 385.000 Hektar grosses Stück Land zuegsproche. S'het vo dr Mündig vum Grand River zum Eriesee greicht.

Dr Strytpunkt isch gsi, öb d'britischi Chrone de Irokese glychtzitig politischi Autonomi zuegsproche het, un dodemit au d'Autorität s'Land z'verpachte un z'verchaufe. Um syni politischi Autonomi z'bewiise, het dr Joseph Brant sofort aagfange mit riisigi Parzelle Land a britischi Siidler verpachte oder verchaufe. 1834 isch vo dr Regierig entschide worre, dass d'Verchäuf illegal gsi sin, s'aber glychzitig nümm möglich wär, d'Siidler wiider z'entferne uf Grund vum rasante Waggstum vo Städt wie Brantford. Als einzigi Lösig isch dr Verchauf nochträglich legalisiert worre un alles Land, wo verpachtet oder verchauft worre isch, vo de Irokese abträte worre. Mehreri Lüt innerhalb vo dr Konfederation hen des aber immer no nüt annerchannt.

Dr speziifischi Konflikt vo Caledonia goht uf s'Johr 1835 zrugg, wo d'Regierig d Irokese drum bette het e Stück Land für de Bau vonere Stross z'verchaufe. D'Konfederation het sich bereit erchlärt e Streife Land z'verpachte, aber nüt z'verchaufe. D'Regierig behauptet allerdings, dass s'Land 1841 vur Konfederation abträtte worre isch. S'relevanti Dokument isch allerdings numme vo säggs Häuptling unterzeichnet worre un nimmt usserdäm uf kei bstimmti Parzelle Land Bezug. Zweimol i däm Johr un no emol 1843 hen d'Irokese gäge de Verchauf proteschtiirt. 1845 isch s'Land trotz Protescht aa Dritti verchauft worre.

1924 isch usserdäm vo dr kanadischi Regierig e gwählter Stammesrot ygsetzt worre, um d'traditionel usgwählti Stammeshäuptling z'ersetzte. D'traditioneli Stammesfüehrer hen de gwählte Rot nie annerchannt un beidi verträte oft verschiidni Positione. Im Fall vo Caledonia verträte d'traditoneli Häuptling d'Position, dass s'Land gstohle worre isch, während dr gwählte Rot d'Aasicht vertritt, dass numme d Entschädigung, wo zahlt worre isch, nüt längt.

Dr Chonflikt um d'40 Hektar Land bi Caledonia isch nie ganz glösst worre; 1995 het d'Konfederation schliesslich d'Bundes – un Provinzregierig verchlagt.

Erschti Demonschtratione

Am 28te Februar 2006 het e erschti Demonschtration stattgfunde. D'Demonschtrante hen gäge de Bau vo fascht 200 Wohnunge ufem umstrittene Land proteschtiert un derno de Bauplatz bsetzt. D'Demonschtrante hen Zelt, e hölzerni Unterchumft un Barikade erichtet un d'Arbeiter am näggschte Morge nüt uf s'Glände glo.

D'Medie hen de Protescht numme wenig Ufmerksamkeit gschänkt un sälbscht i dr Region hen wenigi Lüt devo gwüsst.

Am 5te Mai isch schliesslich vomene Provinzgericht e Rüümigsbefehl gäge d'Demonschtrante erlo worre. Sii hen solle bis zum näggschte Dunschtig alli Barikade ufruume un d'Arbeite nümm behindre. D'Irokese hen de Befehl allerdings ignoriert un Kopie devo öffentlich verbrännt. E Sprecher het gsait: “i bin nüt überrascht, i bin entüüscht, dass d'kanadischi Regierig üs wiider im Stich glo het. Säll isch e Sach vum Bund un het imene Provinzialgericht nüt z'sueche; die hen kei Gerichtsbarkeit; sii bruuche Gschichtsuntericht.”

D'Bsetzig

Am 20te April isch d'Situation eskaliert, wo d'Ontario-Pronvinz-Polizei i de Morgestunde 16 vo de Bsetzer verhaftet het un versuecht het s'Glände z'ruume. Allerdings isch bald e grössri Gruppe vo über 1.000 Irokese vum Reservat Six Nations, wo draa gränzt het, cho un het d'bisher chlyni Gruppe vo Bsetzer verstärkt. D'Polizei het sich wiider zruggzoge un d'Bsetzer hen ihri Blokade uf d'Autobahn, wo in dr Nähi gläge isch, usgwytet. D'Demonschtrante hen Autoreife i Brand gsetzt, e Wage vo dr Müllabfuehr uf dr Stross parkt un sunschtigi Barikade erichtet.

De ganze Daag über sin wyteri, zum Teil maskierti, Indianer bi de Barikade ytroffe; e Sprecher het gsait “d'Polizei het i e Biinenescht gstoche, jetz chömme d'Biine use”. Allen MacNaughton, e Mohawkhäuptling vum traditioneli Stammesrot, het sich für Verhandlige offe erchlärt: “Mer sin truurig un entüüscht vo dr Polizeiaktion... mer hen gmeint, dass e friidlichi Lösig zum Gryfe noch gsi isch. D'Protescht sin s'Resultat vo dr gringe Ufmerksamkeit un Reschpekt, wo de Besitzrecht vo de Ureiwohner zollt wird. D'Fruschtration isch legitim; d'Protescht sin d'Symptom, nüt dr Grund. Mer chontroliere d'Demonschtrante nüt. Mer üebe e Yfluss uf sii us aber des hängt do devo ab, ob mer sii überzüüge chönne, dass d'Uslöser vum Protescht beachtet werre. De Friide wider herzstelle isch jetz no wichtiger wie vorher".

