Pierre Dubois (Politiker, 1938)

Dr Pierre-Gilles Dubois (* 22. Oktoober 1938 z Peseux, Kanton Nöueburg; † 9. Juuni 2025) isch e Schwyzer Bolitiker (SP) gsii. Är isch unter anderem vier Mool (1982 bis 1983, 1987 bis 1988, 1991 bis 1992 un 1995 bis 1996) Bresidänt vum Staatsroot vum Kanton Nöueburg gsii.

Lääbe

Dr Pierre Dubois isch no dr Schuele z Peseux un z Nöueburg uf d Handelsschuel Nöueburg gange un het no dr Handelsmatura e Stuudium vu dr Wiirtschaftswisseschafte an dr Uniwersiteet Nöueburg aagfange. Noch em Abschluss isch er 1966 sälber Leerer fir Wiirtschaftswisseschafte an dr Handelsschuel Nöueburg woore. In dr Zyt vum Stuudium isch er zeerscht Mitgliid vu dr Soziaaldemokraatische Bartei vu dr Schwyz (SP) un druf zwische 1958 un 1962 Mitgliid vu dr Neie Sozialistische Linke woore, derno isch er wiider Mitgliid vu dr SP woore. Zwische 1966 un 1968 isch er Mitgliid vum Generaalroot, em Gmaibarlemänt vu Nöueburg gsii un deert vu 1972 bis 1975 Bresidänt vu dr SP-Frakzioon un zwische 1975 un 1980 Bresidänt vu dr SP vu dr Stadt Nöueburg. Glyychzytig het er au vu 1973 bis 1980 em Grooße Root, em Barlemänt vum Kanton Nöueburg, as Mitgliid aagheert.

Am 15. Juuni 1980 isch dr Dubois Mitgliid vum Staatsroot vum Kanton Nöueburg, dr Regierig vum Kanton, woore un het sällere bis zum 19. Mai 1997 aagheert. Är isch vu 1980 bis 1997 em Departmänt fir effetligi Wiirtschaft un zwische 1980 un 1993 au em Juschtizdepartmänt voorgstande. As Voorstand vum Departmänt fir effetligi Wiirtschaft het er mieße grooí Umstrukturierige umsetze, vor allem no d Kunkiirs vu dr Unternäme Favag z Nöueburg, Edouard Dubied & Cie z Couvet, dr Chaabelfabrik Cortaillod un dr Eefe Borel z Peseux. Mit ere neie Wiirtschaftsfeerderigsstruktuur het me s gschafft, ass si neii Unternäme aagsiidlet hän.

In syre Mitgliidschaft im Staatsroot het er vier Mool as Bresidänt un doodermit as Voorstand vu dr Kantonsregierig fungiert. As Noofolger vum André Brandt isch er am 1. Juuni 1982 zum eerschte Mool Bresidänt vum Staatsroot woore un het des Amt bis zum 31. Mai 1983 ghaa, wuun er vum Jacques Béguin abgleest wooren isch. Vum André Brandt het am 1. Juuni 1987 wiider dr Poschte vum Voorstand vu dr Kantonsregierig ibernuu un het en bis zue syyre Ableesig dur dr Jean-Claude Jaggi am 1. Juuni 1988 bhalte. Am 1. Juuni 1991 het er dr Francis Matthey as Bresidänt vum Staatsroot abgleest un het s Amt bis zum 31. Mai 1992 ghaa, dr Michel von Wyss isch druf sy Noofolger woore. Zletscht isch er as Noofolger vum Pierre Hirschy am 1. Juuni 1995 zum vierte Mool Voorstand vu dr Kantonsregierig woore bis zue syre Ableesig dur dr Maurice Jacot am 1. Juuni 1996. As Bresidänt vu dr Interprofession du Gruyère het er bis 2011 derfir kämpft, ass dr Greyerzer di kuntrelliert Uursprungsbezaichnig AOC (Appellation d’Origine Contrôlée) kriegt.

Im Juuni 2025 isch dr Pierre Dubois im Alter vu 86 Joor gstoorbe.

Fueßnote

Dä Artikel basiert uff ere fräie Übersetzig vu dere Version vum Artikel „Pierre_Dubois_(Politiker,_1938)“ vu de dütsche Wikipedia. E Liste vu de Autore un Versione isch do z finde.