Willy Loretan

dr Willy Loretan

Dr Willy Loretan (* 15. Juuni 1934 z Baasel; Buurger vu Zofige un Leiggerbad; † 22. Februar 2026) isch e Schwyzer Bolitiker (FDP) gsii. Är het dr Kanton Aargau im Nazionaalroot un au im Ständroot verdrätte.

Lääbe

Dr Willy Loretan isch e Suun vum Werner Loretan, eme Boschtverwalter vu Zofige, un dr Lisa Loretan geb. Wacker gsii. Är isch uf di Alt Kantoonsschuel Aarau gange un het druf vu 1950 bis 1954 Räächt an dr Uniweriteete Lausanne un Züri studiert. In syre Stuudiezyt isch er Mitgliid im Schwyzerische Zofigerverain woore. In dr Schwyzer Armee het er dr Rang vun eme Ooberscht ghaa. Anne 1961 het er zum Dr. iur. bromewiert, derno het er as Griichtsschryyber am Beziirksgriicht Zofige gschafft. Anne 1964 het dr Loretan s Räächtsaawaltsbatänt iiberchuu un isch zur aargauische Kantoonsverwaltig gwägslet, wun er im Böudepartmänt as juristische Adjunkt gschafft het. Vu 1966 bis 1973 het er s Zofiger Beziirksgriicht bresidiert.

Di bolitisch Karrieere vum Loretan het 1966 aagfange mit dr Waal in Yywoonerroot vu Zofige. Vu 1969 bis 1981 het er em Groosse Root vum Kanton Aargau aagheert, wun er Frakzioonsbresidänt vu dr FDP gsii isch. Vu 1974 bis 1992 isch er Stadtammann vu Zofige gsii. 1979 isch er in Nazionaalroot gweelt woore, 1991 derno in Ständroot. Aacht Joor speeter het er si us dr Bolitik zruggzooge. Dr Loretan het vu 1982 bis 1992 d Schwyzerisch Stiftig fir Landschaftsschutz bresidiert, vu 1996 bis 2001 dr Schwyzerisch Ziviilschutzverband.

Im Februar 2026 het er im Alter vu 91 Joor d Auge fir immer zuegmacht.

Weblink

 Commons: Willy Loretan – Sammlig vo Multimediadateie

• Willy Loretan uf dr Websyte vo dr Bundesversammlig
• Sarah Brian Scherer: Loretan, Willy.. In: Historisches Lexikon vo dr Schwiiz.
• Zeitgeschichte Aargau: Gespräch mit Willy Loretan, 8. Oktober 2020

Fueßnote

Dä Artikel basiert uff ere fräie Übersetzig vu dere Version vum Artikel „Willy_Loretan“ vu de dütsche Wikipedia. E Liste vu de Autore un Versione isch do z finde.