Annemarie Griesinger

d Annemarie Griesinger in ire Haimetstadt Markgrẽänenga am 23. Augschte 2008

d Annemarie Griesinger näb em Lothar Späth bim Bundesbarteidaag vu dr CDU 1978 z Ludwigshafen

D Annemarie Griesinger (* 21. April 1924 z Markgrẽänenga as Annemarie Roemer; † 20. Februar 2012 z Aurich) isch e dytschi Bolitikeri (CDU) gsii. Vu 1964 bis 1972 isch si Mitgliid vum Dytsche Bundesdaag gsii un vu 1972 bis 1980 baade-wiirtebäärgischi Minischterii fir Aarbet, Gsundhait un Soziaaloornig.

Lääbe

D Annemarie Griesinger isch as jingschts Chind un ainzigi Doochter mit fimf eltere Brieder in ere evangeelische Bfaarfamilie ufgwagse. Ire Vater, dr Teoloog un Hischtooriker Hermann Roemer, het noch em Zweete Wältchrieg z Markgrẽänenga dr Oortsverband vu dr CDU grindet. Noch em Abituur 1942 het si an ere Huushaltigs- un Soziaale Fraueschuel Fiirsoorgeri gleert un het as Beruefsberooteri gschafft. Si het ab 1956 in dr Kraisfiirsoorg Ludwigsburg gschafft. Si isch im nämlige Joor Mitgliid vu dr Junge Union woore un zwai Joor speeter vu dr CDU. Vu 1956 bis 1959 het si z Noordwiirtebäärg Voorstandsposizioone in dr Junge Union, in dr CDU un in dr CDU-Fraueverainigung ghaa.

Anne 1961 het si uf dr Landeslischt fir dr Dytsch Bundesdaag kandidiert, zeerscht erfolgloos, isch aber 1964 fir dr Wilhelm Hahn noogruggt, wu dää Kultusminischter vu Baade-Wiirtebäärg wooren isch. Ire Mandaat isch bi dr Bundesdaagswaale 1965 un 1969 bsteetigt woore. Bi dr Waal 1969 het si dr bishäärig SPD-Waalkrais Ludwigsburg fir d CDU gwunne. Anne 1969 isch si zue aire vu dr stellverdrättende Frakzioonsvoorsitzer*ne vu dr CDU/CSU-Bundesdaagsfrakzioon gweelt woore.

D Annemarie Griesinger isch ab 1972 as eerschti Frau im Kabinett vum Land Baade-Wiirtebäärg verdrätte gsii. Dr Minischterbresidänt Hans Filbinger het si no dr Landdaagswaal as Minischteri fir Aarbet, Gsundhait un Soziaaloornig in sy Kabinett gruefe. Des Amt het si bis 1980 ghaa. Si het si in däre Zyt unter anderem fir e flechedeckend Sischteem vu Soziaalstazioone un Behindertewäärchstätte yygsetzt.

Derno isch si vu 1980 bis 1984 Minischteri fir Bundesaagläägehaite im Staatsminischterium Baade-Wiirtebäärg, Bevollmächtigti vum Land z Bonn un au Europabeufdraiti vu dr Landesregierig gsii. Vu 1981 bis 1990 isch si Landesvoorsitzeri vu dr Europa-Unioon Baade-Wiirtebäärg gsii un isch druf wäge irem Engaschmänt fir Europa un d Europa-Unioon zur Eerevoorsitzeri ernännt woore. Wäg ire Gselligkait het si dr Byyname „Feschtles-Marie“ iiberchuu.

Vu 1976 bis 1984 isch d Annemarie Griesinger Landdaagsabgoorneti fir dr Landdaagswaalkrais Vaihenga gsii. Anne 1984 isch si in Ruestand gange, isch aber soziaalbolitisch aktiiv bliibe. Si isch vu 1984 bis 1996 Voorsitzeri vu dr „Bundesvereinigung für Lebenshilfe“ gsii.

Ab 1953 isch si ghyroote gsii mit em Volkswiirt un Hoochschuelleerer Heinz Griesinger. D Ee isch chinderloos bliibe. Anne 1965 het si as eerschti Abgoorneti zum eerschte Mool s Guldeni Spoortabzaiche gmacht.

Schrifte

• Heidenei, Frau Minister! Lachen ist die beste Medizin. Hg. Martin Hohnecker. Hohenheim-Verlag, Stuttgart 2006 ISBN 3-89850-140-X.

Literatuur

• Ina Hochreuther: Frauen im Parlament. Südwestdeutsche Abgeordnete seit 1919. Theiss, Stuttgart 1992, ISBN 3-8062-1012-8, S. 188–190.

Weblink

 Commons: Annemarie Griesinger – Sammlig vo Multimediadateie

• Heidenei! Annemarie Griesinger zum 80. Geburtstag. Eine Festschrift. Staatsministerium Baden-Württemberg, April 2004, archiviert vom Original am 14. Mai 2013; abgruefen am 19. September 2022. 
• Griesinger, Annemarie im Munzinger-Archiv (Artikelaafang frei abruefbar)

Fueßnote

Dä Artikel basiert uff ere fräie Übersetzig vu dere Version vum Artikel „Annemarie_Griesinger“ vu de dütsche Wikipedia. E Liste vu de Autore un Versione isch do z finde.