Luna Wedler

d Luna Wedler uf dr Berlinale 2023

D Luna Sofia Wedler (* 26. Oktoober 1999 z Züri) isch e Schwyzer Schauspiileri.

Lääbe

D Wedler het anne 2015 im Film Amateur Teens vum Niklaus Hilber debütiert. No aigene Aagoobe het si si im Alter vu 14 Joor „einfach mal so“ fir d Roll bewoorbe un eso iri Lyydeschaft fir s Schauspiil entdeckt. Si isch vu 2016 bis 2018 uf d European Film Actor School z Züri gange. Iri eerscht Hauptroll het si im Film Blue My Mind (2017) vu dr Lisa Brühlmann gspiilt, anderi sin 2018 in Das schönste Mädchen der Welt un 2019 in Dem Horizont so nah un in Auerhaus gsii. Syter Augschte 2020 het me d Wedler in dr Netflix-Seerie Biohackers chenne sää.

Anne 2021 het d Luna Wedler fir di wyybli Hauptroll im Spiilfilm Je suis Karl e Nominierui fir dr Dytsch Filmbryys iiberchuu.

Vu Mai 2021 bis Februar 2022 het si d Sophie Scholl in eme Instagram-Brojäkt vum BR un em SWR gspiilt, wu zue Eere vum 100. Gebuurtsdaag vu dr Wiiderstandskämpferi iri letschte Moonet in Ächtzyt abbildet he. 2023 isch si as Marianne Oellers in Ingeborg Bachmann – Reise in die Wüste unter dr Reschy vu dr Margarethe von Trotta bsetzt gsii. Anne 2024 het me d Wedler in dr Verfilmig vum Romaan Jakobs Ross vu dr Silvia Tschui in dr Roll vu dr Magd Elsie chenne sää. Dr Film spiilt uf em Land in dr Schwyz vum 19. Jorhundert. As Vorberaitig het si zäme mit dr Reschiseeri Katalin Gödrös un em Filmpaartner Valentin Postlmayr e baar Dääg uf eme Buurehoof im Toggeburg gschafft; si heebe ghait un seien am vieri am Morge ufgstande go Chie mälche.

Anne 2025 isch si fir iri Laischtig as Grete im Spiilfilm Stille Freundin vu dr Ildikó Enyedi mit em Marcello-Mastroianni-Bryys as beschti Noowugsdaarstelleri vum Filmfeschtiwäl vu Venedig geert woore.

D Wedler läbt z Züri.

Filmografy

• 2015: Amateur Teens
• 2016: Der Bestatter (Fäärnseeseerie, ai Folg)
• 2016: Lina (Fäärnseefilm)
• 2017: Blue My Mind
• 2017: Flitzer
• 2017: Zwiespalt (Fäärnseefilm)
• 2018: Das schönste Mädchen der Welt
• 2018: Der Läufer
• 2018: The Team II (Fäärnseeseerie, 8 Folge)
• 2019: Dem Horizont so nah
• 2019: Auerhaus
• 2020–2021: Biohackers (Fäärnseeseerie, 12 Folge)
• 2021–2022: Ich bin Sophie Scholl (Instagramseerie)
• 2021: Je suis Karle
• 2021: Die Geschichte meiner Frau (The Story of My Wife)
• 2021: Soul of a Beast
• 2022: Der Passfälscher
• 2022: Der Räuber Hotzenplotz
• 2022: Was man von hier aus sehen kann
• 2023: Ingeborg Bachmann – Reise in die Wüste
• 2023: Alles Licht, das wir nicht sehen (All the Light We Cannot See, Miniseerie, 2 Folge)
• 2024: Jakobs Ross
• 2024: Zeit Verbrechen (Miniseerie, Folg Deine Brüder)
• 2024: Landesverräter
• 2024: Marianengraben
• 2025: Sie glauben an Engel, Herr Drowak?
• 2025: 22 Bahnen
• 2025: Stille Freundin

Uuszaichnige

• 2018: Shooting Star vu dr European Film Promotion (Berlinale 2018)
• 2018: Schwyzer Filmbryys as Beschti Daarstelleri im Film Blue My Mind
• 2018: Günter-Rohrbach-Filmbryys – Bryys vum Saarländische Rundfunk fir Das schönste Mädchen der Welt zäme mit em Aaron Hilmer
• 2019: New Faces Award – Beschti Noowugsschauspüiileri in Das schönste Mädchen der Welt
• 2020: Bayerischer Filmpreis – Beschti Noowugsdaarstelleri
• 2021: Filmkunstfest Mecklenburg-Vorpommern – Noowugsdaarstellerbryys für Je suis Karl
• 2022: Jupiter-Award – Beschti Daarstelleri Kino Nazionaal in Je suis Karl
• 2022: Blauer Panther – Ich bin Sophie Scholl
• 2025: Marcello-Mastroianni-Preis – Beschti Noowugsdaarstelleri in Stille Freundin

Weblink

 Commons: Luna Wedler – Sammlig vo Multimediadateie

• Luna Wedler in dr Internet Movie Database
• d Luna Wedler uf dr Websyte vu dr Agäntuur YUMI Management
• Luna Wedler bi schauspielervideos.de

Fueßnote

Dä Artikel basiert uff ere fräie Übersetzig vu dere Version vum Artikel „Luna_Wedler“ vu de dütsche Wikipedia. E Liste vu de Autore un Versione isch do z finde.