Sonia Seneviratne

d Sonia I. Seneviratne (2015)

D Sonia Isabelle Seneviratne (* 5. Juuni 1974 z Lausanne) ischt e Schwyzer Kliimawisseschaftleri. Si isch syter 2016 oordeligi Brofässeri fir Land-Kliima-Dinaamik an dr ETH Züri un syt Juuli 2023 im Voorstand vum Wältkliimaroot (Intergovernmental Panel on Climate Change, IPCC) verdrätte.

Lääbe

D Seneviratne het anne 1992 d Matura Typ B un au ire Baccalauréat Vaudois am Gymnase cantonal de Chamblandes z Pully gmacht. Derno het si vu 1992 bis 1995 Biology an dr Uniwersiteet Lausanne un vu 1995 bis 1999 Umwältfisik an dr ETH Züri studiert. An dr ETH het si vu 1999 bis 2002 au ire Bromozioonsstuudium gmacht. No ire Bromozioon isch si vu 2003 bis 2004 Visiting Research Associate am Goddard Space Flight Center vu dr NASA gsii. 2005 isch d Seneviratne an d ETH Züri retuurcuu un isch deert Ooberassischtänti woore. Dää Poschte het si bis 2007 ghaa, wu si Assischtänzbrofässeri wooren isch, was si bis 2012 bliiben isch. Vu 2013 bis 2016 isch si usseroordeligi Brofässeri gsii. Anne 2016 isch si zur oordelige Brofässeri gruefe woore.

Anne 2013 isch si Fellow vu dr American Geophysical Union woore, wu ire im nämlige Joor d James B. Macelwane Medal verliie het. Fir 2021 isch ere d Hans-Oeschger-Medaille vu dr European Geosciences Union zuegsproche woore. Anne 2023 het si vu dr Uniwersiteet Utrecht dr Eeredoktertitel iiberchuu.

Ire h-Index isch per Februar 2022 bi 94 glääge. Im ämlige Joor isch si in d Jury vum Green Pardo WWF bim 75. Filmfeschtiwäl vu Locarno gruefe woore. 2025 isch ere fir iri baanbrächende Stuudie zue de „Wechselwirkungen zwischen Bodenfeuchte, Vegetation und Atmosphäre“ dr Umwältbryys vu dr Bundesstiftig Umwält zuegsproche woore.

D Seneviratne isch ghyroote un het zwai Chinder. Näb em Schwyzer Buurgerräächt het si au d Staatsbuurgerschaft vu Sri Lanka.

Foorschig

D Seneviratne foorscht as Brofässeri fir Land-Kliima Dinaamik an dr ETH Züri zue Kliimaextreem, Land-Kliima-Brozäss un Kliimaveränderige. Si isch e wältwyt anerkännti Kliimafoorscheri, wu uf d Untersuechig vu Extreemeraignis wie Hitzewälle un Deerene spezialisiert isch. Iri Foorschige zaige ne drastische Aastiig vu dr Hyfigkait un Intänsiteet vu extreeme Wättereraignis, wie di rekordverdächtige Hitzewälle z Noordamerika, dur dr Kliimawandel, un heebe d Schlisselroll vu dr Vegetazioon in dr Kliimaregulazioon fiiri. Si engadschiert si au fir d Ufkleerig vu dr Effetligkait un bresäntiert wisseschaftligi Erkänntnis in Griichtsbrozäss go bolitischi un gsellschaftligi Veränderig im Umgang mit em Kliimawandel feerdere.

D Seneviratne het wiichtigi Byydreeg zue IPCC-Beriicht glaischtet un isch zur Vizevoorsitzeri vu dr Aarbetsgruppe 1 vum Wältkliimaroot gweelt woore, wu si d Zämmefassige fir bolitischi Entschaidigsdreeger*ne mitgstaltet. Si isch aini vu dr Verfasser*ne vum Sunderberiicht 1,5 °C globaali Ufweermig vum IPCC (2018). un isch bim Segste Sachstandsberiicht vum IPCC aini vu dr baide koordinierende Laitautor*ne vum Kapitel „Weather and climate extreme events in a changing climate“ gsii. Im Juuli 2023 isch si in Voorstand vum Wöltkliimaroot gweelt woore.

Uusglääseni Schrifte

• Lukas Gudmundsson et al.: Globally observed trends in mean and extreme river flow attributed to climate change. In: Science. Band 371, Nr. 6534, 2021, S. 1159–1162, doi:10.1126/science.aba3996. 
• Sonia I. Seneviratne et al.: The many possible climates from the Paris Agreement’s aim of 1.5 °C warming. In: Nature. Band 558, 2018, S. 41–49, doi:10.1038/s41586-018-0181-4. 
• Jakob Zscheischler et al.: Future climate risk from compound events. In: Nature Climate Change. Band 8, 2018, S. 469–477, doi:10.1038/s41558-018-0156-3. 
• Sonia I. Seneviratne et al.: Allowable CO2 emissions based on regional and impact-related climate targets. In: Nature. Band 529, 2016, S. 477–483, doi:10.1038/nature16542. 
• Sonia I. Seneviratne et al.: No pause in the increase of hot temperature extremes. In: Nature Climate Change. Band 4, 2014, S. 161–163, doi:10.1038/nclimate2145. 
• M. Reichstein et al.: Climate extremes and the carbon cycle. In: Nature. Band 500, Nr. 7462, 2013, S. 287, doi:10.1038/nature12350
• S. I. Seneviratne et al.: Investigating soil moisture–climate interactions in a changing climate: A review. In: Earth-Science Reviews. Band 99, Nr. 3–4, 2010, S. 125–161, doi:10.1016/j.earscirev.2010.02.004
• S. I. Seneviratne et al.: Land–atmosphere coupling and climate change in Europe. In: Nature. Band 443, Nr. 7108, 2006, S. 205, doi:10.1038/nature05095

Weblink

 Commons: Sonia Seneviratne – Sammlig vo Multimediadateie

• Curriculum Vitae, Internetseite der ETH Zürich (PDF, englisch)
• Die brillante Forscherin, die nichts von ihrer Genialität weiss: Beitrag auf SWI swissinfo.ch, 9. August 2021

Fueßnote

Dä Artikel basiert uff ere fräie Übersetzig vu dere Version vum Artikel „Sonia_Seneviratne“ vu de dütsche Wikipedia. E Liste vu de Autore un Versione isch do z finde.