Gunther Lehmann (Dichter)

Us der alemannische Wikipedia, der freie Dialäkt-Enzyklopedy

Dr Gunther Lehmann (* 18. Merz 1936 z Lohr) isch e dytsche Architäkt un Dialäktdichter.

Lääbe[ändere | Quälltäxt bearbeite]

Dr Lehmann isch z Lohr ime Huus in dr Goethestroß ufgwachse as Suhn vum Bankchaufmann Hans Lehmann. Är het vu syne Eltere ne humanistischi Bildig kriegt mit Literatur, Musik un Gschicht. Är het Querflete glehrt un isch mit eme Pflanzebstimmigsbuech groß wore. Dr Alldag im Elterehuus hebe altbadischi Grundsätz bregt, wän syy Vater derhaim gsii isch, heb s nume badisch Ässe gee. Sy Mueter isch us em Schwebische chuu.

Noch em Abitur am Lohrer Gimnasium het er an dr Tächnische Hochschuel z Charlsrue bim Egon Eiermann Architäktur gstudiert. Noch em Abschluss as Diplom-Ingenieur het er zerscht no am Lehrstuel gschafft, speter het er z Haidelberch un z Kähl gschafft, Schließli het er si 1964 z Lohr as Architäkt sälbschtändig gmacht. Är het mit syne Mitarbaiter Gebei fir d Induschtry böue un Wohnhyyser, aber au Sportstätte un Schuelgebei. No drei Härzimfarkt, ere Niere- un ere Härzoperazion isch er 1994 in Ränte gange un het het s Biroo an syni Mitarbaiter ibergee.

Syterhär duet er schrybe, uf Hochdytsch un uf Alemannisch, Prosa un Gedicht, nyyn Johr lang jet er au Kolumne uf Alemannisch fir d Lohrer Zytig gschribe. Derzue duet dr Lehmann Musik mache. Är spiilt Gydarre un singt dezue Lieder un macht au Musik mit dr Lohrer Huus- un Stubemusik. Syni Gedicht un Verzellige duet er als uf Lääsige vordrage, au duet er ab un zue Vordreeg halte iber Regionalgschicht. Är isch Mitglid in dr Muettersproch-Gsellschaft (Regionalgruppe Geroldsecker Land) un het au e Zytlang bim Projäkt „Mundart in der Schule“ mitgmacht. Anne 2015 het er Biechli mit Churzgschichte uf Dytsch un Alemannisch unter em Titel „Erlebte Gschichtli un Erinnerunge“ uusegee. . Dr Gunther Lehmann het si scho frie au in dr Bolitik engaschiert. Är isch Grindigsmitglid vu dr Freie Wehler z Lohr gsii, e Zytlang Vorsitzer vum Ortsverband un vu 1984 bis 1989 isch er fir di Freie Wehler im Lohrer Gmairot ghockt.

Är wohnt z Nonnewier in dr ehmolige „Fischerklause“, wun er sälber zue me Fachwärchhuus umböue het. In zwooter Eh isch er ghyrote mit dr Brigitte Lehmann geb. Walter. Mit ihre het er zwai Chinder. Nomol zwai Chinder het er us ere erschte Eh.

Wäärch[ändere | Quälltäxt bearbeite]

  • 1. Erlebte Gschichtli un Erinnerunge 2. Erlebte Geschichten und Erinnerungen. Epubli 2016. 236 S.

Weblink[ändere | Quälltäxt bearbeite]