Lavannes

Lavannes
Lavannes (Frankreich) Lavannes
Region	Grand Est
Département	Marne
Arrondissement	Reims
Kanton	Bourgogne-Fresne
Kommünàlverbànd	Grand Reims
Koordinàte	49° 19′ N, 4° 10′ O49.3141666666674.1719444444444
Heche	84–142 m
Flech	17,77 km2
Iiwohner	568 (1. Jänner 2020)
Bevelkerungsdicht	32 Iiw./km2
Code Postal	51110
INSEE-Code	51318
Website	www.lavannes.fr

Dialäkt: Mìlhüüserdiitsch

Lavannes [lavan] ìsch a frànzeescha G’mainda mìt 568 Iiwoohner (Schtànd: 1. Januar 2020) ìm Département Marne ìn dr Regioon Grand Est. Sa g’heert zem Arrondissement Reims, zem Kanton Bourgogne-Fresne un ìsch Mìtglììd ìm G’maindaverbànd Communauté urbaine du Grand Reims.

wu dr Nàmma haar ìsch

Ìm Làuif vu dr G’schìcht hàt sìch dr Dorfnàmma-n-asoo uff Làtiinisch un Àltfrànzeesch, schpeeter uff Frànzeesch äntwìckelt:

• Lavenna (um 1190)
• Lavenne (ànna 1248)
• Lavania (ànna 1252)
• Lavanna (ànna 1272)
• La Venne (ànna 1302)
• La Veinne (ànna 1384)
• Lavanne (ànna 1546)
• Lavannes (ànna 1556)

Dr Nàmma schtàmmt vum Oïl-Wort venne odd’r vanne, wo äbba „kìnschtlig Fìschgebiat“ bediitet. Ar kààt àui a Àblaitung vum gàllischa Wort aawen-ai sìì, wo „Ort àm Bàch“ bediitet — mìt dam soll m’r dr Bàch Ru maina, wo nordeeschtlig vum Dorf fliasst.

D’ Dorfbewoohner nännt m’r Lavannois [lavanwa] un Lavannoises [lavanwaz] uff Frànzeesch.

wu ’s lììgt

Lavannes lììgt äbba 12 Kilomeeter oscht-nordeeschtlig vu Reims ìm Norda vu dr histoorischa Prowìnz Champagne. Dr Bàch Ru äntschprìngt uff’m neerdliga G’maindagebiat un fliasst ìn Rìchtung Nordoscht bis ìn d’ Suippe. S’ Zäntrum lììgt uff’ra Heecha vun äbba 110 Meeter. S’ G’land blibbt ìm Norda flàch, àwwer schtaigt uff Süüda bis uff ìwwer 155 Heecha-n-àà.

Äbba 94 Prozant vu dr G’maindaflächa waara fìr d’ Làndwìrtschàft b’nutzt, äbba 4 Prozant sìnn b’wàldet, b’sunderscht äntlàng vum Bàch Ru.

Umgaa wìrd Lavannes vu da Noochberg’mainda Pomacle ìm Norda un Nordwäschta, Isles-sur-Suippe ìm Norda un Nordoschta, Warmeriville ìm Nordoschta, Heutrégiville un Saint-Masmes ìm Oschta, Époye ìm Süüda un Süüdoschta, Berru ìm Süüdwäschta so wia Caurel ìm Wäschta.

wia dr Booda vum G’maindagebiat b’nutzt wìrd (ànna 2018)

wia sìch d’ Beveelkerung äntwìckelt hàt

Joohr	1962	1968	1975	1982	1990	1999	2006	2013	2020
Iiwoohner	297	313	330	388	456	446	549	618	568
Kwalla: Cassini un INSEE

