Luzerner Neuste Nachrichten

Dä artikel isch vom autor absichtlich i de moderate chliischriibig ghalte worde.

Diä Luzerner Neuste Nachrichten (LNN) isch en parteiunabhängigi tagesziitig us de schtadt Lozärn gsii, wo vo 1897 bes 1995 usegäh worden isch. Entschtande isch si 1897 als Luzerner Tages-Anzeiger ond hät sich em lauf vom 20. johrhundert zu dä gröschte ziitig vo de Zentralschwiiz entwicklet. 1918 hät si dänn de name Luzerner Neueste Nachrichten überchoo, abem johr 1975 hät si dänn Luzerner Neuste Nachrichten gheisse. 1973 hät de Ringier‑Verlag d'ziitig übernoo. Noch de fusion vo de beide bürgerliche lozärner ziitige Vaterland ond Luzerner Tagblatt zu dä Luzerner Zeitung im Jahr 1991 hät d'LNN ihrî füerendi schtellig verloore. 1995 isch si dänn vo de Neuen Luzerner Zeitung übernoo worde.

Gschicht

D LNN hät ihri urschprüng im johr 1897 bi streikende typografe. Die händ i säbem johr d'Gnosseschaftsdruckerei gründet ond dänn dä Luzerner Tages-Anzeiger als parteiunabhängigi tagesziitig lanciert. 1917 hät dänn de bekannti Lozärner drucker ond verleger Carl Josef Bucher d'druckerei ond d'ziitig überno. Er hät d'ziitig im johr 1918 in Luzerner Neueste Nachrichten umbenennt, ab 1975 isch dänn d'schriibwiis Neuste brucht worde.

Im 20. johrhundert hät sich dänn d'LNN zu dä gröschte ond für vili au innovativschte ziitig vo dä Zentralschwiiz entwicklet. Im johr 1970 hät d'LNN en uflaag vo 54’800 exemplar gha. Aber mit de iifüehrig vom inseratepool "Tandem" dur d'Publicitas AG im Jahr 1971, wo die bede bürgerliche Lozärner ziitige Vaterland und Luzerner Tagblatt mitgmacht händ, isch d'marktposition vo de LNN im härt umkämpfte werbemarkt dütlech gschwächt worde.

1973 häd dänn de grossi Ringier‑Verlag d'druckerei, dä verlag ond au d'ziitig vo dä Alice Bucher übernoo. D'absetzig vom chefredaktor Jürg Tobler dur Ringier im johr 1980 had zu grosse protescht ond au vilne abgäng i de redaktion gfüert. Drufabe händ es paar devo die alternative wucheziitig Die Region (1981–1985) gründet.

Mit de fusion vom Vaterland mit em Luzerner Tagblatt zu dä Luzerner Zeitung (LZ) im johr 1991 häd d'LNN ihri führendi schtellig i de region verloore ond hät sich au nümme chöne fooh. 1995 isch es dänn zu dä fusion cho zwüsched de LNN ond de LZ. S'nöie produkt hät Neue Luzerner Zeitung (NLZ) gheisse. Si isch s'erschtmol am 3. Januar 1996 erschine. Usegää hät die nöii ziitig d'Luzerner Medien AG, wo Ringier über d'C.J. Bucher AG zu 49 % ond i de Lozärner Ziitig zu 51 % ghört hät.

Bedüütig

D'LNN hät im 20. johrhundert zu dä wichtigste tagesziitige vo dä Zentralschwiiz ghört. Ihri parteiunabhängigi usrichtig ond diä breiti brichterschtattig händ für en schtarchi stellig im schwiizer mediemärt gsorget.

Ab em vereinsjohr 1980/81 hät sich d'LNN au no als Hauptsponsor vom FC Luzern en name gmacht, ihre slogan «Siehe LNN» isch au uf allne liibli vo de schpiler z'gseh gsii. Die rolle hät d'LNN vo 1981 bis 1995 gschpilt. Noch de fusion mit de LZ isch das sponsoring vo de Neue Luzerner Ziitig no fürs Johr 1995/96 wiitergfüert worde.

D'fusion hät zumene monopol bi de press i de Zentralschwiiz gfüert, was au öffentlech starch kritisiert worden isch. Als Reaktion druf hät d'NLZ als erschti schwiizer tagesziitig en Leserrot iigfüert. Parallel dezue send mehrerei alternativprojekt entschtande, drundert d'tagesziitig Luzern heute (ab em 26. Januar 1996) ond d'Zuger Presse (ab em Auguscht 1996), wo aber früener oder schpööter wider iigange send.

Literatur

Historisches Lexikon der Schweiz (HLS): Luzerner Neuste Nachrichten.
Politchronik Schweiz: Beiträge zur Fusion der LNN und LZ sowie zur Gründung von Luzern heute und der Zuger Presse.
FC Luzern: Vereinschronik 1980/81 (Hinweis auf die Rolle der LNN im Umfeld des Clubs).
Football Kit Archive: Sponsorenhistorie des FC Luzern (Trikotsponsoring 1981–1995 durch die LNN und 1995/96 durch die Neue Luzerner Zeitung).

Weblinks