Eduard Rung

Dr Eduard Rung (* 26. April 1868 z Märkt; † 11. Februar 1943 z Eimeldinge) isch e dytsche Säägmiller, Buur un Buurgermaischter gsii.

Lääbe

Dr Rung isch im Alte Schuelhuus z Märkt as Suun vum Fischer Friedrich Rung (1837–1914) un syre Frau Anna Maria Rung (1833–1875) uf d Wält chuu un mit eme Brueder, Eduard Friedrich Rung (1868–1943), ufgwagse. En elteri Schweschter, Karoline Rung (1863–1870), isch frie gstoorbe. No dr Schuel het er bim Vater as Fischer un as Buur gschafft un im Winter am Rhyyböu.

Dr Runge Edi isch uf Eimeldinge chuu un het deert am 17. Novämber 1892 d Mathilde Zipsin (1870–1929) ghyroote, e Doochter vum Säägmiller Johann Zipsin (1828–1884). Är het derno sälber Säägmiller gleert un 1895 dr Bedriib ibernuu.

Mit syre Frau het er segs Chinder ghaa: Mathilde Rung 1893–1946), Emilie Rung (1894–1968), Marie Rung (1897–1966), Hilda Karolina Rung (1898–1966), Anna Katharina (Rung 1900) un Helena Rung (1904–1922).

Anne 1922 isch dr Sääger-Edi z Eimeldinge zum Buurgermaischter gweelt woore. 1933 isch er im Amt bsteetigt wore. Au im Dritte Ryych isch er bis zue sym Dood Buurgermaischter bliibe. Am 1. Mai 1937 isch dr Rung Mitgliid vu dr NSDAP woore (Mitgliidsnummere 4.146.594).

Dr Eduard Rung het si scho frie fir dr alemannisch Dialäkt inträssiert. Scho vooreb er in d Schuel chuu isch, het er Gediicht vu sym Voorbild Johann Peter Hebel uuswändig gleert ghaa. Är het si nit nume fir dr Dialäkt yygsetzt, nai, au fir s regionaal Bruuchduum. Är het bi Draachtefescht mitgmacht un bi Haimetdääg Aasprooche ghalte. Wu anne 1926 z Haltinge d „Hebel-Gmai“ grindet wooren isch, isch dr Rung aistimmig zum Hebelvogt gweelt woore. Fascht all Joor isch er am Doodesdaag vum Hebel an däm sym Graab z Schwetzinge gsii. Anne 1938 isch er vu dr Gmai Märkt zum Eerebuurger ernännt woore. Fir s eerscht Markgräfler Jahrbuch, wu 1939 uusechuu isch, het er e Gediicht uf Alemannisch as Nooruef für dr Theodor Gempp gschriibe.

Am 11. Februar 1943 isch dr Eduard Rung gstoorbe, no dr Chroonik vu Eimeldinge heeb s im Doorf s no nie eso ne grooßi Lyycht gee.

Anne 2024 het em Rung sy Uuränkel Dieter Kraus zäme mit syre Doochter Julia Merrien un dr Baasler Gschiichtswisseschaftleri Anna Rapp Buri e Buech iber dr Rung un sy Zyt im Doorf Eimeldinge uusegee.

Wäärch

• Erinnerungsblatt an die Begrüßungs-Feier der aus dem Weltkriege 1914/18 heimgekehrten Krieger hiesiger Gemeinde. Abgeh. am 11. Januar 1919, im Gasthaus zum „Ochsen“ hier. Den Kriegern u. Helden zur bleibenden Erinnerung gewidmet von der Gemeinde Eimeldingen. Markgräfler Druckerei u. Verl.-Ges., Müllheim i. B. 1919, 39 S.
• Dem lieben Freund Theodor Gempp von Oetlingen, beerdigt am Karfreitag 1933. In: Markgräfler Jahrbuch 1.1939, S. 152 Digitalisat

Literatuur

• Eduard Rung (1868–1943), Säger Edi Bürgermeister und Hebelvogt von Eimeldingen. Herausgegeben von Dieter Krause. Eimeldingen 2024

Weblink

• Fischer, Bürgermeister und weithin geschätzter Hebelvogt, Badische Zeitung, 28. Februar 2004
• , Schwarzwälder Bote, 1. Meerz 2024