Konrad III. (Burgund)

s Rych Hochburgund (grüen) im 10. Joorhundert

Dr Konrad dr Dritt († 19. Oktober 993) isch König vo Burgund gsi.

Er isch dr Soon gsi vom König Ruedolf em Zwöite († 937) und dr Brueder vo dr Adelheid. Wenn er uf d Wält cho isch, weiss me nid gnau. No bevor er erwachse gsi isch, het men en z Lausanne ane 937 zum König gwäält. Aber jetz isch dr König Hugo vo Italie über d Alpe cho, wil er au s burgundische Königrych hett wellen übernää. Do hepme dr jung Konrad zu sinere Sicherheit em oschtfränkische König Otto em Erschte brocht, won em gäge Hugo ghulfe het. Der König Otto isch drufabe mit eme grosse Ufgebott über d Alpe in Süde ggange und het Oberitalie eroberet. Er het ane 951 d Adelheid, d Schwöschter vom Konrad, ghürootet und däm jetz ghulfe sech im Burgund durezsetze. Fascht vierzg Joor lang isch dr Konrad denn dört König gsi, und sis Rych het e schwäri Zyt duregmacht, wo d Sarazeene joorzäntelang vo dr Provence us s Rhonetaal agriffe und plünderet händ; anne 939 isch vonne s Chlooschter Sankt Moritz im Wallis usgraubt worde.

Dr Konrad het zwo Froue gha. Die erschti het Adelana gheisse und isch 963 gstorbe, die zwöiti, d Mathilde (943–982), het er anne 964 ghürootet. Dr eint Soon Rudolf dr Dritt het noch iim s Königrych Burgund regiert.

Literatur

• Rudolf Schieffer: Rudolfinger. In: Neue Deutsche Biographie (NDB). Band 22, Duncker & Humblot, Berlin 2005, ISBN 3-428-11203-2, S. 198–200.
• Romain Jurot/CN: Konrad. In: Historisches Lexikon vo dr Schwiiz. 2008