Internazionaale Daag fir d Abschaffig vu Gwalt geege Fraue

Dr Internazionaal Daag fir d Abschaffig vu Gwalt geege Fraue, au Internazionaal Daag geege Gwalt an Fraue, dytsch Internationale Tag zur Beseitigung von Gewalt gegen Frauen, franzeesisch Journée internationale pour l'élimination de la violence à l'égard des femmes, änglisch International Day for the Elimination of Violence against Women, isch e Maandaag fir dr Kampf geege Dischkriminierig un Gwalt gewege Fraue un Maidli, wu all Joor am 25. Novämber abghalte wiird.^[1]

D Faarb Oraasch simbelisiert doo ne Zuechumft ooni Gwalt geege Fraue. Si isch im Zuug vu dr Orange-the-World-Kampagne, wu vu dr Verainte Nazioone iniziiert wooren isch, feschtglait woore.^[2]

Gschiicht

Syt 1981 organisiere Mänscheräächtsorganisazioone wie z. B. Terre des Femmes oder Zonta International all Joor zum 25. Novämber Veraastaltige, wu d s Yyhalte vu Mänscheräächt gegeniiber Frau un Maidli zum Teema hän. Zyyl isch d Steerkig vu Fraueräächt. Im Mittelpunkt steen vor allem Teemene wie Zwangsproschtituzioon, säxuälle Missbruuch, Säxturismus, Vergwaltigung, Bschnyydig vu Frauen, hyylig Gwalt, Zwangshyroote, gschläächtsselektiivi Abdryybig, wyybligi Armuet, Femizid usw. Derzue soööe Brogramm unterstitzt wääre, wu si fir d Glyychstellig vu Frauen yysetze, u. a. bi Eerbräächt, Bildig, Privaataigeduum, bi aktiivem un passiivem Waalräächt, Kreditwiirdigkait, Räächtsfähigkait, Zuegang zur Juschtiz un bi nit zaalte Aarbet.

Hintergrund fir däär Akzioonsdaag isch dr Fall Mirabal gsii. D Schweschtere Mirabal, Mitgliider vu dr Movimiento Revolucionario 14 de Junio, sin am 25. Novämber 1960 in dr Dominikaanische Republik vum Militeer vum Diktaator Rafael Trujillo verschlaipft un dood gschlaa woore. 1981 isch bi me Dräffe vu latyynamerikanische un kariibische Feminischtene dr 25. Novämber zum Maandaag vu dr Opfer vu Gwalt an Fraue uusgruefe woore (Dia Internacional de la No Violencia Contra la Mujer) un 1999 offiziäll dur di Verainte Nazioone (Resoluzioon 54/134) ufgriffe woore.^[3] D UN-Kampagne „Orange The World“ macht syter 1991 uf Gwalt ufmeerksam, vum Internazionaale Daag fir d Abschaffig vu Gwalt geege Fraue am 25. Novämber bis zum 10. Dezämber, em Daag vu dr Mänscheräächt. Si isch syter 2008 Dail vu dr „UNiTE to End Violence against Women“ Kampagne vum UN-Generaalsekreteer, wu vu UN Women duuregfiert wiird.