Zum Inhalt springen

Klaus Schwab

Us der alemannische Wikipedia, der freie Dialäkt-Enzyklopedy
dr Schwab bim Young Global Leaders Annual Summit 2019

Dr Klaus Martin Schwab (* 30. Meerz 1938 z Raveschburg) isch e dytsche Wiirtschaftswisseschaftler. Är isch Grinder vum Wältwiirtschaftsfoorum un bis 2025 Voorsitzer vu sällem gsii.

Lääbe

[ändere | Quälltäxt bearbeite]

Dr Klaus Schwab isch e Suun vum Eugen Wilhelm Schwab un syre Frau Erika Schwab, geb. Epprecht. D Familie Schwab isch anne 1933 us dr Schwyz ins Dytsch Ryych zooge, wu dr Jacob Schmidheiny, dr Mitbsitzer vu dr Escher Wyss AG, dr Eugen Wilhelm Schwab as chaufmännische Diräkter vu syre Turbiinefabrik z Dytschland yygstellt ghaa het. Dr Klaus Schwab isch kadoolisch erzooge woore.[1] As dytsch-schwyzerischi Familie sin s Schwabs privilegiert gsii un hän z. B. in de Feerine in d Schwyz deerfe raise. D Familie isch retuur in d Schwyz zooge, wu dr Schwab di 1. un di 2. Klass vu dr Primaarschuel im Wädeschwiilerl Ortsdail Au bsuecht ghaa het. Speeter isch dFamilie wiider uf Dytschland zooge.[2] Dr Schwab isch bis zum Abituur anne 1957 uf s Spohn-Gimnaasium z Raveschburg gange.[3]

Är het Maschiineböu an dr ETH Züri studiert un isch deert anne 1965 zum Dokter vu dr tächnische Wisseschafte (Dr. sc. techn.) bromowiert woore. An dr Uniwersiteet Fryybùùrg het er bis 1963 Bedriibswiirtschaftsleer studiert un isch deert 1967 zum Dokter vu dr Wiirtschaftswisseschafte (Dr. rer. pol.) bromowiert woore. As Stipändiaat vu dr Rotary Foundation[4] het er 1966/1967 en akadeemisch Joor an dr Harvard Kennedy School absolviert, wun er mit eme Master of Public Administration (MPA) abgschlosse het. Retuur z Europa het er bi Escher Wyss aafange schaffe, wuun er im Voorstand bis 1970 d Integrazioon in d Sulzer AG z Winterthur z verantwoorte ghaa het.

Anne 1971 het er s Buech Moderne Unternehmensführung im Maschinenbau vereffetligt. Doodin het er gschriibe, ass Unternäme zum langfrischtig erfolgryych syy d Inträsse vu allne Stakeholder mien beruggsiichtige, nit nume die vu dr Aktioneer. Im nämlige Joor isch er fir s Fach Business Policy as Brofässer an d Uniwersiteet Gämf gruefe woore, wuun er bis 2002 gschafft het.

Im Joor 1998 het dr Schwab mit syre Frau Hilde di gmainnitzig Schwab Foundation for Social Entrepreneurship grindet. 2004 het er mit sym Bryysgäld vu aire Millioon US-Dollar fir dr renommiert Dan-David-Bryys d Stiftig The Forum of Young Global Leaders grinde.

Dr Schwab isch Mitgliid vu Ufsiichtsreete un Verwaltigsreet vu verschiidene internazionaale Unternäme. Är het e Hyfe Oorden un Uuszaichnige iiberchuu un isch Eeredokter vu verschiidene Uniwersiteete. Derzue gheert er em Länkigsuusschuss (Steering Committee) vu dr Bilderberg-Kumferänze aa.

