Arno Landerer

Dr Arno Landerer (* 2. Novämber 1950; † 27. Novämber 2019) isch e dytsche Räbbuur, Kommunalbolitiker un alemannische Dialäktdichter gsii.

Lääbe

Dr Landerer isch z Rootwiil im Chaiserstuel ufgwagse un het syner Läbdig in sym Haimetdorf as Räbbuur gschafft. Är het Winzer gleert un dr Maischter gmacht. Vu 1990 bis 2016 isch er Ufsichtsrot vum Chaiserstieler Winzerverain Rotwiil, vu 2002 bis 2016 isch er au Vorsitzer vum Ufsichtsrot gsii. Im Badische Wyybäuverband isch er langi johr Ortsobmann un stellverdrättende Beraichsvorsitzer gsii.

Näbe syre Arbet het er si in dr Gmai engaschiert. Vu 1980 bis zum Jänner 2019 isch er Mitglid vum Vogtsburger Gmairoot un vum Rootwiiler Ortschaftsrot gsii, vu 1992 bis Jänner 2019 isch er au Ortsvorsteher vu Rootwiil gsii, derzu vu 1989 bis 1994 zweete Stellverdrätter vum Vogtsburger Burgermaischter. Syt 2013 isch er Mitgliid un Ufsichtsrot vu dr Burgerenergygnosseschaft Solarpark Vogtsburg gsii. Wu anne 1973 Wyhl as Standort vun eme blante Chärnchraftwärch verchindet woren isch un si d Lyt am Chaiserstuel un in dr Region hän aafange dergege wehre, het si au dr Landerer as junge Mann gege des blant Chärnchraftwärch engaschiert.

Dernäbe isch dr Landerer au langi Johr aktiv gsii in dr Rootwiiler Verain. Vu 1969 bis 1974 isch er Vorsitzer vu dr Rootwiiler Landjuged gsii, är isch Grindigsmitglid un Ehresitzigsbresidänbt vum Rootwiiler Bfauerot gsii un vu 1986 bis 1990 Vorsitzer vu dr Krabbelstube Oberrotweil un au Grindigsvorsitzer vum Haimet- un Gschichtsverain.

Wänn er Wyybroobe gmacht het, het er do als Gedicht un Gschichte rund um dr Wyy vordrait, mänkmol au aigeni Gedicht un Gschichte, wun er im Chaiserstieler Dialäkt gschribe het.

Weblink

• dr Arno Landerer uf dr Websyte vum Harald Noth
• Gerold Zink: Der Kaiserstuhl trauert um Arno Landerer, eines der markantesten Gesichter der Region, Badische Zeitung, 28. Novämber 2019
• Herbert Trogus: Arno Landerer aus Ortschafts- und Gemeinderat verabschiedet, Badische Zeitung, 30. Jänner 2019