Harare

Harare
Harare (Simbabwe)
Koordinate	17° 50′ S, 31° 3′ O-17.82531.05
Symbole
Wappe Wappe Fahne Fahne
Basisdate
Staat	Simbabwe
Stadt mit Provinzstatus	Harare
Höchi	1490 m
Flechi	660 km²
Iiwooner	1.491.754 (2022)
Dichti	2.260,2 Ew./km²
Gründig	1890 als Fort SalisburyVorlage:Infobox Ort/Wartung/Datum
Politik
Bürgermeister	Jacob Mafume
Kultur
Partnerstedt	Äthiopie, Addis Abeba Vereinigte Staaten Vereinigti Staate, Cincinnati China Volksrepublik Volksrepublik China, Guangzhou Russland Russland, Kasan Deutschland Dytschland, München Vereinigtes Konigreich Vereinigts Königriich, Nottingham

Dialäkt: Züritüütsch

Harare [haˈraːrə], bis 1982 Salisbury, isch di grööschti Stadt und Hauptstadt vo Simbabwe. Sie liit ide Harare Province im nördliche Zentrum vom Land. Usserdem isch sie eine vode Urbane Distrikt vo Simbabwe. Im Stadtgebiet läbed öppe 1,5 Millione Mensche (Volkszälig 2022), im Balligsruum sinds öppe 2,4 Millione (2022). De grööscht Vorort isch Chitungwiza südlich vom Flughafe Harare International mit rund 370.000 Iiwohnende (2022).

Geografie

Geografischi Laag

Harare liit im nordöschtliche Drittel vo Simbabwe. D Stadt hät di geografische Koordinate 17° 50′ südlicher Breiti und 31° 3′ öschtlicher Längi und liit ufere Flächi vo 660 km², öppe 1490 Höhemeter überem Meeresspiegel. Det isch au e Wasserscheidi zwüschet de Flüss Mazowe und Hunyani. D Umgebig vode Stadt isch vo Trochensavanne kännzeichnet.

Im Süde gränzt d Stadt ad Distrikt Epworth Urban und Harare Rural mitem Flughafe und im Norde a Mazowe ide Provinz Mashonaland Central. Im Oschte gränzt sie a Goromonzi und Ruwa Urban ide Provinz Mashonaland East und im Weschte a Zvimba ide Provinz Mashonaland West.

Klima

Harare liit ide tropische Klimazone, di jährlich Durchschnittstemperatur vo 18,0 °C isch aber für die Klimazone relativ nidrig. De Grund dadefür isch, dass Harare 1490 Meter höch liit und dademit ide Chalttrope. Di durchschnittlich Tagestemperatur liit im Januar bi 25,7 °C und im Juli bi 13,6 °C. Di wärmschte Mönet sind Oktober und November mit durchschnittlich 21,5 °C und di cheltischte Juni und Juli mit durchschnittlich 13,8 °C und 13,6 °C. De durchschnittlich Jahresniderschlag liit bi 863 Millimeter, die Mängi fallt aber a nume 92 Rägetäg im Jahr. Am meischte Niderschlag fallt im Januar mit durchschnittlich 213 Millimeter, am wenigschte im Juli mit durchschnittlich 1 Millimeter.

Harare
Klimadiagramm
J F M A M J J A S O N D     187   26 16     157   26 16     96   26 15     38   25 12     10   23 9     4   21 6     1   21 6     3   24 7     8   27 11     34   28 13     96   27 15     171   26 16 Temperatur in °C,  Niederschlag in mm Quelle: wetterkontor.de

Monatlichi Durchschnittstemperature und -niderschläg für Harare Jan Feb Mär Apr Mai Jun Jul Aug Sep Okt Nov Dez Max. Temperatur (°C) 26,3 25,8 26,2 25,3 23,4 21,4 21,4 23,7 26,8 28,2 27,4 26,2 Ø 25,2 Min. Temperatur (°C) 15,8 15,6 14,5 12,3 8,8 6,1 5,5 7,4 10,5 13,4 15,0 15,7 Ø 11,7 Niderschlag (mm) 187 157 96 38 10 4 1 3 8 34 96 171 Σ 805 Sunnenstunde (h/d) 7 6,8 7,5 8,3 8,7 8,8 9,0 9,7 9,8 9,2 7,7 6,4 Ø 8,2 Regetäg (d) 14 13 10 5 1 0 0 1 1 4 8 14 Σ 71 Luftfüchtigkeit (%) 76 77 72 67 62 60 55 50 45 48 63 73 Ø 62,3 T e m p e r a t u r 26,3 15,8 25,8 15,6 26,2 14,5 25,3 12,3 23,4 8,8 21,4 6,1 21,4 5,5 23,7 7,4 26,8 10,5 28,2 13,4 27,4 15,0 26,2 15,7 Jan Feb Mär Apr Mai Jun Jul Aug Sep Okt Nov Dez N i e d e r s c h l a g 187 157 96 38 10 4 1 3 8 34 96 171   Jan Feb Mär Apr Mai Jun Jul Aug Sep Okt Nov Dez Quelle: wetterkontor.de