Anne 2020 het er sy Wiirtschaftsblaanigsbrojäkt mit em Titel The Great Reset mit em Thierry Malleret in Buechfoorm uusegee. The Great Reset isch au dr Name vun eme im Mai 2020 unterbraitete Voorschlaag vum Wältwiirtschaftsfoorum fir e Wiirtschaftsblaanig zum noohaltige Wiiderufböu vu dr Wiirtschaft un dr Gsellschaft no dr Covid-19-Pandemy un dr Wiirtschaftskriis 2020–2021.

dr Schwab mit em Václav Havel un em Prince Charles (1992)

World Economic Forum (WEF)

[ändere | Quälltäxt bearbeite]
dr Klaus Schwab uf em Wältwiirtschaftsfoorum (2008)

Im Joor 1971 het dr Schwab di gmainnitzig Stiftig European Management Conference grindet, wuu 1987 in Wältwiirtschaftsfoorum (World Economic Forum, WEF) umgnännt wooren isch. Si bringt all Joor Fierigslyt us dr internazionaale Wiirtschaft im Schwyzer Ort Tafaas zäme, uurspringli, go modäärni Managementkunzäpt dischpetiere. Syter 1994 sin au Bolitiker*ne bim Dräffe derbyy. Dr Klaus Schwab het d Stiftig iber d Joor zuen ere globaale Kummenikazioonsblaatfoorm fir wiirtschaftligi un bolitischi Eliite un intelläktuälli Voordänker*ne uusböue.

D Dräffe uf Tafaas giltet Globalisierigskritiker*ne as Simbool derfiir, wie ne neoliberaali Eliite iber d Chepf vu dr Bedroffenen ewäg d Macht uusiebe duet un isch all Joor Zyyl vu Broteschtakzioone. Anne 2012 het dr Schwab sälber s Teema Kapitalismuskritik uf d Daagesoornig gsetzt ghaa.[5]

S Wältwiirtschaftsfoorum organisiert au wältwyt regionaali Kumferänze un publiziert Briicht. Dr eerscht isch anne 1979 dr Global Competitiveness Report gsii, wu s Wältwiirtschaftsfoorum syterhäär all Joor uusegit. Är duet iber d Wettbewäärbsfähigkait vu dr bedriibswiirtschaftlige Braxis in aller Wält briichte.

Im Mai 2024 het dr Klaus Schwab verchindet, ass er si us em Daagesgschäft vum Wältwiirtschaftsfoorum zruggziet, was Frooge iber d Zuechumft vu dr Tafaaser Kumferänz ufgwoorfe het.[6] Am 21. April 2025 het me sy sofoortige Ruggdritt as Voorsitzer vum Stiftigsroot verchindet. As Iibergang ibernimmt dr stellverdrättend Voorsitzer Peter Brabeck-Letmathe där Poschte.[7]

Familie

[ändere | Quälltäxt bearbeite]

Em Schwab sy Vater Eugen het schwyzerischi Wuurzle gha un isch anne 1899 z Roggwil im Kanton Bärn uf d Wält chuu. Sy Grossmueter vu dr Vatersyte häär isch Schwyzeri gsii, sy Grossvater vu dr Vatersyte häär aber isch vu Chaarlsrue gsii, wäge däm het em Klaus Schwab sy Vater s Buurgerräächt vum doomoolige Grooßhärzoogduum Baade ghaa un isch z Chaarlsrue ufgwagse.

Em Schwab sy eltere Halbbrueder un sy jingere Brueder sin Schwyzer, derwyylscht äär ain vu dr weenige in dr Familie ooni Schwyzer Buurgerräächt isch. Anne 1950 het dr Eugen Schwab vu Dytschland uus versuecht Schwyzer z wääre, dooderzue het er en Aadraag us Aawändig vun ere Sunderbstimmig im Staatsbuurgerräächt gstellt, wu zue me Verfaare bis zum Bundesgriicht z Lausanne gfiert ghaa het. Dr Aadraag isch abgläänt woore un em Schwab sy Vater isch ufgfoorderet woore, dr Wääg iber s normaal, kumplizierter Yybuurgerigsverfaare z goo. Des Fiasko sei dr Grund, wurum dr Klaus Schwab nie dr Schwyzer Bass beaadrait heeb.[3]

