Kummenistischi Bartei
E kummenistischi Bartei isch e bolitischi Bartei, wu dr Kummenismus (e klasseloosi Gsellschaft) as Gsellschaftsoornig aasträbt.
Iiberblick
[ändere | Quälltäxt bearbeite]Di eerscht kummenistisch Bartei im Sinn vun ere nazionaal organisierte barteinolitische Organisazioon sin d Bolschewiki unter dr Fierig vum Wladimir Iljitsch Lenin gsii. Anne 1919 het si di Russisch Soziaaldemokraatisch Aarbaiterbartei in Kummenistischi Bartei vu Russland (Bolschewiki) umgnännt go si vu dr dytsche SPD abgränze, wu dr Eerscht Wältchrieg billigt hetz un doodmool di wiichtigscht sozialistisch Aarbaiterbartei z Europa gsii isch. Vu dr Teese vum Lenin iber s Verwiirkilige vu dr Oornig, wu dr Karl Marx propagiert ghaa het, sin no dr russische Oktooberrevoluzioon vu 1917 wältwyt anderi kummenistischi Barteie grindet woore, zmaischt as Abspaltige vu sozialistischen un soziaaldemokraatische Barteie, wu die noodsnoo uf refoormorientierte Kuurs umgschwänkt sin un au im Rame vum Eerschte Wältchrieg un em Ussenanderbräche vu dr Zwoote Internazionaale all mee ne anderi Uusleegig vum „broletaarische Internazionmalismus“ zaight ghaa hän wie di revoluzioneere Marxischte.
Di wältaaschauli Grundlaag vu dr kummenistische Barteie baöut uf de histoorische, ekenoomische un filesoofische Chänntnis vum Marxismus (Wisseschaftlige Sozialismus) uf, wu s teoretisch Fundamänt vu dr kummenistische Leer bilde. Die Leer isch vum Karl Marx un em Friedrich Engels im Verlauf vum 19. Jorhundert entwicklet woore. Di wiichtgschte Grundgedanke sin scho im Kummenistische Manifescht vu 1848 din gsii.
Scho im 19. Jorhundert un all mee im 20. Jorhundert isch s zue unterschiidlige Uusleegige un Wyterentwicklige vu dr Marxsche Leere chuu, wu bis in d Geegewaart zue verschiidene Kunzäpt vu Sozialismus un Kummenismus gfier hän (zem Byschpel Leninismus, Marxismus-Leninismus, Trotzkismus, Titoismus, Maoismus, Eurokummenismus etc.). Em Lenin sy Teory vu dr zäntraale Bedytig vu dr kummenistische Bartei as „Voorhuet vu dr Aarbaiterklass“ het do ne grooße Yyfluss uf alli realsozialistische Sischteem ghaa.
Literatur
[ändere | Quälltäxt bearbeite]- Uwe Backes, Patrick Moreau (Hrsg.): Communist and Post-Communist Parties in Europe (= Schriften des Hannah-Arendt-Instituts für Totalitarismusforschung. Bd. 36). Vandenhoeck & Ruprecht, Göttingen 2008, ISBN 978-3-525-36912-8.