Schloss Nöieburg

s Schloss Nöieburg mit dr gotische Chile

S Schloss Nöieburg isch e Zitadelle über dr Stadt Nöieburg i dr Schwiiz.

Am Ändi vom zähte Joorhundert isch uf em Hoger am Jurasüdfuess über em Nöieburgersee e Burg bout worde, wo spööter au dr Stadt und em Kanton Nöieburg dr Name ggä het. Uf däm chlyne Bärg het’s es Platoo, wo uf drüü Syte vo stotzige Felswänd oder steile Häng umgää isch.

Die befeschtigti Sidlig isch scho im 11. Joorhundert als novum castellum und derno au als novum castrum i de Kwelle erwäänt. I dr frankoprovenzalische Sprooch vo dr Gägend het das Nuefchastel gheisse, und do druus isch mit dr Zyt dr hüttig Name Neuchâtel worde. Im Dütsche het me Nienburg, Nuvenburch oder Nuewenburg gschribe; sid em 18. Joorhundert denn au Schloss Neuenburg.

Dr Burgbezirk isch von ere Muur umgää gsi, wo me hütt no Räschte drvo gseht. Uf dr Oschtsyte, grad über em alte Stadtzäntrum, stoot dr Palascht vo de Burgherre; die eltischte Deili drvo sind dr Tessebärgerdurm und dr romanisch Südflügel. Zmitz uf em Platz vom Schloss isch di grossi Chilche, d Collégiale oder Stiftschile mit em berüemte, gootische Grabdänkmol vo de Grafe vo Nöieburg.

Vom 11. bis zum 14. Joorhundert händ d Grafe vo Nöieburg uf dr Burg gwoont. Derno het si andere Familene usem Burgund und denn de Grafe vo Frybeg ghört. Vo 1707 bis 1848 het i m Schloss dr Statthalter vom König vo Pröisse und dr Staatsroot vom Fürschtetum Nöieburg residiert.

Wo noch em Nöieburgerhandel dr Schwiizer Kanton Nöieburg äntlech e sicheri Stellig gha het, isch im Schloss d Kantonsregierig yzoge.

• 
  s Modäll vom Schloss Nöieburg im Park Swissmiature z Melide im Tessin

Weblink

 Commons: Schloss Nöieburg – Sammlig vo Multimediadateie

• Schloss Nöieburg