Peter-Lukas Graf

dr Peter-Lukas Graf 1970

Dr Peter-Lukas Graf (* 5. Jänner 1929 z Züri; haimetberäächtigt im Spiicher; † 31. Dezämber 2025 z Binnige) isch e Schwyzer Fletischt gsii.

Lääbe

Dr Peter-Lukas Graf isch e Suun vum Dokter Ernst Graf gsii. Är het z Züri bim André Jaunet un z Paris bim Marcel Moyse un em Roger Cortet Fleete studiert. Am Conservatoire national de Paris het er dr Eerscht Bryys as Fletischt iiberchuu. S Diploom as Dirigänt het er anne 1950 bim Eugène Bigot gmacht. Vu 1950 bis 1956 het er as Soolofletischt bim Winterthurer Stadtorcheschter gschafft, ab 1951 widerhoolt bim Schwyzerische Feschtspiilorcheschter z Lozärn. Derzue het dr Graf dr Eerscht Bryys am Internazionaale Musikwettbewäärb vu dr ARD z München un dr Bablock-Bryys vum H. Cohen International Music Award z London gwunne.

Vu 1960 bis 1970 het er in dr Hauptsach as Kunzäärt- un Ooperedirigänt am Stadttheater Lozärn gschafft. Vu 1973 bis 1985 het er as Brofässer fir Fleete an dr Musik-Akademy vu dr Stadt Baasel doziert. Är het bi vyyl internazionaale Maischterkiirs unterriichtet un isch e gfrogte Juuror bi internazionaale Musikwettbewäärb gsii. As Solischt, Chammermuusiker un Dirigänt het er Hyfe Schallblatte ufgnuu. Är het z Binnige gläbt.

Dr Peter-Lukas Graf isch ghyroote gsii un het drei Chinder ghaa. Sy Suun Florian Graf isch Chinschtler, d Doochter Aglaia Graf isch Pianischti. An Silveschter 20925 het dr Peter-Lukas Graf mit 96 Joor d Auge fir immer zuegmacht.

Wäärch

• Peter-Lukas Graf: Interpretation – Grundregeln zur Melodiegestaltung. Schott, Mainz 1996.

Eerige

Am 16. Juuni 2021 isch e Aschteroid nooch em gnännt woore: (5856) Peluk.

Literatuur

• Schweizerischer Tonkünstlerverein, Andres Briner, Cedric Dumont und Willi Schuh: Schweizer Musiker-Lexikon. Atlantis Verlag, Zürich 1964/1965, S. 146f.
• Die Musik in Geschichte und Gegenwart: allgemeine Enzyklopädie der Musik. Personenteil Fra–Gre 7. 2. neubearbeitete Auflage. Bärenreiter, Kassel 2002, S. 1464f.
• Regula Puskás: Peter-Lukas Graf.. In: Historisches Lexikon vo dr Schwiiz. 19. Januar 2006.

Weblink

• Homepage vum Peter-Lukas Graf
• Kurzbiografie auf der Plattform musinfo.ch
• Publikatione vo und über Peter-Lukas Graf im Katalog Helveticat vo dr Schwiizerische Nationalbibliothek

Fueßnote

Dä Artikel basiert uff ere fräie Übersetzig vu dere Version vum Artikel „Peter-Lukas_Graf“ vu de dütsche Wikipedia. E Liste vu de Autore un Versione isch do z finde.