Heutrégiville

Heutrégiville
Heutrégiville (Frankreich) Heutrégiville
Region	Grand Est
Département	Marne
Arrondissement	Reims
Kanton	Bourgogne-Fresne
Kommünàlverbànd	Grand Reims
Koordinàte	49° 20′ N, 4° 16′ O49.3266666666674.2619444444444
Heche	81–162 m
Flech	11,62 km2
Iiwohner	483 (1. Jänner 2020)
Bevelkerungsdicht	42 Iiw./km2
Code Postal	51110
INSEE-Code	51293
Website	mairieheutregiville.fr

Dialäkt: Mìlhüüserdiitsch

Heutrégiville [øtʁeʒivil] ìsch a frànzeescha G’mainda mìt 483 Iiwoohner (Schtànd: 1. Januar 2020) ìm Département Marne ìn dr Regioon Grand Est. Sa g’heert zem Arrondissement Reims un ìsch Mìtglììd ìm G’maindaverbànd Communauté urbaine du Grand Reims.

wu dr Nàmma haar ìsch

Ìm Làuif vu dr G’schìcht hàt sìch dr Dorfnàmma-n-asoo uff Làtiinisch un Àltfrànzeesch, schpeeter uff Frànzeesch äntwìckelt:

• Huldriciaca Villa (ìm 6. Joohrhundert ìn’ra Ukrunda vum Flodoard)
• Ad Suppiam in Hildrizei Villa, Uldrizei Villa (ìm friahja 11. Joohrhundert)
• Houdrisivilla (ànna 1181)
• Huldrisivilla (ànna 1217)
• Hondrisevilla (um 1260)
• Heudrésiville (ànna 1303)
• Houdrisiville (ànna 1309)
• Heudresivilla (ànna 1303/12)
• Heudezierville (ànna 1328)
• Heudrisiville (ànna 1384)
• Heudriville, Heudreville (ànna 1384)
• Heudrissivilla (ànna 1390) (arch. adm. de Reims, t. III, p. 769)
• Heudrisgivilla (ìm 14. Joohrhundert)
• Heudrezivilla (ànna 1433)
• Heudregisville, Heuderegivaille, Heudreguiville (ànna 1556)
• Utergiville, Utregiville (ànna 1676)
• Heudréziville (ànna 1733)
• Hutrégiville (ànna 1779)

Wahrend dr Frànzeescha Revoluzioon hàt m’r dr G’maindanàmma zwaimol g’andert: ànna 1793 ìsch sa Heutregeville g’nännt worra, un Hentrégeville ànna 1801, vor äbb sa àm And vu dr Revoluzioon wììder ìn Heutrégiville umtaift worra-n-ìsch.

D’ Iiwoohner nännt m’r hìtt Huldériquois [yldeʁikwa] (fìr d’ Manner) un Huldériquoises [yldeʁikwaz] (fìr d’ Fràuija) uff Frànzeesch.

wu ’s lììgt

Heutrégiville lììgt äbba 18 Kilomeeter nord-nordeeschtlig vu Reims àm neerdliga Rànd vum Département Marne àn dr Granz zem noochberliga Ardenna-Departement. D’ G’mainda b’fìndet sìch domìt ìm Norda vu dr histoorischa Prowìnz Champagne. Sa lììgt ìm Iigzuugsgebiat vu dr Seine un wìrd vu dr Suippe ìn’ma braita Tààl vu Süüdoscht uff Nordwäscht duurakweert. Üsserdam fliasst dr Ruisseau d’Aussonce vu Nordoscht uff Süüdwäscht durs G’maindagebiat un mìndet ìn d’ Suippe. S’ Zäntrum lììgt uff’ra Heecha vun äbba 90 Meeter, s’ Tààl vu dr Suippe äbba fìmf Heechameeter diafer. S’ G’land schtaigt uff Süüdwäschta uff äbba 130 Meeter àà, uff Süüdoschta uff ìwwer 140 Meeter àà, un uff Oschta bis àm Mont de Pontfaverger uff 162 Meeter àà.

