Martin Pfister
.jpg)
Dr Martin Pfister (* 31. Juli 1963 z Zug; haimetberäächtigt z Waldcherch SG) isch e Schwyzer Bolitiker (Die Mitte, voorhäär CVP). Syt 2016 isch er Regierigsroot vum Kanton Zug un stoot dr Gsundhaitsdiräkzioon voor. Är isch designierte Bundesroot.
Lääbe
[ändere | Quälltäxt bearbeite]Dr Martin Pfister isch anne 1963 z Zug uf d Wält chuu. Im Joor 1984 het er am Leererseminaar St. Michael s Diploom gmacht. Vu 1988 bis 1996 het er an dr Uniwersiteet Fryybùùrg i. Ue. Gschiicht un dr Germanischtik studiert un mit em Lizänziaat abgschlosse. Sy Lizänziaatsaarbet het er iber d Waal vum Bundesroot Philipp Etter gschriibe.[1][2]
Ab 1993 het er zeerscht as Unterassischtänt, derno bis 2000 as Wisseschaftlige Mitarbaiter bim Urs Altermatt am Inschtitut fir Zytgschiicht vu dr Uniwersiteet Fryybùùrg gschafft. Anne 1996 fir en Stuudienufenthalt an dr Stanford University in de USA gsii. Ab 2001 bis zue syre Waal in Regierigsroot het dr Pfister as Gschäftsfierer vu verschiidene Verbänd un dr aigene Berootigsfiirma fir Verbandsmanagement gschafft.
Dr Pfister isch ghyroote un Vater vu vier erwagsene Chinder. Är läbt z Allewinde (Gmai Baar ZG). In dr Schwyzer Armee het dr Pfister zletscht dr Rang vun eme Oberscht ghaa un isch Schef Kataschtroofehilf vu dr Territoriaalregioon 3 (Zäntraal- un Siidoschtschwyz).[3][4]
Bolitik
[ändere | Quälltäxt bearbeite]In d Bolitik yygstiige isch dr Pfister as Mitgliid vu dr Voormundschafts- un dr Soziaalhilfkummissioon vu dr Gmai Baar un vu 2005 bis 2012 as Bresidänt vu dr CVP Baar. 2006 isch er in Kantoonsroot gweelt woore, wun er Mitgliid vu dr Ruumblaanigs-, dr Gsundhaits- un vu 2011 bis 2016 Bresidänt vu dr Bildigskummissioon gsii isch. Vu 2009 bis 2012 het er d CVP-Kantoonsrootsfrakzioon bresidiert. Derno isch dr Pfister bis 2016 Bresidänt vu dr CVP vum Kanton Zug gsii un doodermit au Mitgliid vum Voorstand vu dr CVP Schwyz.[3]
Bi de Regierigsrootswaale 2014 het er näb de Bishäärige Peter Hegglin un Beat Villiger as dritte CVP-Kandidaat kandidiert un het s absolut Mee gwunne, isch aber as Iiberzellige nit gweelt woore.[5][6] Wu dr Peter Hegglin 2015 in Ständeroot gweelt wooren isch, isch dää vu sym Regierigsrootsamt zruggdrätte. Dr Martin Pfister isch dreuf bi dr Ersatzwaal im Jänner 2016 im eerschte Waalgang zum Regierigsroot gweelt woore. Syt Februar 2016 stoot er dr Gsundhaitsdiräkzioon voor.[7] Dr Pfister isch Voorstandsmitgliid vu dr Schwyzerische Kumferänz vu dr kantonaale Gsundhaitsdiräkterne un ‑diräkter (GDK). Är isch 2019/2020 Statthalter un 2021/2022 Landammann vum Kanton Zug gsii.
Dr Pfister isch am 12. Meerz 2025 as Noofolger vu dr Viola Amherd zum Bundesroot gweelt woore. Är dritt s Amt am 1. April 2025 aa.[8]
Weblink
[ändere | Quälltäxt bearbeite]- Websyte vum Martin Pfister
- dr Martin Pfister uf dr Websyte vum Kanton Zug
- srf.ch: Porträt. In: SRF News. 12. Meerz 2025
Fueßnote
[ändere | Quälltäxt bearbeite]- ↑ Amherd-Nachfolge. Der Zuger Regierungsrat Martin Pfister will Bundesrat werden. In: SRF News. 3. Februar 2025, abgruefen am 3. Februar 2025.
- ↑ Martin Pfister: Die Wahl von Philipp Etter in den Bundesrat 1934. Ereignisse, Ideologien, soziales Umfeld. Typoskript Uni Freiburg 1996. (Nach: Josef Inauen et al. [Hrsg.]: Geschichte und Beruf. Eine Festschrift für Urs Altermatt von seinen ehemaligen Studierenden. Wien/Zürich 2017, ISBN 978-3-643-80259-0.)
- ↑ 3,0 3,1 Über mich. Websyte vum Martin Pfister.
- ↑ Über Martin Pfister. Websyte vu dr Gsundhaitsdiräkzioon vum Kanton Zug.
- ↑ Martin Pfister: «Die Bildung ist für den Kanton Zug zentral». In: SRF News. 17. Septämber 2014.
- ↑ Zuger CVP schickt Martin Pfister ins Rennen. In: SRF News. 5. Novämber 2015.
- ↑ Martin Pfister folgt auf Peter Hegglin. In: Luzerner Zeitung. 17. Jänner 2016.
- ↑ Martin Pfister zum Bundesrat gewählt: die Ergebnisse im Überblick. In: SRF News. 12. März 2025, abgruefen am 12. März 2025.
| Vorgänger Viola Amherd |
Mitgliid im Schwizer Bundesrot sit 2025 |
Nochfolger – |
|
Dä Artikel basiert uff ere fräie Übersetzig vu dere Version vum Artikel „Martin_Pfister“ vu de dütsche Wikipedia. E Liste vu de Autore un Versione isch do z finde. |