Esther Petsche

D Esther Petsche (* 1973) isch e Schwyzer Filmmacheri un Graafikeri.

Lääbe

D Petsche isch z Dytschland ufgwagse un läbt syter anne 2000 in dr Schwyz. Noch em Stuudium zur Moodidesaineri het si zwai Joor lang as Kochschtiimassischtänti vu dr Frida Parmeggiani fir d Inszenierig „Der Ring des Nibelungen“ am Ooperehuus Züri unter dr Reschy vum Robert Wilson gschafft. Nyyn Joor lang het si as Kultuurmänätscheri un Brogrammverantwoortligi fr s Kultuurhuus „Unternehmen Mitte“ z Baasel gschafft. Deert het si Uusstellige kunzäptiert un het Lääseraie mit Filmaarbete beglaitet. Glyychzytig het si as freii Graafikeri un Filmmacheri aafange schaffe. In irem filmische Schaffe setzt si si vor allem mit soziaale un ekoloogische Teeme ussenander. Si het u. a. filmischi Ufdraagsaarbete füir dr Dierschutzbund Baasel Regionaal gmacht, d Drumrum-Ruumschuel un s Amt fir Umwält un Energy vum Kanton Baasel-Stadt.

Im Friejoor 2016 het si zäme mit em Schurnalischt Samuel Schlaefli dr Chuurzdokumäntaarfilm „The climate changers“ iber di ziviilgsellschaftlige Aktiviteete zue dr Klimakonferenz COP21 z Paris gmacht, wu im Rame vu dr „official selection“ vum „9th International Kuala Lumpur Eco Film Festival“ zaigt wooren isch. Im Meerz 2019 isch dr gmainsaam Film „Die Friedensköche am Rio Napo“ (The amazon changers – cook to empower) iber Eelfeerderig un Verdryybig vu indigeene Gruppe am Rio Napo im Amazonasbiet z Ecuador un kommunaale Ekoturismus as Alternatiiv zur Verwieschtig vum troopische Räägewald uusechuu. Dr Dokumäntaarfilm isch wältwyt an verschiidene Filmfeschtiwäl zaigt woore un het im Oktoober 2019 sy Schwyzer Premiere gfyyrt.

D Petsche läbt un schafft z Baasel.

Weblink

• Websyte vu dr Esther Petsche
• Esther Petsche in dr Internet Movie Database

Fueßnote

Dä Artikel basiert uff ere fräie Übersetzig vu dere Version vum Artikel „Esther_Petsche“ vu de dütsche Wikipedia. E Liste vu de Autore un Versione isch do z finde.