Katharina Seifried

D Katharina Seifried (* 29. Mai 1904 z Bad Vilbel oder z Frankfurt am Main as Katharina Letsch; † 16. Meerz 1991 z Fryburg) isch e dytschi Bolitikeri (KPD) gsii.

Lääbe

D Katharina Seifried isch as eltschts Chind in ere 10-chepfige Aarbaiterfamilie uf d Wält chuu un isch z Frankfur am Main uf d Volksschuel gange. Ire Vater isch SPD-Mitgliid gsii, si isch anne 1928 au dr SPD byydrätte. Im Dezämber 1931 isch si zue dr KPD gwägslet. As aktiiv Mitgliid het si in effetlige Versammlige geege dr Nazionaalsozialismus gschwätzt, si isch au Mitgliid vu dr Revolutioneere Gwäärkschafts-Opposizioon (RGO) un vu dr Roote Hilf gsii. Im Zämehang mit dr Dischkessioon um dr Böu vu Panzerchryzer, wu fir sii ne Voorberaitig uf e Chrieg bedytet het, isch si am 23. Augschte 1932 wäge „politischen Aufruhrs und Zusammenrottung“ zue aacht Moonet Gfängnis un am 3. Oktoober 1932 wäge „übler Nachrede“ zue drei Mooent Gfängnis veruurdailt woore. Die boode Haftstroofe sin ere dur s Amneschtygsetz vum 20. Dezämber 1932 erloo woore. Wu NADAP an d Macht chuu isch, isch si per Steckbrief gsuecht woore un het mieße im Meerz 1933 in Unterrgrund goo. Si het um des Zyt z Halberstadt gwoont, iri Woonig isch vu dr SA verwieschtet woore. Gläbt het si derno as Huusiereri. Am 13. Oktoober 1933 isch si z Leipzig verhaftet un ins KZ Hohnstein broocht woore. Deert isch si schwäär mishandelt woore, si het si nie mee ganz doodervu erhoolt. Schwäär chrank isch si am 14. April 1934 entloo woore. Im Juuli 1934 isch si nomool fir zwoo Wuche verhalftet woore.

Vu 1935 bis 1940 het d Seifried z Minche gläbt, si het vylmool d Woonig gwägslet, ass me si nimi het chenne verhafte. In ere eerschte Ee isch si ab 1968 mit em Günther Thomas ghyroote gsii. Anne 1939 het si in ere zwoote Ee dr Karl Seifried ghyroote. Mit irem Mann isch si anne 1940 uf Lindou zooge. Noch em Chrieg isch ire Mann as as Chriegsgfangene an der Kanaalkischte zum Ruume vu Miine yygsetzt woore, wun er 1946 verunglickt isch.

Ab 1946 het si z Fryburg mitghulfe, d KPD neu zu organisieren. Si isch vu 1946 bis 1947 Mitgliid vu dr Berootende Landesversammlig vum Land Baade gsii un isch 1947 as Abgoorneti fir d KPD in Baadische Landdaag gweelt woore. Im Juuni 1951 het si ire Landdaagsmandaat niiderglait. Bis zum KPD-Verbot 1956 isch si Kummunaalbolitikeri im Stadtroot un im KRaisdaag gsii. Noch em Verbot vu dr Bartei het si si in usserbarlemäntaarische Organisazioone engaschiert. Anne 1968 isch si Mitgliid vu dr nei grindete DKP woore.

Literatuur

• Ina Hochreuther: Frauen im Parlament. Südwestdeutsche Abgeordnete seit 1919. Im Auftrag des Landtags herausgegeben von der Landeszentrale für politische Bildung. Theiss-Verlag, Stuttgart 1992, ISBN 3-8062-1012-8, S. 116f.

Weblink

• d Katharina Seifried uf landtag-bw.de