Lisa Blatter
D Lisa Blatter (* 1979 z Heide (Holstein), Dytschland) isch e Schwyzer Draaibuechautoori, Reschiseeri un Filmbroduzänti.
Lääbe
[ändere | Quälltäxt bearbeite]D Lisa Blatter isch in dr Schwyz un de USA ufgwagse. Si het zwai Joor lang Chunschtvermittlig (Leerberuef fir Gstaltig un Chunscht) an dr Hoochschuel fir Gstaltig un Chunscht Züri HGKZ (hite ZHdK) studiert, vooerb si ab 2004 uf d Fachriichtig Film gwägslet isch. Si het s Stuudium anne 2008 abgschlosse mit em Chuurzspiilfilm Nachglühen.[1] Dr Film isch Locarno Film Festival urufgfiert un fir dr First Steps Award nominiert woore.[2]
As Dail vun eme zeechebfige Reschykollektiiv isch si verantwortli gsii fir ai Episood vum Spiilfilm Heimatland, wu anne 2015 im internazionaale Wettbewäärb am Locarno Film Festival Premieerte ghaa het un mit em Bryys vu dr Juugedjury uuszaichnet wooren isch.[3] Dr Film isch au uuszaichnet woore mit em Bryys fir dr gsellschaftlig relevanteschte Film am Filmfestival Saarbrücken un mit em Zürcher Filmbryys, derzue isch er zwaifach nominiert gsii fir dr Schwyzer Filmbryys (Beschte Spiilfilm un Beschti Montaasch),
Anne 2016 isch ire Spiilfilm Skizzen von Lou am Zurich Film Festival urufgfiert woore. D Liliane Amuat isch fir iri Roll im Film fir dr Schwyzer Filmbryys as Bescti Daarstelleri nominiert woore.
Au ire zweet lang Spiilfilm as Reschiseeri un Draaibuechautoori, Von dem, was bleibt, het sy Premeere am Zurich Film Festival gfyyrt, im Spootjoor 2025.[4] In de Hauptrolle cha me d Carla Juri un dr Dashimir Ristemi sää.
D Lisa Blatter isch Mitgrinderi un -inhaaberi vu dr Brodukzioonsfiirma 2:1 Film mit Sitz z Züri. Fir die Fiirma schafft si au as Broduzänti, unter anderem het si Die Böhms – Architektur einer Familie vum Maurizius Staerkle Drux oder Europe, She Loves vum Jan Gassmann broduziert. Europe, She Loves isch an dr Sekzioon Panorama vu dr Berlinale zaigt woore[5] un isch zwaifach fir dr Schwyzer Filmbryys nominiert gsii (Beschte Dokumäntaarfilm un Beschti Kamera).[6] Anne 2024 isch mit Les paradis de Diane wiider e Film, wu si broduziert gaa het, bi dr Berlinale zaigt woore (Reschy: Jan Gassmann un Carmen Jacquier, Draaibuech: Carmen Jacquier).[7]
Uusglääseni Filmografy
[ändere | Quälltäxt bearbeite]As Reschiseeri:
- 2005: Pool
- 2006: Hotel 7.4
- 2006: A Normal Dog And Shit Like That
- 2006: Return The Dog
- 2007: Traurige Jungs tanzen, wenn niemand hinsieht
- 2007: Schlüsselkind
- 2008: Nachglühen
- 2015: Heimatland
- 2016: Skizzen von Lou
- 2025: Von dem, was bleibt
As Broduzänti:
- 2014: Die Böhms – Architektur einer Familie
- 2016: Europe, she loves
- 2016: Skizzen von Lou
- 2017: Zwischenstopp (Chuurzfilm)
- 2024: Les paradis de Diane
Weblink
[ändere | Quälltäxt bearbeite]- Aigeni Websyte: 2:1 Film
- Aigeni Websyte: Skizzen von Lou
- Lisa Blatter in dr Internet Movie Database
- Lisa Blatter uf swissfilms,ch
- Lisa Blatter im Lexikon des internationalen Films
Fueßnote
[ändere | Quälltäxt bearbeite]- ↑ Lisa Blatter | filmstudieren.ch. Abgruefen am 12. Februar 2021.
- ↑ SWISS FILMS: Lisa Blatter. Abgruefen am 12. Februar 2021.
- ↑ Locarno Festival: Heimatland. Abgruefen am 12. Februar 2021.
- ↑ Von Dem, Was Bleibt. Abgruefen am 3. Dezember 2025.
- ↑ Berlinale: „Europe, She Loves“. Europa – Die Nadel, an der wir hängen. 13. Februar 2016, abgruefen am 12. Februar 2021 (de-DE).
- ↑ Europe, she loves. © Bundesamt für Kultur, abgruefen am 12. Februar 2021.
- ↑ | Berlinale | Archiv | Programm | Programm. Abgruefen am 3. Dezember 2025.
 |
Dä Artikel basiert uff ere fräie Übersetzig vu dere Version vum Artikel „Lisa_Blatter“ vu de dütsche Wikipedia. E Liste vu de Autore un Versione isch do z finde. |