Hanna Sahlfeld-Singer

d Hanna Sahlfeld-Singer (1971)

d Hanna Sahlfeld-Singer (2018)

D Hanna Sahlfeld-Singer (* 17. Oktoober 1943 z Flowil; † 11. Oktoober 2025 z Hannover; Buurgeri vu Nennigkofe) isch e Schwyzer Bolitikeri (SP) gsii. Si het 1971 zue de eerschte elf Frauen im Nazionaalroot gheert.

Lääbe

D Hanna Singer, e Doochter vum Werner Singer, eme Wääbermaischter, un dr Margrith geb. Hohl, ere Huusfrau, isch z Flawil uf d Primaar- un d Sekundaarschuel gange un no uf d Kantoonsschuel z St. Galle. No dr Schuel het si evangeelischi Theology z Züri, z Baasel un z Wien studiert. Noch eme Braktikum z Oberhelffetschwil isch si 1969 ordiniert woore. Am 22. Septämber 1968 het si dr Rolf Sahlfeld ghyroote. Ab em Novämber vum nämlige Joor het si ne Dailzytstell fir bfaaramtligi Aarbet z Aaltstetta ghaa, wu ire Mann Bfaarer gsii isch.

Anne 1970 hat d Hanna Sahlfeld-Singer e Reed zum 1. Augschte iiber s Frauestimmräächt ghalte, wun ere ai Joor speeter – wu des aagnuu gsii isch, hän d Bartei no Kandidatene gsuecht – en Blatz uf dr Lischt vu dr Soziaaldemokraatische Bartei (SP) im Waalkrais St. Galle fir d Nazionaalrootswaale yydrait het. No ire Waal het si wäg em Uusnaameartikel vu 1874 (Artikel 75 Bundesverfassig), wu no us dr Zyt vum Kulturkampf stammt un wu Buurger us em gaischtlige Stand us em Barlemänt uusgschlosse het, iri Aastellig bi dr Chilche mieße ufgee, go ire Mandaat aaznee. Wäge däm isch si bi dr konschtituierende Sitzig vum nei gweelte Barlemänt am 29. Novämber 1971 noonig debyy gsii, ire eerscht Sitzigsdaag het si vierzee Dääg speeter, am 13. Dezämber 1971, ghaa. Si isch mit 28 Joor di jingscht vu dr zwelf Abgoornete vu dr eerschte Generazioon gsii (elf Nazionaalreetene un ai Ständereeti) un isch di eerscht soziaaldemokraatisch Nazionaalreeti vum Kanton St. Galle gsii. Anne 1972 het si ire zwait Chind iiberchuu, doodermit isch si di eerscht Frau gsii, wu un ire Amtszyt im Bundesbarlemänt Mueter wooren isch.

Drotz ire Wiiderwaal 1975 het d Sahlfeld-Singer uf e zwooti Legislatuurperiood verziichtet. Wel ire Mann, wu sy Stell z Aaltstetta ufgee ghaa het, wäg syre dytsche Häärchumft un iirem bolitische Engaschmänt kai Stell as Bfaarer im Kanton St. Galle gfunde ghaa het, isch s Baar zeerscht uf Wil umzooge, vu deert uus isch dr Rolf Sahlfeld in Kanton Züri pändlet. D Familie isch vu Verwandte unterstitzt woore, bis si im Spootjoor 1975 bschlosse ghaa het, in d Bundesrepublik Dytschland umzzie. Vu 1976 bis 2003 isch d Sahlfeld-Singer Schuelbfaareri fir evangeelischi Religioonsleer am Eerzbischeflige Gimnaasium St. Angela u Wipperfürth z Noordrhyy-Weschtfaale gsii. Si het kai Barteiamt me aagnuu, het si aber als fir Entwickligsbolitik un d Ekumeene yygsetzt, so 1981 as Mitgrinderi vu dr Ekumeenische Initiatiiv Wältlaade. Unter anderem fir des Engaschmänt isch si 2003 mit em eerschte Buurgerbryys vu dr CDU Wipperfürth uuszaichnet woore. Im Ruestand isch d Sahlfeld-Singer uf Barsinghausen bi Hannover (Niidersagse) zooge.

Literatuur

• Fabienne Amlinger: Hanna Sahlfeld-Singer. In: Historisches Lexikon vo dr Schwiiz. 12. Juni 2019., mit Foto von Hanna Sahlfeld-Singer
• Susan Boos: Zu früh am richtigen Ort. In: Marina Widmer, Heidi Witzig (Hrsg.): Blütenweiss bis rabenschwarz. St. Galler Frauen – 200 Porträts. Limmat, Zürich 2003, S. 328–329.
• Karl Graf (Hrsg.): Pfarrerinnen und Pfarrer der Evangelisch-reformierten Kirche des Kantons St. Gallen, 1971–2009. Theologischer Verlag Zürich, Zürich 2010, S. 53.

Weblink

• Hanna Sahlfeld-Singer uf dr Websyte vo dr Bundesversammlig
• Publikatione vo und über Hanna Sahlfeld-Singer im Katalog Helveticat vo dr Schwiizerische Nationalbibliothek
• Hanna Sahlfeld-Singer – für viele war sie reine Provokation, SRF-News, 3. Septämber 2021

Fueßnote

Dä Artikel basiert uff ere fräie Übersetzig vu dere Version vum Artikel „Hanna_Sahlfeld-Singer“ vu de dütsche Wikipedia. E Liste vu de Autore un Versione isch do z finde.