Dr Schwab isch syter anne 1971 mit dr Hilde Schwab ghyroote. S Baar läbt in dr Schwyz un het zwai Chinder, d Nicole Schwab, Mitgrinderi vum Gender Equality Project vu 2009, un dr Olivier Schwab, wu s WEF-Biro z Peking laite duet.[8][9]

Dr Kanton Graubünde het dr Klaus Schwab fir syni Verdienscht s Schwyzer Buurgerräächt un doodermit dr Schwyzer Bass noch em kantonaale Buurgerräächtsgsetz welle verleie. Im Septämber 2019 het dr Schwyzer Bundesbresidänt Ueli Maurer (SVP) d Idee im Bundesroot yybrocht. Drotz ass em Schwab sy Vater in dr Schwyz uf d Wält chuu un sy Mueter Zürcheri gsii isch, isch di designiert Bundesbresidänti Simonetta Sommaruga (SP) nit waarm woore mit däre Idee. No Meediebriicht het s doo nääbe räächtlige au bolitischi Grind derfiir gee, wel em Schwab sy Wältwiirtschaftsgipfel (WEF) in ire Bartei (SP) umstritte sei. Näb dr SP isch au dr SVP-Barteibresidänt Albert Rösti dergeege gsii, är het gfunde, e staatligi Eerig sei «uuschwyzerisch». Au s Bundesamt fir Juschtiz us em Departemänt vu dr Karin Keller-Sutter (FDP) het d Buurgerräächtsvergaab abgläänt.[9]

Schrifte

[ändere | Quälltäxt bearbeite]
  • Der längerfristige Exportkredit als betriebswirtschaftliches Problem des Maschinenbaues (untersucht am Beispiel der Bundesrepublik Deutschland), Offenbach 1965 (zugleich Dissertation der ETH Zürich)
  • Der Exportkredit. Hinweise für den deutschen Exporteur, Frankfurt am Main 1966
  • Öffentliche Investitionen und wirtschaftliches Wachstum, Ravensburg 1966 (zugleich Dissertation der Universität Freiburg)
  • Moderne Unternehmensführung im Maschinenbau (mit Hein Kroos), Maschinenbau-Verlag, Frankfurt/Main 1971.
  • Chancenmanagement. VDI-Verlag, Düsseldorf 1976, ISBN 3-18-400333-7.
  • Overcoming indifference. Ten key challenges in today’s changing world. A survey of ideas and proposals for action on the threshold of the twenty-first century (Herausgeberschaft), New York 1995
  • The Fourth Industrial Revolution, 2016 (book on demand). dt.: Die Vierte Industrielle Revolution. Aus dem Englischen von Petra Pyka und Thorsten Schmidt, Pantheon Verlag, München 2016. ISBN 978-3-570-55345-9.
  • mit Thierry Malleret: COVID-19: The Great Reset. Lightning Source, Genf 2020, ISBN 978-2-940631-12-4.
  • mit Thierry Malleret: COVID-19: Der große Umbruch. Forum Publishing, Genf 2020, ISBN 978-2-940631-19-3.

Uusglääseni Eerige

[ändere | Quälltäxt bearbeite]
  • 1988: Bundesverdienschtchryz vu dr Bundesrepublik Dytschland
  • 1995: Grooß Bundesverdienschtchryz vu dr Bundesrepublik Dytschland
  • 1997: Ritter vu dr Eerelegioon, Frankryych
  • 1997: Oorde vu dr Freihait vu dr Republik Sloweenie in Bronze
  • 1997: Grooß Guldi Eerezaiche fir Verdienscht um d Republik Eeschtryych[10]
  • 1999: Eerebuurger vu dr Landschaft Tafaas[11]
  • 2002: Verdienschtoorde vu dr Republik Poole
  • 2002: Oorde vu dr Fryndschaft, Kasachstan
  • 2003: Oorde Stara Planina I. Klass, Bulgaarie
  • 2006: Knight Commander vum Order of St Michael and St George, Grooßbritannie
  • 2007: Eerebuurger vu Dalian, Chiina
  • 2012: Oorde vum Azteekische Aadler, Mexiko
  • 2012: Grooß Verdienschtchryz mit Stäärn vu dr Bundesrepublik Dytschland
  • 2013: Oorde vu dr Ufgände Sunne, 1. Klass, Jaapan[12]
  • 2016: Reinhard-Mohn-Bryys
  • 2018: Wältwiirtschaftlige Bryys, Kiel
  • 2018: Fryndschaftsmedaille fir dr Yysatz in dr Refoorm- un Effnigsbolitik vu Chiina[13]

