Petrus (Oratorium)
| Dialäkt: Schwäbisch |
Petrus ischt a deitsch Oratorium fir drei Vokalsolischda, an gmischda Chor, an Kendrchor ond a klois Orkeschtr vo dr schwäbischa Kombonischdin Manuela Nägele. S Libreddo basiert uff Tekscht vo dr Bibel[1]. Uruffgfihrt worra isch des Werk am 16. Okdobr 2016 en dr Kreizkirch em Stuegerter Stadtdoil Hedlfenga ondrem Dirigat vo dr Kombonischdin. Es isch zom erschda Mol en dr Gschicht vo dr Kirchamusik, dass dui Titlfigur, dr Simon Petrus, em Middlpunkt vo-ma Oratorium stoht. A Uffihrong dauret rond zwoi Stond.
Firs Orkeschtr braucht-ma[ändere | Quälltäxt bearbeite]
A Streichergrubbe mit zwoi Geiga, a Bratsch, a Tschello ond-ra Bassgeig, a Fleet, a Oboe, a Klarinedd[2], a Horn, a Trombeet, a Posaun, a Klavier ond a grauß Schlagwerk, ondr anrem mit Marimba, Glockaspiil ond ara graußa Trommel.
Musik[ändere | Quälltäxt bearbeite]
D Manuela Nägele vorwendet en ihrer Pardidur bewusst verschiidene Stilelement: Klassik, Klezmer, Pop ond Jazz mit dichde Wechsel em Rhythmus ond em Tembo. Neaba de Zitat aus dr Bibel kommet a baar bekannde Luther-Choräl mit tradizionelle Melodia vor, zom Beispiil Nun komm, der Heiden Heiland, Vom Himmel hoch, da komm ich her ond Christ ist erstanden. Dia drei Vokalsolischda – fir d Titlroll ond fir da Evangelischda braucht mr jeweils an Bass ond fir da Jesus an Tenor – soddet mit professionelle Sänger bsetzt werra, d Cheer send so gschdaldet, dass-se vo Laia guat bewäldigt werda kennet.
Handlong[ändere | Quälltäxt bearbeite]
Des Oratorium isch gewissermaßa a musikalischa Biografii vom Simon Petrus, soweit en dr Bibl ibr dean Moo berichdet wuud. S schildret sei Beruafong, zeigt uff, was der Moo mit Jesus Christus erleabt ond wia-nr sein Herr ond Moischder vorleignet. Uffheera duat dui Gschicht en dr Zeit noch dr Auferstehong vom Jesus.
Litradur ond Quella[ändere | Quälltäxt bearbeite]
- Thomas Stichler: Uraufführung – Petrus – neues Oratorium von Manuela Nägele an Uffsatz en de Württembergische Blätter für Kirchenmusik, Heft 6/2016, S. 24 bis 26
- Lueg d Weblink
Weblink[ändere | Quälltäxt bearbeite]
- A baar Heerproba vo dr Uruffihrong
- An Bericht ibr d Uruffihrong vom Thomas Stichler uff dr Webseit vo dr Evangelischa Kirchagmoind Stuegert-Wanga (Site cha nüme abgrüeft wärde; Suche im Webarchiv)
- A Vorankindigong vo dr Uruffihrong mit-ma Bildle vo dr Kombonischdin en de Stuegerter Nochrichda vom 7. Okdober 2016
- A Selbschdporträä vo dr Kombonischdin
Fuaßnoda[ändere | Quälltäxt bearbeite]
- ↑ Genau gsait: uff dr BasisBible. Do drbei handlet’s sich om a moderna Bibelibrsetzong, wo vo dr Deitscha Biblgsellschaft vorantwordet wuud. Des hot da Vordeil, dass en deam Werk lange Schachdelsätz ond schwer vorstendliche Erkläronga vormiida werdet.
- ↑ Anstelle vo-ra Klarinedd ko laut dr Pardidur au a Saxofon vorwendet werra.