Barbara Klossner

Us der alemannische Wikipedia, der freie Dialäkt-Enzyklopedy
(Witergleitet vun Miss Helvetia)
d Barbara Klossner 2018

D Barbara Klossner (* 16. Oktober 1980 z Diemtige) isch e Schwiizer Sängerin und Jodlerin. Si isch bekant under ihrem Künschtlername und Psöidonüm Miss Helvetia. Ihri Text sind meischtens uf Schwiizerdüütsch.

Si isch z Diemtige im Bärner Oberland ufgwachse und het scho i der Schuelzyt leere Singe und Jodle und Schwyzerörgeli spiile. Und si het au no Kweerflöte gleert und Underricht im Ballet gha. Vo 2000 bis 2008 het si z Gämf und e Zyt lang z Amerika gläbt, und es Johr lang isch si a d Schuel für darstellendi Kunscht z Luzärn ggange, und si het gleert dirigiere.

D Klossner spiilt bi der Gruppe Ländlerfründinne vom Gämfersee und het es bar Johr der Jodlerklub vo Gämf gleitet und 2009 der Gämfer Frauejodlerchor gründet. Si isch Lehrerin a der Musigschuel Saaneland-Obersimmetaal. Am Eidgnössische Jodlerfäscht 2008 isch si als Solischtin und au zäme mit ihrere Muetter im Duett und no as Sängerin mit em Jodlerklub Alphüttli ufträtte. 2017 het si s Lied «Mir si Unspunne» für s Unspunnefäscht gsunge.[1]

2011 het si under ihrem Name Barara Klossner s Album Alors, Allons-Y! Äbä Ä So! useggää, und 2018 as Miss Helvetia s nöie Album E Guete - Bon appétit Mä het se es bar Mol im Schwiizer Färnseh chönne gseh und im Radio chönne ghööre.[2] Und au im Ussland goot si go Konzärt ggää, öpe z Korea, z China, z Frankrych und z Belgie. Si spiilt d Hauptrolle im Jodel-Musical Stilli Zärtlichkeite, wo 2017 uf d Büüni cho isch.

Weblink[ändere | Quälltäxt bearbeite]

 Commons: Barbara Klossner – Sammlig vo Multimediadateie

Fuessnoote[ändere | Quälltäxt bearbeite]

  1. Von Trauffer: Unspunnenfest hat nun einen Song. In: Langenthaler Tagblatt. 3. April 2017.
  2. Jodlerin Barbara Klossner bei Kurt Aeschbacher. In: Simmental Zeitung. 13. Januar 2015.