Literatuur

[ändere | Quälltäxt bearbeite]
  • Joachim Dorfs, Claus Larass: „Ich sehe mich fast als Künstler“. Der Davos-Gründer Klaus Schwab. In: Bernd Ziesemer (Hrsg.): Pioniere der deutschen Wirtschaft. Campus, Frankfurt am Main 2006, ISBN 3-593-38121-4, S. 113–124.
  • Klaus Schwab im Munzinger-Archiv (Artikelaafang frei abruefbar).

Film

[ändere | Quälltäxt bearbeite]
  • Das Forum, Dokumäntaarfilm vum Marcus Vetter (2019)
[ändere | Quälltäxt bearbeite]
 Commons: Klaus Schwab – Sammlig vo Multimediadateie

Fueßnote

[ändere | Quälltäxt bearbeite]
  1. ↑ Renardo Schlegelmilch: Pfarrer in Davos über das Weltwirtschaftsforum. „Das katholische Element kommt auch zum Tragen.“ Interview mit em Dekaan Kurt Benedikt Susak (kadoolischi Bfarrei uf Tafaas). In: domradio.de. 22. Jänner 2020.
  2. ↑ Patrik Müller, Andreas Maurer: Ein unmögliches Geschenk: Weshalb die Einbürgerung von WEF-Gründer Klaus Schwab scheitern wird. Aargauer Zeitung, 20. Augschte 2019.
  3. ↑ 3,0 3,1 Jürgen Dunsch: Gastgeber der Mächtigen: Klaus Schwab und das Weltwirtschaftsforum in Davos. FinanzBuch Verlag, 2016, ISBN 978-3-89879-985-0, S. 26f.
  4. ↑ Erwin R. Müller: World Economic Forum Davos/1: Erwin R. Müller über Professor Klaus Schwab. Kein Träumer, sondern ein Realisator. In: Politik und Wirtschaft. Band 2, 1987, ISSN 1422-1985, S. 88–91, doo S. 89.
  5. ↑ Carsten Knop: Vertrauensverlust und Kapitalismuskritik. FAZ, 28. Jänner 2012.
  6. ↑ Sam Jones: Klaus Schwab’s step back prompts fresh questions over Davos. In: Financial Times. 30. Mai 2024, abgruefen am 18. August 2024.
  7. ↑ Weltwirtschaftsforum (WEF) - WEF-Vorsitzender Klaus Schwab erklärt sofortigen Rücktritt. In: srf.ch. 21. April 2025, abgruefen am 21. April 2025.
  8. ↑ Sylvie Bernaudon: Les 20 femmes qui font la Suisse. In: bilan.ch, 31. Mai 2012 (französisch).
  9. ↑ 9,0 9,1 Stefan Barmettler: Klaus Schwab und das Schweizer Bürgerrecht: Ein Berner Irrlauf. In: handelszeitung.ch, 14. November 2019.
  10. ↑ Anfragebeantwortung. Abgruefen am 25. August 2024.
  11. ↑ WEF-Gründer Klaus Schwab erhält keinen Schweizer Pass. Handelszeitung, 12. November 2019.
  12. ↑ 2013 Autumn Conferment of Decorations on Foreign Nationals, Internetseite des japanischen Außenministeriums (englisch).
  13. ↑ 改革开放40年，获“中国改革友谊奖章”的十个外国友人是谁_澎湃国际_澎湃新闻 – The Paper. Abgruefen am 18. Dezember 2018.
Dä Artikel basiert uff ere fräie Übersetzig vu dere Version vum Artikel „Klaus_Schwab“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Klaus_Schwab&oldid=1071058"