wàs doo z’ sah ìsch

• d’ romàànischa, reemisch-kàthoolischa Lambertskìrìch (église Saint-Lambert), wo üss’m 12. Joohrhundert schtàmmt. Sa ìsch zitter 1911 bii da Histoorischa Dankmooler klàssifiziart, wo-n-a nàzionààla Bediitung hann. D’rìnn sìnn dr schtainiga Tàuifbäcka üss’m Joohr 1570 so wia s’ G’mäld vum „Balthasar siim Fascht“ (Eelfàrb uff Liinwànd) üss’m 18. Joohrhundert — wo vermüatlig dr Itàliaaner Andrea del Sarto urschprìnglig ìn dr Rönessans g’moolt hàt — jewills àls Ainzelwark bii da Histoorischa Dankmooler klàssifiziart, wo-n-a nàzionààla Bediitung hann. Üsserdam sìnn ìn dr Kìrìch fìmf Kunschtwark, wo jewills bii da Histoorischa Dankmooler iig’schtuuft sìnn, wo-n-a regionààla Bediitung hann: a pààr Taila vum àlta Hàuiptàltààruffsàtz üss’m 18. Joohrhundert, wo ìm Äärschta Waltkriag zärschteert worra sìnn, d’ fàrwiga Holzschtàtüüta vu dr Màdonna mìt’m Jesüskìnd üss’m 19. Joohrhundert, d’ baida fàrwiga Holzschtàtüüta vu’ma Bischoof un vun’ra hailiga Fràui üss’m 18. Joohrhundert so wia-n-a Sìlwerziboorium üss’m And vum 18. Joohrhundert, wo vergulda-n-ìsch.

• 
  d’ Lambertskìrìch
• 
  s’ Wäschtportààl vu dr Lambertskìrìch
• 
  d’ Süüdfàssààda vu dr Lambertskìrìch
• 
  a àndra Sìcht vum Kìrchaturm
• 
  d’ Àpsis vu dr Lambertskìrìch
• 
  s’ Bìrgermaischteràmt Lavannes

zem Verkeehr

D’ Nàzionààlschtrooss 51 fààhrt dur d’ G’mainda vu Süüdwäscht bis uff Nordoscht uff’ma kìrza-n-Àbschnìtt mìt dr Ààschlussschtälla 24 àn dr Granz züa dr Noochberg’mainda Caurel. Sa diant àls Verbìndungsschtìckla zwìscha zwai Sektoora vu dr Otoschtrooss A 34) vu Reims un Sedan. D’ Departementsschtrooss D 30 verbìndet s’ Zäntrum vu Lavannes mìt daara Ààschlussschtälla un Pomacle ìm Nordwäschta un mìt Époye ìm Süüdoschta, a lokààla Làndschtrooss mìt Caurel ìm Süüdwäschta.

A Büsliinia vu dr Trànsportg’sällschàft Champagne Mobilités verbìndet d’ G’mainda mìt Pomacle un Reims.

Lìteràtüür zem Dorf

• Cousin-Henrat: Histoire de Lavannes (Marne) depuis les temps les plus reculés jusqu’à nos jours. Imprimerie et Lithographie Matot-Braine, Reims 1896 (französisch, 192 S.). 
• Joseph Garnotel: Lavannes : un village français entre mémoire et devenir. Éditions Le Labyrinthe, 2016 (französisch, 226 S.). 
• Bosteaux-Paris: Note sur l’Ascia des Romains trouvé à Lavannes. In: Société archéologique champenoise. Band 2, 1908, S. 86–88 (französisch). 
• G. Jactat: Découverte d’une sépulture gauloise à Lavannes (Marne), lieu-dit Le Mont-Joly. In: Bulletin de la Société archéologique champenoise. Band 21, 1927, S. 73–74 (französisch). 
• Léon Mauget: Découvertes archéologiques à Lavannes et Berru (Marne). Cimetière du Mont-Jouy (Lavannes). In: Bulletin de la Société archéologique champenoise. Band 21, 1927, S. 108–109 (französisch). 

Lüag àui

• d’ Lischta vu da G’mainda ìm Département Marne

Weblìnks

 Commons: Lavannes – Sammlig vo Multimediadateie

• d’ offiziälla Websitta vu dr G’maindaverwàltung Lavannes (frànzeesch)
• Schtàtistik züa dr G’mainda Lavannes biim INSEE (frànzeesch)
• Informàzioona züa dr G’mainda Lavannes ìm Informàzioonsportààl BANATIC vum frànzeescha Ìnnaminìschteerium (frànzeesch)
• Informàzioona züa dr G’mainda Lavannes ìn dr Dààtabànk vu dr LdH/EHESS/Cassini (frànzeesch)
• d’ G’mainda Lavannes uff dr Websitta vum Nàzionààla Geogràfii-Ìnschtitüüt IGN (frànzeesch)