A Tail vum Gebiat vu Heutrégiville g’heert züa da baida ZNIEFF-Nàtüürzoona „Marais boisé de Vaudetré à Warmeriville“ (210008902) un „Bois Lapie à Aussance et Pontfaverger-Moronvilliers“ (210020037)

Äbba 89 Prozant vu dr G’mainda waara fìr d’ Làndwìrtschàft b’nutzt, äbba 8 Prozant sìnn b’wàlda, b’sunderscht äntlàng vu dr Suippe (Schtànd: 2018).

Umgaa wìrd Heutrégiville vu da Noochberg’mainda Warmeriville ìm Norda un Nordwäschta, Aussonce (Ardenna-Département) ìm Oschta un Nordoschta, Selles ìm Süüda un Süüdoschta, Saint-Masmes ìm Süüda so wia Lavannes ìm Wäschta un Süüdwäschta.

G’schìcht

Àm And vum Äärschta Waltkriag ìsch s’ Dorf vollschtandig zärschteert worra. Nooh-n-em Kriag ìsch d’ G’mainda vu dr frànzeescha Regiarung àm 1. Oktoower 1920 mìt’m Kriagskriiz 1914–18 üsszaichnet worra.

Ànna 2021 hàt m’r z’ Heutrégiville fìr dr Farnsahsander Canal+ a Kurzfilm dräijt, wo vum Fàmìlia- un Dorflaawa reedet.

wia sìch d’ Beveelkerung äntwìckelt hàt

Joohr	1962	1968	1975	1982	1990	1999	2006	2013	2020
Iiwoohner	270	281	271	279	299	393	376	399	483
Kwalla: Cassini un INSEE

wàs doo z’ sah ìsch

• d’ näiromàànischa, reemisch-kàthoolischa Mària-Màgdaleena-Kìrìch (église Sainte-Marie-Madeleine), wo ànna 1926 iig’wäijt worra-n-ìsch. Sa lììgt àn dr Schtälla vu dr ehamooliga Màgdaleenakìrìch, wo üss’m 14. Joohrhundert g’schtàmmt hàt un ànna 1918 g’schprängt worra-n-ìsch. Ìn dr hìttiga Kìrìch ìsch dr schtainiga Tàuifbäcka üss’m 11. odd’r’m 12. Joohrhundert bii da Histoorischa Dankmooler iitrajt, wo-n-a nàzionààla Bediitung hann. Üsserdam schteehn dräi Kunschtwark bii da Histoorischa Dankmooler, wo-n-a regionààla Bediitung hann: D’ Holzschtàtüüta vum Jesüs Krìschtüs, wo düat uffärschteeh (üss’m 18. Joohrhundert), so wia d’ zwai fàrwiga Holzschtàtüüta vum hl. Johànnis em Taifer un vu dr hl. Kàthariina, wo vum 17. odd’r vum 18. Joohrhundert schtàmma. Zallamols hàt’s àui ìn dr Kìrìch a schtainiga Pietà üss’m 16. Joohrhundert gaa, wo bii da Histoorischa Dankmooler mìt’ra nàzionààla Bediitung iig’schtuuft gsìì ìsch, wo àwwer ìm Äärschta Waltkriag zärschteert worra-n-ìsch.
• s’ Kriagerdankmool vum Äärschta Waltkriag, wo àm 19. Nowamber 1922 uff’m näija G’maindafrììdhoof iig’wäijt worra-n-ìsch, un wo hìtt àn dr Nordüssfàhrt vum Dorf schteht.
• a Getraidamììhla àn dr Suippe, wo ànna 1842 ärrìchta un ìm Äärschta Waltkriag zärschteert worra-n-ìsch. Ar ìsch ànna 1922 wììder uffbàuija worra. D’ Mììhla ìsch hìtt a Prìwààtaigaschàft, un m’r kààt sììe jeedsjoohr ìm Bruchmoneet b’sìchtiga.
• ìm Dorf sìnn vììla Bliahma z’ sah. Ànna 2023 hàt s’ Dorf d’ Üsszaichnung „Aina Blüama“ bikumma, ìm Rààhma vum Wättb’warb vu da Schtädt un Derfer, wo mìt Bliama g’schmìckt sìnn. Schuu-n-ànna 2016 ìsch d’ G’mainda bii dam Wättb’warb mìt’ra „Blüama“ üsszaichnet worra gsìì.

