Sibylle Canonica

d Sibylle Canonica (2014)

Sibylle Canonica (* 26. April 1957 z Bärn) isch e Schwyzer Schauspiileri.

Lääbe

D Canonica isch chuurz vor dr Matura ab em Gimnaasium gange, go an dr Zürcher Chunschtakademy Fotografy studiere un am Zürcher Schauspiilhuus as Statischti schaffe. Noch eme Joor isch si an d Folkwangschuel z Essen gange un het deert vu 1976 bis 1979 Schauspiil studiert.

In dr Saison 1978/79 het si ne Gaschtengaschmänt am Theater vu dr Stadt Essen ghaa un vu 1979 bis 1981 en eerscht fescht Engaschmänt am Staatstheater Oldenburg. Vu 1981 bis 1984 isch si Mitgliid vum Ensemble vum Wiirtebäärgische Staatstheater Stuegert gsii. Deert het si unter anderem d Elisabeth in s Schillers Maria Stuart, d Putzi in Wer hat Angst vor Virginia Woolf? vum Edward Albees (Reschy: Thomas Schulte-Michels) im d Nina in Die Möwe vum Anton Tschechow (Reschy: Günter Krämer) gspiilt.

Anne 1985 isch si an d Münchner Kammerspiele chuu, wu si unter anderem d Eve in Der zerbrochne Krug vum Heinrich vin Kleist (Reschy: Dieter Dorn), 1987 d Aricia in Phädra vum Jean Racine (Reschy: Alexander Lang), d Titelroll in s Goethes Stella (Reschy: Thomas Langhoff), 1994 d Mitzi in Der Drang (Franz Xaver Kroetz), s Fräulein Rasch im Monodrama Wunschkonzert (Täxt un Reschy: Franz Xaver Kroetz) un 1996 d Pallas Athene in Ithaka vum Botho Strauß (Reschy: Dieter Dorn).

Iber d Joor het si Stuggverdreeg am Düsseldorfer Schauspiilhuus, bi de Breagazer Feschtspiil (1984 d Bolette in Die Frau vom Meer vum Henrik Ibsen, Reschy: Thomas Schulte-Michels), an de Staatlige Schauspiilbiine Berlin, bi de Salzburger Feschtspiil (1985 d Doña Proëza in Der seidene Schuh vum Paul Claudel, Reschy: Hans Lietzau; 1986 d Eve in Der zerbrochne Krug vum Heinrich von Kleist, Reschy: Dieter Dorn; 1990 d Eleonore in Die Jüdin von Toledo vum Franzu Grillparzer, Reschy: Thomas Langhoff) un au an de Wiener Feschtwuche ghaa.

Anne 2001 isch si mit em Dieter Dorn vu de Münchner Kammerspiele ans Bayerische Staatsschauspiill gange.

D Canonica het in verschiidene Film un Fäärnseerolle gspiilt. Unter anderem het si in Jenseits der Stille vu dr Caroline Link gspiilt, wu fir e Oscar nominiert wooren isch. 1999 het si im Film Die Braut vum Egon Günther d Charlotte von Stein gspiilt. 2002 isch si fir d ‚Roll vu dr Bella Martha as Beschti Daarstelleri fir dr Schwyzer Filmbryys nominiert woore, im nämlige Joor het mer si in dr glyychnamige Verfilmig vum autobiograafische Romaan Wer liebt, hat Recht vu dr Schriftstelleri Anita Lenz an dr Syte vu dr Iris Berben un em Robert Atzorn chenne sää. Anne 2006 het si di bees Häx im Määrlifilm Hänsel und Gretel vu dr Anne Wild gspiilt. 2009 isch si näb em Henry Hübchen un em Burghart Klaußner fir dr Kinofilm Alter und Schönheit vor dr Kamera gstande, wu si s eemoolig Gspuusi vum doodchranke Schauspiiler Manni gspiilt het. Im Zweedailer Entführt vum Matti Geschonneck het me si im nämlige Joor as Frau vum Induschtriälle Targensee chenne sää. In de Verfilmige vu dr Romään Rubinrot (2013) un Saphirblau (2014) us dr Buechraie Liebe geht durch alle Zeiten vu dr Kerstin Gier het si d Glenda Montrose gspiilt. In dr Filmkumeedi Die Goldfische vu 2019 het me si in dr Nääberoll as Saphira chenne sää.

