Kunz (Musiker)

De Marco Kunz (* 14. Auguscht 1985 z Mouesee), isch en Schwiizer Mundartmusiker, wo unterm Künschtlername Kunz uftritt.

Läbe[ändere | Quälltäxt bearbeite]

De Kunz isch z Mouesee im Lozärnische ufgwachse. In sinere Familie het d Musik en höche Schtellewert gha. De Vater het z Oberchöuch im Jodelclub gsunge und au dihei isch vil gsunge worde. Uf de Guitarre vo sinere Schwöscht het de Kunz sich heimlich s Spile biibrochd. Mit 10i het er de national Nachwuchsjodler-Priss gwunne, isch spöter mit ere Rockband ufträte und het no in andere Musikformatione Erfahrig gsammled. Im 2012 het er sin erschte Vertrag bi Universal unterschribe und mit Chopf, Härz, Hand sis erschti Album ufgnoh. Produzent vo dem Mini-Album mit sächs Lieder isch de Phil Merk gsi us de Band vom Baschi gsi. Im Mai 2014 isch dann sis zwöit Album (s erschti "grossi") Eifach so veröffentlicht worde. Es isch mit dem Album bis uf Platz 13 vo de Schwiizer Hitparade cho während d Single Lüüt so wie mer uf Platz 3 vo de Single-Hitparade gschafft het. Mit Mundart Folk isch es Johr spöter s nächschti Album uf de Märt cho, wo grad uf em 1. Platz in d Hitparade iigschtige isch. Aafangs 2017 isch dann s Album No Hunger erschine, wo au grad a d Spitze vo de Charts cho isch.

De Kunz het au de Übername «Alpen-Gosling», wil er em US-Schauspieler Ryan Gosling ähnelich gseht.^[1]