Elio

Filmdate
Dütsche Titel	Elio
Originaltitel	Elio
Produktionsland	USA
Originalsprooch	Englisch
Erschiinigsjoor	2025
Stab
Regie	Madeline Sharafian Domee Shi Adrian Molina
Dräibuech	Julia Cho Mark Hammer Mike Jones
Produktion	Mary Alice Drumm
Muusig	Rob Simonsen

Dialäkt: Schwiizerdüütsch

Elio isch en Animationsfilm vo Pixar Animation Studios und Walt Disney Pictures. Er isch am 18. Juni 2025 i d Schwizer Kinos cho.

Handlig

De Elio, d Hauptfigur, isch ehner en Ussesiiter. Er hät keini Fründe und sini Eltere sind verschtorbe. Jetzt kümmeret sich drum sini Tante um in. Si schaffet inere Militärbasis. Ihri Ufgab isch es, Wältrumtrümmer z entsorge.

De Elio isch fasziniert vo usserirdischem Läbe. Er würd gern vo Usserirdische entfüehrt werde. Er liit drum an Strand und wartet. Er het au in Sand gschribe, dass er gern entfüehrt werde wot. Aber es klappet nöd.

Vor es paar Jahr händ d Mensche d Voyager-Sonde is All gschickt. Sie hät e Dateplatte bi sich mit Stimme vo Mänsche und andere Date vo de Erde. S Ziel isch gsi, Usserirdischi uf eus Mensche ufmerksam z mache. Tatsächlich finded Usserirdischi die Platte und wänd Kontakt mit de Erde ufnäh. D Basis, wo em Elio sini Tante schaffed, cha das Signal empfange und en Mitarbeiter erkännts richtig als usserirdische Kontaktversuech. Aber niemert glaubt ihm; er wird vo allne usglachet.

De Elio hät sich in Kontrollrum gschliche und alles ghört. Wo grad niemer ume isch, schickt er en Antwort, die Usserirdische sölled in kontaktiere.

Das klappet nach eme Wiili tatsächlich und er wird iglade in es usserirdisches Komitee. De Elio laht alli im Glaube, er seg de Aführer vo de Erde. De Lord Grigon wot au Mitglied werde im Komitee. Er isch de Herrscher voneme chriegerische Volch vo Usserirdische. Die andere Mitglieder händ Angscht vor im und wänd en drum nöd ufnä. De Lord droht mit emene militärische Agriff. Die andere Mitglieder wänd sich verstecke. Im letschte Momänt mäldet sich de Elio und bütet a, mit em Lord Gridon z verhandle.

S Gspröch mit em Lord klappet würkli und am Afang schined sich die beide rächt guet z verstah. Aber nach es paar wenige Wort fühlt sich de Herrscher beleidigt und laht de Elio ispeere. Er cha sich aber befreie und suecht nacheme Wäg us de Feschtig. Da begägnet er eme Alien, wo in i Spinnefäde iwicklet und er het Angscht, es wel in frässe. S Monschter isch aber ganz nett und stellt sich em Elio als Glordon vor. Sie merked schnell, dass sie sich guet verschtönd. De Glordon verratet am Elio, dass er de Sohn isch vom Herrscher Lord Grigon. Da het de Elio e Idee: Er entführt de Glordon ufd Erde als "Geisle", zum de Lord dezue bringe, nöd aazgrife.

Au das klappet und de Lord git sis Ehrewort, dass er nöd agrifft und bald verbi chunnt, zum sin Sohn hole. De Elio und de Glordon verbringed vil Ziit mitenand und de Glordon wet eigentlich nöd zrugg zu sim Vater, wil er ken Herrscher und kei "Kampfmaschine" si wot. De Elio nimmt vom Glordon e DNA-Prob und lat drus en Klon mache. De schicked si em Vater vom Glordon. Aber de merkt de Schwindel schnäll. Er grifft s Komitee aa und nimmt ali gfange. De Elio cha sich dur es Portal uf d Erde rette und de Glordon flügt ineme Rumschiff uf d Erde.

I de Basis isch alles im Alarmzuestand: De Kapsle vom Glordon isch det glandet. De Elio wot zäme mit sinere Tante in rette und zu sim Vater zruggbringe. Si schliched sich id Basis und chönd s Ruumschiff starte. Underwäggs grated si aber i Trümmer vo Wältrumschrott. Zum Navigiere kommuniziered sie per Funk mit verschidene Bodeschtatione.

Em Glordon gahts aber gar nöd guet. Es isch im viel zchalt und es staht schlimm um in. Sie decked en zue mit enere Jagge, aber das nützt wenig. Wo sie bi sim Vater achömed, hed de Herrscher sehr grossi Angscht um sin Sohn. Es isch s erste Mal, wo ner us sinere Rüschtig chunnt. Er wicklet sin Sohn dick mit Spinnefäde i. Das hilft und de Glordon erholt sich.

Die Miglieder vom Komitee sind überglücklich und wännd de Elio als Mitglied ufnä, obwohl sie inzwüsche wüssed, dass er nöd de Aaführer vo de Erde isch. Er isch zerscht glücklich, gaht aber dänn doch zrugg uf d Erde mit sinere Tante.

Weblinks

• Elio in dr Internet Movie Database
• Elio in The Movie Database