Im wytere Verlauf vum Daag sin circa 300 Aawohner zu de Barikade marschiert un hen mit de Irokese Bschimpfige ustuuscht. D'Yheimischi hen sich sälber als Hauptgschädigti vo dr Bsetzig gsehne; ei Aawohner het zum Byspiil de Protescht als “Gsetzeslosigkeit vum Fynschte” bezeichnet.

Solidarität vo andri Mohawk

Am näggschte Daag hen Mohawk vum Kahnawaken Reservat churzzitig de Verchehr i Montreal lahm gleit. Für circa e halbi Stund isch dr Verchehr uf einere vo de wichtigschti Brugge vo Montreal ufghalte worre, während e Grupp vo Mohawk d'irokesischi Fahne uf dr Brugg ghisst het. Die Aktion het Angscht usglöst, wyl bi dr Oka Krise vo 1990 d'glychi Brugg scho emol für über zwee Monet bsetzt worre isch. E Sprecher het aber erchlärt “niemer i derre Gmein wot e zweits 1990, des werre mer uf jede Fall vermyde.”

E andri Gruppe het us Solidarität zwee Daag lang d'Hauptysebahnverbindig zwüsche Toronto un Montreal blockiert. Dodedurch isch dr Ysebahnverchehr zwüsche de Städt total zum Erliige cho. Au i Vancouver het e Gruppe vo Indianer us Solidarität demonschtriert.

Eskalation

Am 24. April isch es zunere üble Usenandersetzig cho. E Pöbel vo circa 500 wysi Bwohner vo Caledonia isch zu de Barikade marschiert, het d'Bsetzer bschimpft un verlangt, dass sii heimgönn. Andri Demonschtrante hen sogar d'Usruefig vum Chriegsrächt verlangt un ei Person het gseit, “wenn die Lüt do scho kei Kanadier sin no sin sii ebe dreckigi Terrorischte”. E gwalttätigi Usernandersetzig isch durch d'Polizei vermiide worre, wo d'Aawohner vo de Barikade fernghalte het. Ei Demonschtrant isch vur Polizei verhaftet worre. E Sprecher vo de Bsetzer het dezue gmeint: “wenn's um Indianer goht, no werre nüt numme d'Chämpfer verhaftet sundern jeder Indianer im Umkreis vonere Myle. Wenn des au nüt bringt, wird d'ganzi Gmein ygsperrt un dr Notstand usgruefe. Mer münn nüt emol öbis mache, s'längt scho wemmer uf üsri Gartestüehl sitze un grille. Mer sin immer verdächtig! Des, wo jetz passiert, erinnert üs a d'Lüt vo Chateaguay während dr Mohawk-Oka-Krise vo 1990. Do sin sii au am Rand vo Kahnawaken gsi, hen Unruhe gschtiftet, Stei nooch üs gschmisse un nooch dr kanadischi Armee gruefe, wo üs het solle zermalme.”

Am Obig hen sich d'Demonschtrante wiider verstreut un d'Sprecheri vo de Irokese het gmeint, dass de Pöbel nüt d'friidlichi Beziehige zwüsche de zwei Gmeine representiere tät: “Caledonia isch scho immer e gueter Noochber vo üs gsi, i cha sehne, dass es viil Fruschtration git, aber sii sin gueti Lüt, des cha mer nüt abschtryte.”

Am 25te April het d'Burgermeischteri vo Caledonia e Interview gä, wo sii gseit het, dass vor allem dr Ort vo dr Bsetzig wirtschaftlich betroffe sy, wyl d'Ywohner nüt regelmässig jede Monet Gäld erhalte. Dr Irokese hen de Vorwurf, dass sii alli Sozialhilfe erhalte täte, als Beleidigung ufgfasst un sii het de Vorwurf spöter zrugggnumme.

End un Ergebniss vo dr Bsetzig

Als Zeiche vo guetem Wille hen d'Irokese am 16te Mai aagfange ihri Barikade abzrüüme. Im Gägezug het d'Regierig vo Ontario am 20te Mai wytri Arbet ufem umschtritteni Gländ verbotte. Dr Bauunternehmer het dr Regierig dodrufhi vorgworfe, Militanz z'unterstütze. Dr Unterhändler vur Regierig het dodruf gantwortet, dass d'Situation vo Caledonia einzigartig sy un kei Präzedenzfall sot sy.

Am Morge vum 22te Mai hen d'irokesischi Bsetzer schliesslich d'Blokade ufghobe, allerdings sin sii vo mehreri duzend Yheimischi dra ghinderet worre s'Glände z'verlo. De ganze Daag über het's wüeschti Schlägereie gä zwüsche de Irokese un wysi Yheimischi, wo d'Polizeisperre durchbroche hen. Während em Nomittag hen d'Irokese schliesslich e chörperlichi Barierre bildet, e Teil vomene Strommast über d'Stross gleit un miteme Presslufthammer e Teil vur Stross ufgrisse. Usserdem hen ubechannti Vandale d'Stromversorgig vo Caledonia lahm gleit. Am näggschte Daag isch d'Barikade entgültig gruumt worre.

Am 4te Juni isch's wiider zu Usenandersetzige un Prügeleie cho, usglösst durch e Polizeiauto wo sich us Verseh ufem Reservat verirrt gha het. Am Obig hen sich beidi Gruppe allerdings wiider verstreut.

Zwüsche dr Regierig vo Ontario un d'Bundesregierig wird momentan über de wyteri Status vum umstritteni Land verhandlet. Dr gwählti Stammesrot het debi d'traditioneli Stammeshäupting als Verhandligsbefugti vo dr ganzi Gmeine annerchannt; des isch s'erschti Mol syt 1924, dass d'Bundesregierig d'Autorität vum traditionele Stammesrot annerchannt het.

Weblink (uf Änglisch)