Paul-Siméon Ahouanan Djro
| Dialäkt: Mìlhüüserdiitsch |
Dr Paul-Siméon Ahouanan Djro (* 19. Dezamber 1952 z’ Bingerville bii Abidjan; † 12. Hornung 2024 z’ Abidjan) ìsch a ivoorischer reemisch-kàthoolischer Geistlicher un Arzbischoof vu Bouaké.
sii Laawa
[ändere | Quälltäxt bearbeite]Dr Paul-Siméon Ahouanan Djro ìsch ìn dr Oordag’mainschàft vu da Frànsiskààner iitratta un hàt àm 19. Jüüli 1981 s’ Sàkràmant vu dr Priaschterwäih ämpfànga — vorhaar hàt’r nàdììrlig Gotteslehr g’schtudiart g’hàà.
Àm 6. Dezamber 1995 hàt’na dr Pàpscht Johànnis Pooli II. zem Bischoof vu Yamoussoukro ärnännt. D’ Bischoofswäih hàt em dr Àltarzbischoof vun Abidjan, dr Bernard Kàrdinààl Yago, àm 16. März vum Joohr druff g’schpanda. D’rbii sìnn d’ Mìtkonsekràtoora dr Vital Komenan Yao, Arzbischoof vu Bouaké un dr Luigi Ventura, dr Àpostoolischa Nunz ìn dr Repüblik Älfabaikìschta, gsìì.
Àm 12. Janner 2006 hàt’na dr Pàpscht Benedikt XVI. zem Koàdjutoorarzbischoof vu Bouaké ärnännt. Mìt’m Tood vum Vital Komenan Yaos àm 22. Septamber vum saalwa Joohr hàt’r ema àls Arzbischoof vu Bouaké noohg’folgt.
S’ Arzbìschtumm Bouaké ìsch aina vu da Regioona gsìì, wo’s b’sunderscht schtàrka soziààla un militäärischa Kriisa gaa hàt. Dr Arzbischoof Ahouanan Djro hàt m’r reegelmaassig àls Vermìttler ààg’froogt. Ànna 2015 ìsch dr Djro vum Schtààtspresidant Alassane Ouattara àn d’ Schpìtza vu dr Nàzionààla Kùmmissioon fìr d’ Verseehnung un Äntschaadigung vu da Opfer (Commission nationale pour la réconciliation et l’indemnisation des victimes – Conariv) b’rüafa, fìr d’ Opfer vu dr G’wàlt nooh da Wààhla ànna 2010/11 z’ äntschaadiga. Ar hàt d’ Uffgààb g’hàà, „d’ Àrwet vu dr Kùmmissioon fìr Diàloog, Woohrhait un Verseehnung (CDVR) àbz’schliassa, wo uffg’leest worra-n-ìsch.“ Ìn dr CDVR-Kùmmission ìsch’r schtällvertrattander Vorsìtzender gsìì, naawa-n-em friahjera Premiarminìschter Charles Konan Banny, wo vu Septamber 2011 bis Dezamber 2014 Vorsìtzender gsìì-n-ìsch.[1] Noh-n-em Àbschluss vu dara Uffgààb hàt’na d’ ACLAP-CI (Association des conseils en lobbyuing et affaires publiques de Côte d’Ivoire) ìn ìhrer Lischta vu da hundert iiflussriichschta Pärseenlikaita vum Lànd uffg’fiahrt.[2]
Dr Paul Siméon Ahouanan Djro ìsch àm 12. Hornung 2024 ìn siim 72. Laawesjoohr z’ Abidjan g’schtoorwa.[3]
Weblìnks
[ändere | Quälltäxt bearbeite]- Yytrag zue Paul-Siméon Ahouanan Djro uf catholic-hierarchy.org (englisch)
- Yydrag zue Paul-Siméon Ahouanan Djro uf gcatholic.org (englisch)
Ainzelnoohwiisa
[ändere | Quälltäxt bearbeite]- ↑ Edouard Koudou: Église catholique: Mgr Paul Siméon Ahouanan s’en est allé. In: FratMat.info. 13. Februar 2024, abgruefen am 14. Februar 2024 (französisch).
- ↑ Côte d’Ivoire: Décès de Mgr Siméon Ahouanan, archevêque de Bouaké. In: La Croix Afrique. 13. Februar 2024, abgruefen am 14. Februar 2024 (französisch).
- ↑ Adolphe Angoua: L’Eglise catholique en deuil: Décès de Mgr Paul Siméon Ahouanan Djro, Archevêque de Bouaké. In: linfodrome.com. 13. Februar 2024, abgruefen am 14. Februar 2024 (französisch).
|
Dä Artikel basiert uff ere fräie Übersetzig vu dere Version vum Artikel „Paul-Siméon_Ahouanan_Djro“ vu de hochdütsche Wikipedia. E Liste vu de Autore un Versione isch do z finde. |