Gschicht

Salisbury 1930

Stadtzentrum. Samora-Machel-Avenue gäge Weschte, 1995

Harare isch am 12. September 1890 underem Name Fort Salisbury gründet worde vom Cecil Rhodes bzw. vo de British South Africa Company woner gfüert hät, ufem Gebiet vom Shona-Häuptling Neharawa. A dem Ort isch hützutags de African Union Square. De Rhodes hät d Stadt nachem britische Premierminister Lord Salisbury benännt. D Gmeind isch 1897 gschaffe worde. 1923 hät s Fort de Sitz vode Kolonialregierig übercho und dademit au d Stadtrecht. Zwüschet 1953 und 1963 isch Salisbury d Hauptstadt vode Föderation vo Rhodesie und Njassaland gsi.

Zum zweite Jahrestag vode Unabhängigkeit vo Simbabwe hät d Stadt am 18. April 1982 de neui Name „Harare“ aagnoo, en abgwandleti Form vo Neharawa.

Endi Mai 2005 hät d Regierig vo Simbabwe en umstritteni Uufruum- und Gebäudeabbruchkampagne gstartet, au bekannt als Operation Murambatsvina. Si hät ohni Vorwarnig stattgfunde und de knapp 700.000 Betroffnige sind kei alternativi Wohnige aabbotte worde, drum häts ide internationale Gmeinschaft heftigi Reaktione druf ggää. D Kampagne hät sich vor allem gäg di informelle Märt und Vorstädt grichtet, underem Vorwand, dass sie d Kriminalität und d Chranketsrisike well bekämpfe. D UNO hät da drufabe aabbotte, internationali humanitäri Hilf fürd Opfer z organisiere, d Behörde vom Land händ das aber abglehnt mit de Begründig, es brüüchi kei Hilf vo usse.

Bevölkerigsentwicklig

Jahr	Einwohnerzahl
1950	143.000
1960	248.000
1970	417.000
1980	616.000
1990	1.047.000
2000	1.379.000
2010	1.475.000
2022	1.492.000

Harare vom Ussichtspunkt ufem Kopje-Hügel us

Anglikanischi Chile am African Unity Square

Stadtregierig

In Harare gits en Dachverband vode Bürgerbewegig, d Combined Harare Residents Association (CHRA), wo de Stadtregierig und de Parteie als kritischi Instanz gegenüberstaat.

Provinz

D Provinz Harare grenzt ad Provinz Mashonaland West, Mashonaland East und Mashonaland Central. Zude Provinz Harare ghöred d Hauptstadt Harare mit ihrne ländliche Vorort, dezue no d Städt Epworth und Chitungwiza. Chitungwiza isch di drittgrööschti Stadt vo Simbabwe und e "Schlafstadt" vode Hauptstadt Harare: Di meischte Lüüt wo det woned pendled zum Schaffe uf Harare.

Bürgermeischter sit 1981

D Lischte vode Bürgermeischter sit de Unabhängigkeit vo Simbabwe:

• 1981–1984 Tizirai Gwata
• 1984–1985 Eng Oliver Chidawu
• 1988–1989 Ald. Jabulani Thembani
• 1989–1993 Simon Chikwavaire
• 1993–1995 Charles Tawengwa
• 1995–1996 Tony Gara
• 1996–1998 Solomon Tawengwa
• 2002–2003 Eng Elias Mudzuri
• 2008–2013 Muchadeyi Masunda
• 2013–2018 Bernard Manyenyeni
• 2018–2020 Herbert Gomba
• sitem September 2020 Jacob Mafume

Städtepartnerschafte

Harare hät Partnerschafte mit de folgende Städt:

• Äthiopie, Addis Abeba
• Vereinigte Staaten Vereinigti Staate, Cincinnati
• China Volksrepublik Volksrepublik China, Guangzhou
• Russland Russland, Kasan
• Deutschland Dytschland, München
• Vereinigtes Konigreich Vereinigts Königriich, Nottingham

Wirtschaft

Harare isch s Handelszentrum vom Land. I de Stadt händ jensti Banke und Organisatione ihre Sitz, usserdem au d Börse vo Simbabwe. Es werded in erster Linie Tabak, Baumwule und Zitrusfrücht ghandlet.

