Plaffeie
Plaffeie | |
---|---|
![]() | |
Basisdate | |
Staat: | Schwiiz |
Kanton: | Friburg (FR) |
Bezirk: | Sense |
BFS-Nr.: | 2299 |
Poschtleitzahl: | 1716 Plaffeien 1716 Oberschrot 1716 Schwarzsee 1719 Zumholz |
UN/LOCODE: | CH PFN |
Koordinate: | 588301 / 176731 |
Höchi: | 856 m ü. M. |
Flächi: | 66.59 km² |
Iiwohner: | 3619 (31. Dezämber 2022)[1] |
Website: | www.plaffeien.ch |
![]() Plaffeie | |
Charte | |
![]() |
Plaffeie (seislertütschi Ussprooch [ˌplɑˈfeɪ̯ə], amtlich Plaffeien, franzöösisch Planfayon, Patua ) isch di gröschti Gmiin im Seisebezirk vom Kanton Friburg i dr Schwiiz.
S Dorf Plaffeie, wo grad überem Rand vom Seisegraabe ligt, isch ufgnoo is Inventar vo de schützenswärte Ortsbilder vo dr Schwiiz.
Geografi[ändere | Quälltäxt bearbeite]
D Gmiin ligt im Oschde vom Kanton und chunnt a Kanton Bärn a. D Gmeind- und d Kantonsgränze sind i dr Seise. Bym Wiiler vo Zouhuus, wo zu Plaffeie ghört, chäme us de Bärge di Chauti Seisa ù di Waarmi Seisa zäme. S Taau vo de Warmi Seisa hiist im undere Tüu Seeschlund ù hed witer obe de Schwarzsee. Ganz hinder im Taau Muschereschlund giit a Fuesswääg über de Chänelpass uf Oberwil im bärnische Simmetaal übere.
De grösser Tüu vom Gmiinbann im Süde ligt i de Bärge vo de Voraupe, wo mee aus 2000 Meter hoi sy. De markantist isch d Chaiseregg (2185 m). Vo Plaffeie us giit a Bärgstrass übere Gurnigelpass uf Riggisbärg ù i z Gürbetaal.
Bym Schwarzsee chunt de Gmiinbann a d Gmiin Val-de-Charmey a, wo im Friburger Greyerzbezirk ligt. Grad a de Gmiingrenza isch as inderessants sprachlìchs Grenzgebiet zwüsche de Dütschschwiiz und de Wäutschschwiiz. Dütschi Fluernäme und settigi, wo vom Friburger Patua prägt si, vermüsche sich i där topografisch zümlich bewegti Bärglandschaft. De Name Wäütschi Ryppa im Beccaschlund vo Val-de-Charmey beziet sich uf d Sprachgrenza.
Nachpuurgmiine vo Plaffeie si Brünisried, Gǜfersch, Jùùn, Plassäub, Rächthaute, Taafersch ù Val-de-Charmey im Kanton Fryybùrg ù Boltigen, Guggisberg, Oberwil im Simmental im Kanton Bärn.
Gschicht[ändere | Quälltäxt bearbeite]
Plaffeie isch zum eerschte Mau gnamset choo im Jaar 1148.
Am 1. Jänner 2017 hei sech die ehemolige Friburger Gmeinde Zumholz und Oberschrot mid Plaffeie zämetoo.
Yywoner[ändere | Quälltäxt bearbeite]
Quela: Bundesamt für Statistik 2005[2]
Jaar | 1850 | 1860 | 1870 | 1880 | 1888 | 1900 | 1910 | 1920 |
Yywoner | 1720 | 1684 | 1708 | 1929 | 1871 | 1966 | 2243 | 2281 |
Jaar | 1930 | 1941 | 1950 | 1960 | 1970 | 1980 | 1990 | 2000 |
Yywoner | 2349 | 2502 | 2478 | 2320 | 2435 | 2401 | 2815 | 3403 |
De Uusländeraatèu isch 2010 by 5 % gläge.[3]
Religion[ändere | Quälltäxt bearbeite]
80,4 % vo de Yywoner si im Jaar 2000 römisch-katholisch gsii, 9,4 % evangelisch-reformiert.[3]
Spraach und Tialäkt[ändere | Quälltäxt bearbeite]
Bi de Vouchszelig 2000 hii va de 3403 Yywoner 93,6 % Tüütsch ùs Hùùptspraach aaggää, 2,3 % Franzöösisch ù 4,1 % anderi Spraache.[3]
De seislertüütsch Tialäkt vo Plaffeie ghöört zum Hööjschtalemannisch.
Weblink[ändere | Quälltäxt bearbeite]
![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Website vo dr Gmeind Plaffeie
- Peter F. Kopp: Plaffeien (Gemeinde). In: Historisches Lexikon vo dr Schwiiz.
- Video-Präsentation Plaffeie
Fuessnoote[ändere | Quälltäxt bearbeite]
- ↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023
- ↑ Bundesamt für Statistik: Eidgenössische Volkszählung 2000: Bevölkerungsentwicklung der Gemeinden 1850–2000. Bern 2005 (Online uf bfs.admin.ch (Site cha nüme abgrüeft wärde; Suche im Webarchiv) , Date im Aahang (Site cha nüme abgrüeft wärde; Suche im Webarchiv) )
- ↑ 3,0 3,1 3,2 Bundesamt für Statistik: Regionalporträts 2012: Kennzahlen aller Gemeinden (Site cha nüme abgrüeft wärde; Suche im Webarchiv) , Mai 2012