Théo Bernhardt

dr Théo Bernardt ànna 2024

Dialäkt: Mìlhüüserdiitsch

Dr Théo Bernhardt (ìm Frànzeescha sààgt m’r [teo bɛʁnaʁt] üss; * 29. Jüüni 2000 z’ Angers, Pays de la Loire) ìsch a frànzeescher Politiker vu dr Pàrtäi Rassemblement National (RN). Ar ìsch zitter 2024 Àbg’oordnet’r üss’m Unt’relsàss ìn dr Nàzionààlversàmmlung.

sii Laawa un Kàrriar

Dr Bernhardt ìsch zwààr bii siinera Geburtsschtàdt Angers ìn Wäschtfrànkrììch uffg’wàcksa, àwwer siina Äältra un Fàmìlia schtàmma üss Süfflum un Gundershoffa ìm Unterelsàss. Dr Bernhardt hàt ànna 2024 àn dr Täcknischa Üniwärsiteetsìnschtitüüt Louis-Pasteur z’ Schìliga a Maischterpriafung ìm Fàch Biomediziinischa Forschung b’schtànda. Ànna 2020 hàt’r àn da Kültüürschpììla Les Douze Coups de midi un Tout le monde veut prendre sa place àm Farnsah mìtg’màcht.

Dr Bernhardt ìsch mìt 18 Mìtglììd vu dr rachtsextreema Pàrtäi Rassemblement National (RN) worra, dänn’r hàt dr Marine Le Pen ìhra „soziààla Liinia“ b’sunderscht g’meegt. Bii da Pàrlàmantswààhl ànna 2022 ìsch’r ìm 3. Wààhlkrais vum Unt’relsàss zem Schtällvertratter g’wäählt worra. Àn dr Pàrlàmantswààhl ànna 2024 ìsch’r Schpìtzakàndidààt ìm 8. Wààhlkrais vum Unt’relsàss gsìì. Ar hàt àn dr äärschta Wààhlrunda 44,16 Prozant vu da Schtìmma bikumma, un àn dr zwaita Wààhlrunda hàt’r 51,44 Prozant vu da Schtìmma bikumma un domìt d’ friahjera Àbg’oordneta Stéphanie Kochert g’schlààga. Ar ìsch domìt dr äärschta RN-Àbg’oordnet’r, wo zitter 1986 ìm Elsàss g’wählt worra-n-ìsch. D’ lokààla Zittschrìft Rue89 Strasbourg hàt unterschtrììcha, àss vììla Iiwoohner dàs Resültààt nìt vorg’sah g’hàà hann, dänn s’ Gebiat ìsch ziamlig sìcher un wìrtschàftlig g’sund.

Àm 5. Àwrìl 2025 ìsch dr Bernhardt zamma mìt’m Biig’oordnet Jean-François Delanoue z’ Raimerschwiller kumma ku d’ Làndwìrtschàft äntdäcka. Àm 7. Mai 2025 hàt dr Bernhardt ìn’ra Mìttailung g’schrììwa, àss äbber z’ Waissaburisch un Àltaschtàdt „Toisiga“ Blatter vertailt hàt, fìr dr Islàm loowa — ìn dr Tààt sìnn vììl weeniger Blatter gsìì, un d’ Schàndàrma hann g’sajt, àss dàs nìt schtroofbààr ìsch. Jedoch hàt dr Bernhardt ìn dr Nàzionààlversàmmlung vor’m Premiarminìschter François Bayrou d’rìwwer g’rädd un hàt d’ Moslämbriader verpaitscht.

Ìm Àuigscht 2025 hàt d’ G’sällschàft Souvenir Français z’ Morschbrunn a Ààdànka orgànisiart, fìr d’ Soldààta vu dr Schlàcht bii Werth ìm Diitsch-Frànzeescha Kriag eehra. Doo hàt dr Verainverwàntwortlig Benoît Sigrist vor dr politischa Hàss so wia vor Fàschìschmus un Ràssìschmus g’wàrnt, wo „hìtt z’ruckkumma“ solla. Dr Bernhard hàt geega’na bii da Schàndàrma z’ Sulz unter’m Wàld a Klààg iig’rìchta, dänn’r hàt daa Wort àls a Verlöimdung geega d’RN-Pàrtäi ààg’lüagt — ar hàt g’sajt, àss m’r daa Wort „nìt ààg’numma soll“. Dr Klààg ìsch jedoch ohna Folga iig’schtällt worra. Waaga daara Polemik hàt dr Gen’rààlvertratter vum Verain Fabrice Jaouën sìch vor’m Bernhardt äntschuldigt, un d’ delegiarta Minìschtera fìr d’ Veterààna Patricia Mirallès hàt sogààr em Bernardt a Briaf g’sanda un hàt ärrìnnert, àss d’Ààdànka „politisch nöitrààl“ bliiwa solla. D’ lokààla Àbtailung vum Souvenir Français iig’schtällt worra, un dr Sigrist ìsch zittawiis z’rucktratta. Àui d’ unterelsassischa Àbg’oordneta Thierry Sother un Charles Sitzenstuhl hann dr Sigrist unterschtìtzt.

Àm 5. Jüüli 2025 ìsch dr Bernhardt z’ Merzwiller bii’ra Demonschtràzioon geega d’ Schliassung vum Wark De Dietrich-BDR Thermea d’rbii gsìì — s’ Wark ìsch ìn d’ Tìrkäi un d’ Slowàkäi verlààgert worra. Ar ìsch sogààr ufftratta, fìr a Reed vor da Hunderta Demonschtrànta hàlta. D’ Litt sìnn d’ruff nìt g’fàsst gsìì, un d’ Lìnks-G’warkschàfta hann sìch d’rgeega ämpeert un hann sogààr s’ Ordnungsdianscht vum Àbg’oordnet fànga-n-àà schlààga. Ainiga Demonschtrànta sìnn vu dr Polizäi verhàfta worra. Àn dr Demonschtràzioon sìnn àui d’ Àbg’oordneta Sandra Regol un Emmanuel Fernandes d’rbii gsìì.

Dr Bernhardt maint, àss s’ Elsàss rüss vum Groossa-n-Oschta soll.

Lìteràtüür ìwwer’na

• V.KO.: Législatives. Alsace du Nord : Théo Bernhardt, candidat du Rassemblement national. In: Dernières Nouvelles d’Alsace. 26. Juni 2024 (französisch, dna.fr [abgerufen am 11. Januar 2026]). 
• Véronique Kohler: Fraîchement diplômé, déjà député : Théo Bernhardt, le seul élu RN en Alsace. In: Dernières Nouvelles d’Alsace. 8. Juli 2024 (französisch, dna.fr [abgerufen am 11. Januar 2026] àui bii L’Alsace z’ laasa). 

Weblìnks

 Commons: Théo Bernhardt – Sammlig vo Multimediadateie

• dr Théo Bernhardt ìn dr Àbg’oordneta-Dààtabànk vum Rassemblement National (frànzeesch)
• dr Théo Bernhardt ìn dr Àbg’oordneta-Dààtabànk vu dr Nàzionààlversàmmlung (frànzeesch)
• dr Théo Bernhardt ìn dr Base Sycomore vu dr Nàzionààlversàmmlung (frànzeesch)
• dr Théo Bernhardt ìn dr datan-Dààtabànk vu dr Nàzionààlversàmmlung (frànzeesch)
• dr Théo Bernhardt bii dr Haute Autorité pour la Transparence de la Vie Publique (frànzeesch)
• dr Théo Bernhardt ìn dr Àbg’oordneta Dààtabànk vu Politique & Animaux (frànzeesch)