Infrastruktur

Verchehr

Mitem internationale Flughafen Harare International und wichtige Schtraasseverbindige isch Harare de Verchehrschnote vo Simbabwe.

Schtraasseverchehr

Es füered sächs Fernschtraasse uf Harare. Durd Stadt dure verlauft de Trans-Africa Highway Nr. 9 vo Beira uf Lobito. Insgesamt hät Harare 5500 km asphaltierti Schtraasse, wo zumene Grossteil in guetem Zuestand sind.

Schineverchehr

De Hauptbahnhof vo Harare isch en Chopfbahnhof wo regelmäässig bedient wird. Det treffed sich d Streckene uf Beira und uf Bulawayo. Im Moment (2024) isch aber de ganzi Personezugverchehr in Simbabwe iigstellt.

Luftfahrt

Öppe 10 km südlich vom Stadtzentrum liit de RG Mugabe International Airport wo 1957 eröffnet worden isch. Will er so höch liit, hät de Flughafe e Start- und Landebahn wo über 4700 Meter lang isch und dademit zude längste vo Afrika ghört.

Gsundheitswäse

Ide Stadt gits mehreri Spitäler und 41 Ambulanze wo sich um di medizinisch Versorgig kümmered. Usserdem gits meh als 100 privati medizinischi Iirichtige. S HI-Virus isch in Harare bsunders wiit verbreitet gsii.

Bildig und Wüsseschaft

Ide Stadt gits 77 Primar- und 76 wiiterfüerendi Schuele, usserdem 11 Bruefsschuele. Es hät au mehreri Hochschuelen und Forschigsiirichtige in Harare, unter anderem:

• University of Zimbabwe
• Harare Institute of Technology
• National Herbarium and Botanic Garden

Ver- und Entsorgig

2014 hät d Stadt es 4500 km langs Abwasserkanalnetz gha wo 75 % vode Iiwohnende dra aagschlosse gsi sind. 2019 sinds scho 5500 km gsi. Di gröscht Kläraalag vode Stadt isch s Klärwerch Firle STW. Es entwässeret Harare mit ere Kapazität vo 144.000 m³ pro Tag in Chiverosee wo öppe 10 km wiiter weschtlich liit. Harare hät insgesamt foif Kläraalage. Im März 2019 hät Simbabwe mit de Sinohydro Corporation en Vertrag über 237 Millione US-Dollar abgschlosse zum vier neui Kläraalage fürd Stadt boue und zum di bestehende Aalage saniere und erwiitere.

Religion

Harare isch de Sitz vode anglikanische Diözese Harare und vom römisch-katholische Erzbistum Harare. Ide 2000er-Jahr häts ide anglikanische Diözese en inneri Spaltig und gwalttätigi staatlichi Repressione ggää, will sie sich mehrheitlich gäg em Robert Mugabe sini autoritäri Herrschaft gstellt hät. Als Übergangsbischof hät sich de Sebastian Bakare vo 2007 bis 2009 um Versöhnig und Rechtsstaatlichkeit bemüet.

Musee

Im Queen Victoria Museum sind Felsmalereie, Gebruuchsgegeständ, Werchzüüg und Waffe us de Gschicht vo Simbabwe usgstellt.

Ide National Gallery of Zimbabwe häts Gmälde, Relief und Plastike us de Moderni.

Sport

De Fuessballclub Black Aces FC, wo 2001 ufglöst worden isch, isch in Harare dihei gsii.

De Harare Sports Club isch eis vo drüü Test-Cricket-Stadie in Simbabwe und eis vode Heimstadie vode simbabwische Cricket-Nationalmannschaft. Unter anderem i dem Stadion isch au de Cricket World Cup 2003 ustreit worde.

Special Olympics Simbabwe hät sin Sitz in Harare.

Weblinks

• Offizielli Website vode Stadt (englisch)

Einzelnachwiis

Dä Artikel basiert uff ere fräie Übersetzig vu dere Version vum Artikel „Harare“ vu de dütsche Wikipedia. E Liste vu de Autore un Versione isch do z finde.