Si het au als Gaschtrolle in Krimiseerie ibernuu wie Der letzte Zeuge, Der Alte, Stolberg, Der Kriminalist un Tatort.

D Sibylle Canonica isch Mitgliid vu dr Dytsche Filmakademy.

Uusglääseni Filmografy

• 1988: Wallers letzter Gang
• 1990: Der zerbrochne Krug
• 1990: Neuner
• 1995: Nach Fünf im Urwald
• 1996: Jenseits der Stille
• 1998: Der Campus
• 1998: Fette Welt
• 1999: DDie Braut
• 2001: Bella Martha
• 2001: Julietta – Es ist nicht wie du denkst
• 2002: Wer liebt, hat Recht
• 2003: Himmel, Polt und Hölle
• 2005: Tatort: Nur ein Spiel (Fäärnseeraie)
• 2006: Hänsel und Gretel
• 2008–2017: Der Alte (Fäärnseeseerie, 6 Folge)
• 2008: Bella Block: Falsche Liebe (Fäärnseeraie)
• 2009: Alter und Schönheit
• 2009: Entführt
• 2009: Erntedank. Ein Allgäu-Krimi (Fäärnseefilm)
• 2009: Liebe und andere Gefahren (Fäärnseefilm)
• 2011: Tatort: Borowski und die Frau am Fenster
• 2011: Bastard
• 2011: Hotel Lux
• 2013: Rubinrot
• 2013: Alaska Johansson (Fäärnseefilm)
• 2014: Kommissar Dupin: Bretonische Verhältnisse
• 2014: Saphirblau
• 2015: Tatort: Château Mort
• 2015: Rosamunde Pilcher: Liebe, Diebe, Diamanten
• 2016: Tatort: Das Recht, sich zu sorgen
• 2016: Ein starkes Team: Geplatzte Träume
• 2018: Tatort: Die Musik stirbt zuletzt
• 2018: Bella Germania
• 2019: Die Goldfische
• 2019: Sohn meines Vaters
• 2019: Harter Brocken: Der Geheimcode
• 2020: Oktoberfest 1900 (Fäärnseeseerie)
• 2021: Faltenfrei (Fäärnseefilm)
• 2022: Der Pass (Fäärnseeseerie)
• 2023: Sisi & Ich
• 2024: Tatort: Unter Gärtnern (Fäärnseeraie)
• 2025: Ein Mädchen namens Willow

Heerspiil

• 2014: Christian Wittmann/Georg Zeitblom: Die Existenz der Haut. Reschy: Christian Wittmann/Georg Zeitblom (Heerspiil – DKultur)

Uuszaichnige

• 1983: Schauspiileri vim Joor viu dr Zytschrift "Theater heute" fir d Roll vu dr Putzi
• 1985: Feerderbryys fir Daarstellendi Chunscht vu dr Berliner Akademy vu dr Chinscht
• 2002: Nominierig Schwyzer Filmbryys as Beschti Daarstelleri fir Bella Martha
• 2008: Kurt-Meisel-Bryys]
• 2014: Bayerische Maximiliansoorde fir Wisseschaft un Chunscht
• 2022: Bayerischi Staatsschauspiileri

Literatuur

• Judith Niethammer: Sibylle Canonica. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 337 f.
• C. Bernd Sucher (Hrsg.): Theaterlexikon. Autoren, Regisseure, Schauspieler, Dramaturgen, Bühnenbildner, Kritiker. Von Christine Dössel und Marietta Piekenbrock unter Mitwirkung von Jean-Claude Kuner und C. Bernd Sucher. 1995, 2. Auflage, Deutscher Taschenbuch Verlag, München 1999, ISBN 3-423-03322-3, S. 106 f.

Weblink

 Commons: Sibylle Canonica – Sammlig vo Multimediadateie

• Sibylle Canonica in dr Internet Movie Database
• Sibylle Canonica bi filmportal.de
• Sibylle Canonica bi crew united
• Sibylle Canonica bi swissfilms.ch
• d Sibylle Canonica bi dr Agäntuur Schneider