• 
  d’ Màgdaleenakìrìch
• 
  wia d’ ehamooliga Kìrìch ànna 1910 üssg’sah hàt
• 
  wia d’ ehamooliga Kìrìch mìt ìhrem Portààl ànna 1910 üssg’sah hàt
• 
  dr Pont de Coq
• 
  d’ Getraidamììhla àn dr Suippe
• 
  dr Sàmmelbäcka vu dr Mììhla àn dr Suippe
• 
  d’ Grand’Rue uff’ra Ààsìchtskàrta, friahj ìm 20. Joohrhundert

Verkeehr

Heutrégiville lììgt bii groossa Verkeehrsàcksa. D’ Departementsschtrooss D 20 fààhrt äntlàng vu dr Suippe un verbìndet s’ Zäntrum mìt Warmeriville ìm Nordwäschta un mìt Saint-Masmes ìm Süüda. D’ Schtrooss D 33 verbìndet d’ G’mainda mìt Aussonce ìm Nordoschta un mìt Époye ìwwer Saint-Masmes ìm Süüda.

Àm 12. Mai 2023 ìsch z’ Heutrégiville a Füassganger- un Fààhrrààdwaag iig’wäjt worra. Ar ìsch äbba 1,5 Kilomeeter làng un fiahrt uff Isles-sur-Suippe fiahrt. D’ Àrweeta fìr dr Waag ààleega hann ìnsg’sàmt 250.000 Öiro koschta.

Lìteràtüür zem Ort

• Pierre Bosc: Histoire d’Heutrégiville. In: Champagne-généalogie. Nr. 94, 2002, S. 48–53 (französisch). 
• Pierre Bosc: Histoire d’Heutrégiville. In: Champagne-généalogie. Nr. 95, 2002, S. 134–141 (französisch). 
• Pierre-Maximilien Bosc: Statistique, topographie, archives, histoire d’Heutrégiville. In: Champagne-généalogie. Nr. 92/95, 2002, S. 134–141 (französisch). 
• Abbé Chevallier, Abbé Bosc: Notice historique sur Heutrégiville. 1906 (französisch, 82 S.). 
• J. Dupuis: Trouvaille de monnaies romaines à Heutrégiville. In: Bulletin de la Société archéologique champenoise. Band 25, 1931, S. 9 (französisch). 
• Jacqueline Metz-Legay: Visite du moulin d’Heutrégiville, le samedi 1er octobre 2022. In: Entre Deux Terroirs, pages d’histoire du massif de Saint-Thierry. Nr. 114, Januar 2023, S. 4–5 (französisch). 
• G. Robert: La charte d’Heutrégiville et Saint-Masmes. In: Nouvelle Revue de Champagne et de Brie. Band 12, 1934, S. 116–117 (französisch). 

Lüag àui

• d’ Lischta vu da G’mainda ìm Département Marne

Weblìnks

 Commons: Heutrégiville – Sammlig vo Multimediadateie

• Websitta vu dr G’mainda Heutrégiville (frànzeesch)
• Schtàtistik züa dr G’mainda Heutrégiville biim INSEE (frànzeesch)
• Informàzioona züa dr G’mainda Heutrégiville ìn dr Dààtabànk vu dr LdH/EHESS/Cassini (frànzeesch)