Emmy Diemer-Nicolaus

D Emmy Diemer-Nicolaus, geb. Nicolaus (* 31. Jänner 1910 z Gießen; † 1. Jänner 2008 z Stuegert) isch e dytschi Jurischti un Bolitikeri (FDP/DVP) gsii.

Familie, Uusbildig un Beruef

D Emmy Diemer-Nicolaus isch z Gießen ufgwagse. Si het scho mit 16 Joor ire Elterehuus verloo, wu si si verlobt ghaa het, un het d Schuel abbroche. Noch em frieje Uufalldood vu irem Mann het si s Abituur nooghoolt un het ab 1933 Räächtswisseschafte un Volks- un Bedriibswiirtschaftleer z Gießen studiert. Noch em eerschte Staatsexaame 1937 isch si an dr Ludwigs-Uniwersiteet Gießen mit ire Aarbet iber dr „Grundbuchberichtigungszwang“ bromewiert woore. Ab 1938 het si zeerscht bi dr I.G. Farben z Ludwigshafen am Rhein gschafft. Wu si ire zweete Mann ghyroote het, isch si 1940 mit ire Familie uf Stuegert zooge, wu si bis zum Chriegsänd as Schaadessachbearbaiteri fir di Wiirtebäärgisch Fyyrversicherig gschafft het un 1944 ire zwait Staatsexaame abglait het.

Wel si vu dr Nazionaalsozialischte nit as Räächtsaawälti zuegloo wooren isch, het si in däm Beruef eerscht noch e Chrieg chenne gschafft. Näb irem Beruef het si d Emmy Diemer-Nicolaus au eerenamtli fir dr Dytsch Jurischtenebund engaschiert. Syt Ändi 1950er Joor isch d dreifach Mueter gschiide gsii. Dr Blaan vu dr soziaalliberaale Regierig, si zur Riichteri vum Bundesverfassigsgriicht z mache, isch 1971 am Wiiderstand vu dr Unioonsbarteie gschyteret.

Bolitik

Unter em Yyfluss vu Ufsätz vum Wolfgang Haußmann isch d Diemer-Nicolaus anne 1946 in d DVP yydrätte. Vu 1959 bis 1971 het si au em Landesvoorstand vu dr baade-wiirtebäärgische FDP/DVP aagheert. Bis zue irem Dood isch si Eerevoorsitzeri vum FDP/DVP-Kraisverband Stuegert gsii.

Vu 1946 bis 1950 isch d Emmy Diemer-Nicolaus Gmaireeti z Stuegert gsii. Derno isch si vu 1950 bis 1952 Mitgliid vum Landdaag vu Wiirtebäärg-Baade, bzw. noch em Zämeschluss vu Wiirtebäärg-Baade, Wiirtebäärg-Hauezollre undBaade 1952 bis 1957 Mitgliid vum Landdaag vu Baade-Wiirtebäärg. Do het si si vor allem fir e liberaali Verfassig fir Baade-Wiirtebäärg yygsetzt.

Anne 1957 isch d Diemer-Nicolaus iber d Landeslischt vu dr FDP z Baade-Wiirtebäärg in Dytsche Bundesdaag gweelt woore. Deert isch si Expeerti vu ire Frakzioon fir Huushalts- un Verfassigsfrooge gsii. Vu Jänner 1963 bis 1965 isch si stellverdrättendi Voorsitzeri vum Räächtsuusschuss gsii. Si he au em Sunderuusschuss fir di grooß Stroofräächtsrefoorm aagheert, wu si si fir d Resozialisierig vu Lyt yygsetzt het, wu strooffellig woore sin. D Resozialisierig het dr alt Rache- un Siinegedanke sollen ersetze. Dooderfir het si au „einen Ausbau der sozialtherapeutischen Anstalten und für arbeitende Strafgefangene eine angemessene Bezahlung ihrer Leistungen, um den Unterhalt für die Familien zu sichern, das Opfer der Straftat zu entschädigen und eine Rückzahlung von Schulden zu ermöglichen“, gfoorderet. Derzue het si si fir d Glyychberäächtigung vu Mann un Frau engaschiert, indäm si u. a. as aini vu dr eerschte Dailzytaarbet gfoorderet het fir Fraue, wu im Beruef schaffe. In dr Debatte um dr |§ 218 StGB het si d Emmy Diemer-Nicolaus fir d Yyfierig vu dr eetische Indikazioon bi re Schwangerschaft noch ere Vergwaltigung yygsetzt. Derzue het si au ne wiichtige Aadail an dr Refoorm vum Ee- un Schaidigsräächt ghaa, wu hite vum „Zerrüttungsprinzip“ uusgoot statt vum „Schuldprinzip“.

Vu 1971 bis 1973 isch d Diemer-Nicolaus Mitgliid vu dr Berootende Versammlig vum Europaroot gsii.

Unterlaage iber iiri Aarbet fir d FDP im Dytsche Bundesdaag liige im Archiiv vum Liberalismus vu dr Friedrich-Naumann-Stiftig fir d Freihait z Gummersbach.

Eerige un Uuszaichnige

D Emmy Diemer-Nicolaus isch anne 1968 mit em Verdienschtchryz 1. Klasse vu dr Bundesrepublik Dytschland uuszaichnet woore. 1972 het si dr Fritz-Bauer-Bryys un 1973 s Grooß Bundesverdienschtchryz un d Verdiscnhtmedallie vum Land Baade-Wiirtebäärg iiberchuu. 2018 isch e Sitzigssaal in de Ryym vu dr Landdaags.FDP noch ere gnännt woore.

Schrifte

• Es gibt keine spezielle Politik für Frauen. In: Birgit Meyer: Frauen im Männerbund. Politikerinnen in Führungspositionen von der Nachkriegszeit bis heute. Campus-Verlag, Frankfurt am Main u. a. 1997, ISBN 3-593-35889-1, S. 163–190.

Literatuur

• Ina Hochreuther: Frauen im Parlament. Südwestdeutsche Abgeordnete seit 1919. Herausgegeben vom Landtag Baden-Württemberg und der Landeszentrale für politische Bildung Baden-Württemberg. Theiss, Stuttgart 1992, ISBN 3-8062-1012-8, S. 178–180.
• Orla-Maria Fels: Eine leidenschaftliche Verteidigerin des Rechtsstaates – Emmy Diemer-Nicolaus. In: Liselotte Funcke (Hrsg.): Frei sein, um andere frei zu machen. Stuttgart 1984, S. 194–201.
• Stadtarchiv Stuttgart (Hrsg.): Trümmerfrauen der Kommunalpolitik. Frauen im Stuttgarter Gemeinderat 1945–1960. Stuttgart 2013, S. 19 f.
• Marion Röwekamp u. a.: Juristinnen. Lexikon zu Leben und Werk. Hg. v. Deutschen Juristinnenbund, 2. Aufl., Nomos, Baden-Baden 2024, S. 122–124.

Weblink

• d Emmy Diemer-Nicolaus in dr Dytsche Biografy
• d Emmy Diemer-Nicolaus uf LEO-BW

Fueßnote

Dä Artikel basiert uff ere fräie Übersetzig vu dere Version vum Artikel „Emmy_Diemer-Nicolaus“ vu de dütsche Wikipedia. E Liste vu de Autore un Versione isch do z finde.