Lena Maurer

D Magdalena „Lena“ Maurer (* 9. April 1904 z Minche as Magdalena Amann; † 25. Dezämber 1990 z Mannem) isch e dytschi Bolitikeri (SPD) gsii. Si isch vu 1949 bis 1952 Mitgliid im Landdaag vu Wiirtebäärg-Baade un druf vu 1952 bis 1968 Mitgliid im Landdaag vu Baade-Wiirtebäärg gsii.

Familie, Uusbildig un Beruef

D Magdalena Maurer isch e Doochter vum Haidelbercher Gwäärkschaftssekreteer un Buurgermaischter Josef Amann gsii. No dr Volksschuel z Mannem het si as Sprächstundehilf bin eme Zaandokter gschafft. Anne 1921 isch si uf e brivaati Handelsschuel gange un het druf as Kuntorischti gschafft. Vu 1930 bis 1933 isch si Abdailigslaiteri bi me Haidelbercher Verlaag un derzue vu 1931 bis 1933 stellverdrättendi Voorsitzeri vu dr AWO z Haidelberch. Mit dr Machtiibernaam vu dr Nationaalsozialischte het si 1933 iri Aarbet verloore un het derno ne Lääbesmittelgschäft z Mannem glaitet, bis si 1937 dr Ooberverwaltigsinschpäkter Daniel Maurer ghyroote het. Är het zwai Chinderr in Ee mitbroocht un si isch Huusfrau woore. In dr Zyt vum Zweete Wältchrieg isch si fir e Maschiineböuunternäme un dr Mannemer Schlachthoof dienschtverbfliichtet woore. Noch em Chrieg isch si Voorsitzeri vu dr Haidelbercher AWO gsii un het speeter bim Woonigs- un Aarbetsamt z Mannem gschafft. Vu derhaim uus het si mit dr Umntersitzig vu irem Mann en Aart inoffiziäll Woonigsamt bedriibe un het Woonige vermittlet. Fir ire soziaal Engaschmänt in dr Noochriegszyt isch si vu dr Buurger*ne vum Stadtdail Schönau mit em Byyname „Ängel vu Schönau“ geert woore.

Bolitik

D Maurer isch scho in dr Zyt vu dr Weimarer Republik in di Sozialistisch Aarbaiter-Juuged (SAJ) yydrätte un isch vu 1921 bis 1928 Voorsitzer z Haidelberch gsii. Anne 1924 het si si dr SPD aagschlosse un isch vu 1946 bis 1977 Voorstandsmitgliid vu dr Mannemer Soziaaldemokraate gsii. Vu 1948 bis 1951 un vu 1968 bis 1980 isch si Rootsmitgliid vu dr Stadt Mannem gsii. Si isch vum 30. Augschte 1949, wu si fir dr verstoorbe Abgoornete Gustav Zimmermann noogruggt isch, bis 1952 Mitgliid vum Landdaag vu Wiirtebäärg-Baade gsii. 1952/53 isch si Mitgliid vu dr Verfassiggeebende Landesversammlig gsii un im Aaschluss bis 1968 ooni Unterbrächig Mitgliid vum Landdaag vu Baade-Wiirtebäärg. Doo het si in Hyfe Uusschuss mitgschafft wie zum Byyschpel im Wiirtschafts-, im Soziaal- un im Landwiirtschaftsuusschuss. Derzue isch d Maurer Mitgliid im Bresidium vum Landdaag gsii un isch zue eerschte Voorsitzeri vum Petizioonsuusschuss beruefe woore. In däm het si si mit Beschwäärde un Aadreeg vu dr Buurger*ne ussenandergsetzt.

Eerige

• Grooß Bundesverdienschtchryz 1967
• Verdienschtmedaille vum Land Baade-Wiirtebäärg 1979
• Eerering vu dr Stadt Mannem 1980
• Lena-Maurer-Platz z Mannem 1992

Literatuur

• Wolfgang Brach: Der Mannheimer Gemeinderat 1945–1984. Mannheim 1984, ISBN 3-87804-162-4
• Ina Hochreuther: Frauen im Parlament. Südwestdeutsche Palarmentarierinnen von 1919 bis heute. Stuttgart 2012, ISBN 3923476159, S. 205.

Weblink

• Kurzbiographie bei der Ausstellung Widerstand gegen den Nationalsozialismus
• Susanne Schlosser: Lena Maurer (1904 - 1990). Landtagsabgeordnete und Stadträtin, Denktage. Frauen&Geschichte Baden-Württemberg