Frédéric Marquet

dr Frédéric Marquet ànna 2019

Dialäkt: Mìlhüüserdiitsch

Dr Frédéric Marquet [fʁedeʁik maʁkɛ] (* 22. Àwrìl 1974 z’ Mìlhüüsa) ìsch a elsassischer pàrtäilooser Politiker. Ar ìsch zitter 2026 Bìrgermaischter vu Mìlhüüsa.

siina Juugend un B’rüafslaawa

Dr Frédéric Marquet ìsch Schialer àm prìwààta kàthoolischa Gümnààsium Jeanne-d’Arc ìm Mìlhüüser Schtàdtzäntrum gsìì un hàt schpeeter àn dr Wìrtschàftshoochschüal ESSCA z’ Angers g’schtüdiart. Ar hàt z’äärscht ìn dr Schwiiz g’schàfft un ìsch ànna 2002 ìn’ra Mìlhüüser Warwungsàgentüür iig’schtällt worra.

siina Kàrriar ìn Politik

Sii Engaschment ìn dr Politik hàt dr Marquet àls Mìtglììd ìn dr Juugendbeweegung vu dr Rachtspàrtäi „Rassemblement pour la République“ (RPR) ààg’fànga. Ar hàt sìch d’rnooh àn d’ konsärwàtiiwa Pàrtäi „Union pour un Mouvement populaire“ (UMP) un bis 2018 daara Noohfolgera Les Républicains (LR) ààg’schlossa. Wu-n-’r dia Pàrtäi fààraloo hàt, ìsch’r unàbhangig blììwa. Ar ìsch Mìtglììd ìm Äntwìcklungsroot vu dr Mulhouse Alsace Agglomération (M2A) worra un hàt ànna 2005 zamma mìt’m Soziàlìscht Christophe Muller dr Bìrgerverain Mulhouse j’y crois (‚Mìlhüüsa, d’ràà glàuiwi!‘) grìnda un ìsch Mìtglììd vu dam siim Vorschtànd gsìì.

Àn dr G’maindawààhl ànna 2008 ìsch dr Marquet àls Kàndidààt uff dr Lischta vum Jean-Marie Bockel un vum Jean Rottner ìn dr G’maindaroot g’wählt worra — därt ìsch’r fìr Hàndel züaschtandig gsìì. Ar ìsch jedoch ànna 2011 z’rucktratta, fìr schtädtischer Hàndelsmänätscher waara — ar hàt àlso bis 2024 àn dr Witteräntwìcklung vum G’schaftslaawa ìm Schtàdtzäntrum mìtg’màcht. Ìn daara Periooda hàt m’r ìm Schtàdtzäntrum ìwwer 600 G’schafter g’äffnet — bii dana sìnn a Hüüfa unàbhangiga G’schafter gsìì. Fìr sii Biitrààg ìsch dr Marquet ànna 2017 mìt’m Schtàdtzäntrumspriis vu da Zittschrìfta La Gazette des communes un Le Courrier des maires üsszaichnet worra, un ànna 2023 ìsch’r àls „Schtàdtzäntrumsmänätscher vum Joohr“ kreent worra. Ìm Joohr d’ruff ìsch sii Büach Mon dictionnaire de Mulhouse : vibrations d’une ville aux mille facettes ärschììna — ’s ìsch a pärseenlig Wärterbüach vu siinera Haimetschtàdt, wu-n-’r sowoohl um d’ G’schìcht wia àui vu siina aigana Ààschuijunga fìr d’ Züakunft vu dr Schtàdt reedet.

Àm 30. Janner 2025 ìsch’r üss’m Verainsvorschtànd vu Mulhouse j’y crois z’rucktratta, fìr sii Projakt fìr d’ G’maindawààhl vum Joohr d’ruff vorb’raita. Bii dr G’maindawààhl ìm März 2026 ìsch’r pàrtäilooser Kàndidààt gsìì. Sii Progràmm hàt’r àm 15. Septamber 2025 àm Kültüürzäntrum Motoco z’ Durni vorg’schtällt. Ar ìsch àn dr äärschta Wààhlrunda mìt 14,26 Prozant vu da Schtìmma Drìtta worra àwwer hàt àn dr zwaita Wààhlrunda uff a unärwàrtana-n-Àrt d’ ehamooliga Bìrgermaischtera Michèle Lutz un dr Lìnkskàndidààt Loïc Minery mìt 24,07 Prozant vu da Schtìmma g’schlààga.

Àm 27. März 2026 ìsch’r nàdììrlig noh era Wààhl ìm G’maindaroot ìns Bìrgermaischteràmt iig’fiahrt worra.

sunschtig’s

Dr Marquet ìsch um Füassbàll begaischtert.

s’ Büach, wo-n-’r g’schrììwa hàt

• Mon dictionnaire de Mulhouse : vibrations d’une ville aux mille facettes. Médiapop Éditions, 2024, ISBN 978-2-487-66905-5 (französisch, 264 S., Iigschränkti Vorschau uf books.google.de). 

Weblìnks

 Commons: Frédéric Marquet – Sammlig vo Multimediadateie

• em Frédéric Marquet siina Websitta fìr dr Wààhlkàmpf ànna 2026 (frànzeesch)
• a Vorschtällung vum Frédéric Marquet uff dr Websitta vu dr G’maindaverwàltung Mìlhüüsa (frànzeesch)