Philipp Matthias Bregy
| Dialäkt: Wallisertitsch |
.jpg)
Der Philipp Matthias Bregy (* 7. Juli 1978 z Visp im Kanton Wallis; Heimateerter sind Naatersch und Turtma) isch en Schwizer Politiker (D Mitti, friener CVP).
Läbu
[ändere | Quälltäxt bearbeite]Der Bregy isch am 7. Juli 1978 z Visp als Botsch vaner Ursula Bregy (geb. Kreuzer) und dum Edelbert W. Bregy uf d Wäält cho. Är het ei Brüeder.[1]
Va 1985 bis 1993 het der Bregy di Primaar- und Sekundaarschüel z Natersch gipsüecht. Dernaa isch er bis 1998 am Kollegium Spiritus Sanctus z Brig, wan er 1988 d Matura (Typus C) het abgschlossu. Va 1998 bis 2004 het er Rächtswissuschafte aner Universität Bääru studiert und 2004 mit dum Master of Law abgschlossu.
Der Bregy ist verheiratute und het zwei Chind. Im Militeer isch er Fachoffizier (mit dum Rang Major) gsi.
Politik
[ändere | Quälltäxt bearbeite]Im Jaar 2013 isch der Bregy inu Gmeiraat va Natersch gwäälte cho und isch bis 2019 Mitglid vam Natischer Gmeiraat gsi. Va 2009 bis 2018 ischer Mitglid vam Walliser Grossu Raat gsi und isch da Fraktioonschef vaner CVP Oberwallis und Presidänt vaner Gschäftspriefigs- und Juschtizkommissioo gsi. Naadem dass d Viola Amherd inu Bundesrat gwäälti isch cho, het er am 4. März 2019 irusch Platz im Nationalrat ignu. Am 20. Oktober 2019 het der Bregy z eerscht Maal d Widerwaal als Nationalrat gschafft. Biner zweitu Widerwaal am 22. Oktober 2023 het der Bregy mit 28'872 Stimme das zweitbescht Walliser Resultaat erziilt.[2]
Är isch sit 2019 Mitglid vaner Rächtskommissioo (RK-N) und sit 2023 Mitglid vaner Kommissioo fer Wirtschaft und Abgaabe (WAK-N). Va 2019 bis 2023 isch der Bregy Mitglid vaner Kommissioo fer Färnmäldewäsu und Vercheer (KFV-N) gsi und Stellverträter iner Immunitäätskommissioo (IK-N). Sit 2020 isch der Bregy züesätzli Mitglid vam Fraktioonsvorstand vaner Mitti-Fraktioo. Naadem dass d Fraktioonspresidänti, d Andrea Gmür-Schönenberger, im März 2021 irusch Rücktritt per Ändi April bekannt gigä het, het er fer d Naachfolg kandidiert. Am 21. Mai 2021 isch er im Raamu vaner oordentlichu Fraktioonssitzig gwäälte cho.[3][4] Am 25. November 2023 isch der Bregy eistimmig als Fraktioonspresidänt bistäätigte cho.[5]
Der Bregy isch Zentraalpresidänt va REDOG Schweizerischer Verein für Such- und Rettungshunde, är isch Vorstandsmitglid va HEV Schweiz und Presidänt vam Walliser Gwerbverband.
Prüef
[ändere | Quälltäxt bearbeite]Va Prüef isch der Bregy Rächtsawalt. Är isch Partner va rieder.pfammatter.bregy – Rechtsanwalts- und Notariatskanzlei z Brig. Eine vanu Kanzliipartner isch der Beat Rieder, äbufalls en Schwizer Politiker.[6] Är het öi nu verschiduni Verwaaltigsratsmandaat, unner annrum bi du Belalp Bahnen AG, der naturenergie AG und der EnAlpin AG.
Weblinks
[ändere | Quälltäxt bearbeite]- Philipp Matthias Bregy uf dr Websyte vo dr Bundesversammlig
- Websita vam Philipp Matthias Bregy
Quälle
[ändere | Quälltäxt bearbeite]- ↑ Rebecca Schüpfer: Wie ist das, wenn man rennt und weiss, dass man nicht gewinnen kann? Ein Porträt. In: Story. Pomona Media, 26. November 2024, abgruefen am 28. November 2024.
- ↑ Wahlsonntag mit Philipp Matthias Bregy: Unterwegs nach Bern, Medienmarathon und grosse Emotionen. In: Canal9. 24. Oktober 2023, abgruefen am 26. November 2023.
- ↑ Philipp Burkhardt: Nachfolge von Andrea Gmür – Mitte-Fraktionschef: Philipp Matthias Bregy so gut wie gewählt. In: SRF. 4. Mai 2021, abgruefen am 4. Mai 2021.
- ↑ Priscilla Imboden: Neuer Fraktionschef - Bregy – ein rechter Mann in der Mitte. In: SRF. 21. Mai 2021, abgruefen am 21. Mai 2021.
- ↑ Chambres fédérales: le Valaisan Philipp Matthias Bregy conserve la présidence du Groupe du Centre. Abgruefen am 26. November 2023.
- ↑ Rundschau - Oberwalliser «Polit-Wölfe»: Das mächtige Duo Rieder und Bregy - Play SRF. Abgruefen am 26. November 2023.